تجم وقيعانىڭ سوڭىنان سالپاڭداۋدى قاشان قويادى؟
رەسمي ورگانداردىڭ ءوزى وقيعا ءتۇننىڭ ورتاسىندا ورىن العاندىعىن مويىنداپ وتىر. ال تاڭعى 6-7-گە دەيىن رەسمي اقپارات قۇرالدارىن سونىڭ ىشىندە بارشاعا قولجەتىمدى تۆ ارقىلى ەشبىر حابار بولمادى!
ماسەلەن، ءوز باسىم العاشقى اقپاراتتى فەيسبۋكتەگى دوستاردان وقىپ، ءبىلدىم. ال ەگەر كۇنى ەرتەڭ وسىنداي توتەنشە جاعدايدا ينتەرنەت ىستەمەي، ەلەكتر قۋاتى اجىراتىلىپ قالعاندا نە بولادى؟ ەل اقپاراتتى قايدان الادى؟
سول ساعاتتاردا ناقتى اقپارات الا الماعان الماتىلىقتار نە ىستەرىن، قايدا بارارىن بىلمەي، ابدىراپ قالدى! نەگە وسىنداي توسىن وقيعالارعا قاتىستى اقپارات ەلگە الدىن-الا تاراتىلمادى؟ نەگە كۇنى بۇرىن ءتيىستى جاتتىعۋلار وتكىزىلمەدى؟
بيلىك تاۋداعى "مورەنالىق" كول ەرنەۋىنەن اسىپ، تاسقىن تومەن قاراي جوڭكىدى، ال سۋ بوگەتى بۇزىلعان جوق دەيدى. بىراق تاسقىن سۋ قالانىڭ تومەن جاعىنا دەيىن جەتتى عوي. بۇل دەگەنىڭىز سول بوگەتتىڭ وزىندە ءبىر كىلتيپان بار دەگەن ءسوز!
ال باسقا "مورەنالىق" كولدەردىڭ بولاشاعى قانداي؟ ولاردىڭ سانى قانشا، قاشان ەرىپ، تومەن قاراي اعۋى مۇمكىن؟ جانە دە ول تاسقىنعا توسقاۋىل بولۋعا ءتيىس بوگەتتەردىڭ جاعداي قانداي؟ وسىنىڭ ءبارى تۋرالى كىم ايتا الادى؟
ءبىزدىڭ تج ورگاندارى وقيعانىڭ سوڭىنان سالپاڭداپ ءجۇرۋدى قاشان قويادى؟ قانشاما كۇن الماتىدا كۇن كۇيىپ تۇر، وسىنىڭ ءبارى تاۋداعى كولدەرگە ءوز اسەرىن تيگىزەتىنى و باستان-اق بەلگىلى بولمادى ما؟ نەگە وقيعانىڭ الدىن-المادى؟ ول ءۇشىن ءارتۇرلى
گيدروتەحنيكالىق امالدار بار ەمەس پە؟!
ازىرشە وسى!
ءبىر پالەدەن امان قالعان سياقتىمىز.
وسىدان بيلىك ءبىر جاقسىلاپ ساباق السا دەگەنىم عوي.
ال كۇن بولسا، ءالى دە قايناپ تۇر.
مورەنالىق كولدەر بار ەكەنىن ەندى بىلگەن ەل سول جاققا مازاسىزدانا قاراپ قويادى.
بالەسى اۋلاق! ەل امان، الماتىم امان بولسىن!
PS. وسىنداي بۇكىل ەلدى بىرىكتىرۋگە ءتيىس ساتتەردە باستىقتاردى تىكۇشاقتان ءبارىن باقىلاپ ءجۇردى. "تىنىشتىق ساقتاڭىزدار! ءبارى دۇرىس بولادى!" دەپ قاعاز تاراتتى. مەنىڭشە، اكىمدەر جۇرتپەن بىرگە لاي كەشىپ، بار قيىندىقتى ەلمەن بولىسكەندە عانا عانا ءبارى تىنىش بولادى!
ءامىرجان قوسانوۆ، ساياساتكەر
