“قازاق ءۇنى” گازەتى مەن Qazaquni.kz ۇلتتىق پورتالىندا   9 ماۋسىم كۇنگى №23(680) سانىندا جاريالانعان قازىبەك يسانىڭ  “اقان سەرى شەتەلشە سويلەگەن بە؟  قۇلاگەر ەسكەرتكىشىنە نەگە شەت تىلىندە جازىلعان؟!.”  http://www.qazaquni.kz/?p=36732   اتتى ماقالا وقىرمانداردىڭ نازارىن قاتتى اۋدارىپ،  وتكىر تالقىنىڭ وزەگىنە   اينالعان ەدى.   اتالعان ماقالانى كۇنى بۇگىنگە دەيىن پورتال وقىرماندارى 5171 رەت قاراپ ۇلگەرىپتى. گازەتىمىز بەن پورتالىمىزدىڭ تۇراقتى وقىرماندارى بولىپ تابىلاتىن ءتىل، ۇلت جاناشىرلارى دا وسى ماقالاعا تولاسسىز پىكىرلەرىن ءبىلدىرىپتى.

اتالمىش ماقالادا اۆتور استاناعا 30 شاقىرىمداي جەردەگى بوزايعىر اۋىلىنان وتە بەرە بوي كوتەرگەن قۇلاگەر ەسكەرتكىشىندەگى جازۋدىڭ قازاق تىلىندە ەمەس، ورىس تىلىندە جازىلعاندىعىن ماسەلە ەتىپ كوتەرگەن بولاتىن.

قازاق ءتىلى شىن مانىندە ازاتتىق المايىنشا، ءتىل ماسەلەسى ءبىزدىڭ ەلىمىزدە وزەكتى بوپ قالا بەرمەك. اۆتور قازىبەك يسا قازاق تىلىنە قاتىستى ماسەلەلەردى وتكىر دە، اشىق قوزعاپ جۇرگەن قايراتكەر  رەتىندە اتالعان ماقالانى: ء«بىزدىڭ ايتارىمىز، قۇلاگەر ەسكەرتكىشى كۇرە جولدىڭ بويىندا بولعاندىقتان بۋرابايعا بارىپ كەلە جاتقان كەز-كەلگەن ادام، شەتەلدىكتەر دە كوپ بولادى، كورەدى. مىناداي ءار ادام كورگەن سايىن ماسقارا بولا بەرمەۋ ءۇشىن، ەسكەرتكىش يەلەرى ءادىل سىننان قورىتىندى شىعارىپ، ەسكەرتكىشتەگى شەتەل تىلىندەگى جازۋ جازىلعان تاقتانى مەملەكەتتىك ءھام انا تىلىمىزگە، ياعني اقان سەرىنىڭ تىلىنە اۋىستىرۋى ءتيىس!» دەپ تۇيىندەپ قانا قويماي، ەسكەرتكىش يەلەرىنە وتكىر تالاپ تا قويعان بولاتىن.

ەندى مىنە، ورىندى سىننىڭ ناتيجەسى – كەمشىلىك تۇزەتىلىپ، قۇلاگەر ەسكەرتكىشىنە قازاق تىلىندەگى جازۋ جازىلعان تاقتايشا ورنالاستىرىلعانى تۋرالى حابار كەلدى.

“اسسالاۋماعالەيكۋم قازىبەك اعا!  قۇلاگەر ەسكەرتكىشىنە جازعان ماقالاڭىزدى وقىپ ءوزىڭىزدىڭ ۇلتقا دەگەن جاناشىرلىعىڭىزدى بايقاپ وتىرمىن. دۇرىس سىن ايتىلماي – ءمىن تۇزەلمەيدى دەيدى دانا حالقىمىز. ءسىزدىڭ وسىنداي ەسكەرتپەڭىزدەن كەيىن بارىپ، قازاقشا نۇسقاسىن اپارىپ ءىلىپ قويدىق. “ەر قاناتى – ات” دەگەندەي اقان سەرىمىز دە  قۇلاگەرىن جىرلاپ وتكەن ەدى عوي.  سىزگە كوپتەن كوپ راحمەتىمدى ايتامىن.  ەلىمىزدىڭ، ۇلتىمىزدىڭ كوركەيۋىنە قوسىپ جاتقان ەڭبەگىڭىزگە  تالماس قانات، قۇلاگەردىڭ شابىسىنداي شابىس تىلەيمىن.   ايدىن ەگەۋباەۆ” – دەپ جازىلعان رەداكتسياعا كەلگەن حاتتا.

ءبىزدىڭ ۇلتتىق رۋحتىڭ ۇپايىن تۇگەندەۋ ماقساتىنداعى سىنىمىزدان ناتيجە شىعارا بىلگەن، كەمشىلىكتى بىردەن تۇزەپ، استانا – كوكشەتاۋ جولىنداعى بوزايعىر اۋىلىنداعى قۇلاگەر ەسكەرتكىشىنە  قازاق تىلىندە جازىلعان تاقتايشا ورنالاستىرعان  ازاماتتارعا، بەلگىلى جازۋشى، قۇلاگەرگە ەسكەرتكىش سالۋ يدەياسىنىڭ اۆتورى، قازاقستاننىڭ ەڭبەك سىڭىرگەن قايراتكەرى سادىبەك تۇگەلگە جانە وسى ءىستىڭ باسى-قاسىندا جۇرگەن ايدىن ەگەۋباەۆ مىرزالارعا قالىڭ وقىرماننىڭ اتىنان العىس ايتامىز.

ەلدىڭ ءبارى وسىلاي ورىندى سىننان قورىتىندى شىعارا بىلسە، كەلەشەگىمىز دە جارقىن بولا بەرمەك دەگەن ويدامىز.

الداعى ۋاقىتتا دا بيىل جارىق كورگەنىنە 15 جىل تولىپ وتىرعان «قازاق ءۇنى» باسىلىمى قازاقتىڭ ۇلتتىق مۇددەسىنە قاتىستى وزەكتى ماسەلەلەردى تۇراقتى تۇردە كوتەرە بەرمەك. حالىقتىڭ ويىن، ارمان-مۇڭىن جازاتىن گازەتىمىز بەن پورتالىمىز ءار قاشان دا حالىقپەن بىرگە بولماق.

“قازاق ءۇنى” گازەتى رەداكتسياسى

QAZAQUNI.KZ