انۇراندى اۋدارۋ – قازاقتى كەلەكەلەۋ!
الدىڭعى كۇننىڭ كەشەسىندە (وسىدان ءۇش كۇن بۇرىن عوي) اقتاڭ ءسۇيىنىشالىين دەگەن رەسەيلىك قازاق ەلىمىزدىڭ ءانۇرانىن ورىس تىلىنە اۋدارىپ، «ايدى اسپانعا» شىعاردى. «مەن ماسكەۋلىك دوستارىما ءبىزدىڭ ءانۇرانىمىزدىڭ ادەمىلىگىن وزدەرىنە وتە-وتە تۇسىنىكتى تىلدە كورسەتكىم كەلدى، - دەيدى ول اقپارات قۇرالدارىنىڭ وكىلدەرىنە ايتقان ءبىر اۋىز اڭگىمەسىندە، - ال ءانۇراندى اۋدارۋ يدەياسى مەنىڭ ءبىر دوسىمنىڭ «استانا كۇنى مەرەكەسىندە ايرىقشا فلەشموب ۇيىمداستىرىپ، قازاقستاندىقتارمەن بىرگە ءانۇراننان باستالعان باستاما بويىنشا باسقا دا بىرنەشە ءاندى بىرنەشە تىلدە ورىندايىق» دەگەنىنەن شىعىپ كەتتى. وسىدان كەيىن مەن ينتەرنەت كەڭىستىگىنەن ارى-بەرى ىزدەستىرىپ كورىپ ەدىم، ءبىزدىڭ ءانۇرانىمىزدىڭ باسقا تىلدەرگە، ونىڭ ىشىندە ورىس تىلىنە اۋدارىلعان نۇسقاسى جوق بولىپ شىقتى. سودان مەن وسى كەمشىلىكتىڭ ورنىن تولتىرماق بولىپ، ءانۇراندى ورىسشاعا اۋداردىم. «سىرت كوزبەن قاراعاندا قالاي ەستىلەدى ەكەن؟» دەگەن ويمەن اۋدارماسى جاسالعان ءانۇراندى ۆيدەوعا ءتۇسىردىم. مەنىڭ ويىمشا، مۇندا تۇرعان ورەسكەل ەشتەڭە جوق سياقتى...»
مىنە، اقتاڭ دەگەن ازامات وسىلاي دەيدى. ال ءبىزدىڭ تىلىمىزدە مۇنى – «اتىڭ شىقپاسا – جەر ورتە» دەيدى. ال ەندى انىعىنا كەلەتىن بولساق، ميحايل كلەنچين دەگەن زاڭگەردىڭ ايتۋىنا قاراعاندا، ەلىمىزدىڭ ءبىرىنشى ءنومىرلى ءانىن باسقا تىلگە اۋدارۋ ارقىلى اقتان ءسۇيىنىشالين قازاق ەلىنىڭ قولدانىستاعى زاڭىن ورەسكەل بۇزىپ وتىر. «ەندى وسى دۇرىس پا؟» دەگەن ءدۇدامال ماسەلەگە كەلەيىك. زاڭگەر ايتىپ وتىر – «زاڭ بۇزىلىپ وتىر» دەپ. دەمەك، زاڭدى بۇزىپ وتىرعان ماسكەۋلىك قازاق ءسوز جوق، كودەكستە كورسەتىلگەن تارماقتار بويىنشا جازاسىن الۋعا ءتيىس. باسقاسى باسقا، بۇتىندەي ءبىر ەگەمەن ەلدىڭ ءانۇرانىن وزگە تىلگە اۋدارىپ، مەرەكەلەردە شىرقالاتىن روك، رەپ سياقتى «زاماناۋي جىندى بيلەردىڭ» قاتارىندا سەكەڭدەتىپ قويۋ، شىنىن ايتقاندا، تازا كەلەكەلەۋ بولىپ سانالادى. بۇعان باسقاداي ءسوز جوق. ءسۇيىنىشالين، ەستۋىمىزشە، الداعى ۋاقىتتا ورىسشامەن عانا توقتاپ قالماي، قازاق ەلىنىڭ ءانۇرانىن اعىلشىن جانە قىتاي تىلدەرىنە دە اۋدارماقشى. قۋانا قوياتىنداي جاعداي ەمەس بۇل، ويتكەنى قازاق ەلىندە «ەمەن-جارقىن، تاۋ-ءتاتتى» ءومىر ءسۇرىپ جاتقان ءجۇز قىرىققا تارتا ۇلتتىڭ ارقايسىسى ءوز تىلىنە اۋدارىپ الىپ، ناتيجەسىندە ءانۇرانىمىز مەرەكە سايىن ءجۇز قىرىققا تارتا تىلدە شىرقالىپ جاتسا، نە بولادى سوندا؟ ەشتەڭە دە بولمايدى، تاپ-تازا قويىرتپاق بولادى وندا. نەگىزى، ءار ەلدىڭ ءانۇرانى سول ەلدىڭ تەك مەملەكەتتىك تىلىندە عانا شىرقالادى – الەمدىك پراكتيكادا سولاي قالىپتاسقان.
«كەشە 28 باتىر... بۇگىن ءانۇران، ال ەرتەڭ... ال ەرتەڭدى ويلاۋدىڭ ءوزى ءتىپتى قورقىنىشتى... قازاقتى كەلەكەلەۋ وسىلايشا جالعاسا بەرەتىن بولسا!
مارات ماداليموۆ.
Abai.kz
