كەشە پارلامەنت ءماجىلىسىنىڭ دەپۋتاتتارى ادەتتەگىدەن وزگەشە – كوتەرىڭكى كوڭىل-كۇيدە ءجۇردى. «توبەسى كورىنىپ» تۇرعان كانيكۋل كۇندەرىنىڭ اسەرى مە، جوق باسقاداي ءبىر سەبەبى بار ما – ايتەۋىر ولار كەشە ءبىراز شارۋانى تىندىرىپ-اق تاستادى. اينالدىرعان بىرنەشە ساعات ىشىندە مۇگەدەكتەرگە ميلليارد دوللار تاۋىپ بەردى. ەلىمىزدىڭ شەت ەلدىكتەر الدىنداعى بەدەلىن بىلدىرەتىن يميدج-كامپانيا دەگەندى ويلاپ تاپتى. ءتىپتى ولار وزدەرىنىڭ جەكە ومىرلەرىنىڭ دە بىرقاتار بەلەستەرىن «اۋدارىپ-توڭكەرىپ» تاستادى. راس، حالىق قالاۋلىلارىنىڭ قاربالاسقا تولى دەپ ايتا قويۋعا كەلمەيتىن كۇندەلىكتى تىرلىكتەرىنە ونشا-مۇنشا قىزىعۋشىلىق تانىتا قويمايتىن باق وكىلدەرى اڭگىمە وسى ءبىر «جەكە ءومىر» جايىنا كەلگەندە «اياق استىنان ءتىرىلىپ» سالا بەردى. ەلدىڭ كوز الدىندا جۇرگەن زىڭگىتتەي دە زىڭگىتتەي... قالاۋلى دا قالاۋلى ادامداردىڭ جەكە ومىرلەرى البەتتە، كەز-كەلگەن ادامدى قىزىقتىرىپ تۇراتىنى ايتپاسا دا تۇسىنىكتى نارسە. دەگەنمەن، جەكە ءومىر ماسەلەسىنە كەلگەندە اۋعان سوعىسىنىڭ باتىرى، گەنەرال-دەپۋتات باقىتجان ەرتاەۆ ارىپتەس-كەرىستەس ادامداردىڭ بارلىعىن دا جولدا قالدىردى، ويتكەنى كەيىنگى كەزدەرى باتىر ادامنىڭ «بولمايتىن بىردەڭەگە بولا» باسى شاتىلىپ ءجۇر – قىپ-قىزىل اڭگىمەگە قالىپ.

القيسسا: ءبارىمىز بىلەمىز، وسىدان بىرنەشە كۇن بۇرىن بانكير جومارت ەرتاەۆ دەگەن ەلگە بەلگىلى قارجىگەر-بيزنەسمەننىڭ باسىنىڭ داۋعا قالىپ، ءوزىنىڭ ءتيىستى ورگاندار تاراپىنان ىزدەۋگە ۇشىراعانىن. قازىر قاشىپ ءجۇر، قىسقاسىنان قايىراتىن بولساق.  سول-اق ەكەن، ءباسپاسوز بەتى مەن تەلە-ينتەر-الەۋمەتتىك جەلى دەگەندەرىڭىزدى «بانكير ەرتاەۆ گەنەرال ەرتاەۆتىڭ ۇلى ەكەن» دەگەن اڭگىمە ارالادى دا كەتتى. راس-وتىرىگىن ەشكىم بىلمەيدى. ال ەندى گەنەرال مەن بانكيردىڭ سۋرەتتەرىن سالىستىرعاندار، و توبا، ەكەۋىنىڭ ءبىر-بىرىنە قاتتى ۇقسايتىنىن دەمدە بايقاعان. «ايقاي اڭگىمە» گەنەرال-دەپۋتاتتىڭ دا قۇلاعىنا جەتكەن بولسا كەرەك، كەشە ءدال وسى سۇراققا ول كىسى دە « تەزىرەك قۇتىلايىنشى» دەگەندەي، قىسقا دا نۇسقا جاۋاپ قايتارىپ، قولىن ءبىر سىلتەدى. سونداعى ايتقان ايداي شىندىعى مىناۋ: «...وسى اڭگىمە شىققالى مەن ۇيقىدان ايىرىلدىم. قايداعى بىرەۋلەر تەلەفوندايدى ءتۇننىڭ ءبىر ۋاعىندا. تەلەفوندايدى دا، «بانكير ەرتاەۆ ءسىزدىڭ ۇلىڭىز با؟» دەپ سۇراي بەرەدى... سۇراي بەرەدى. قازىر مەن اڭگىمەنىڭ اشىعىن ايتىپ،  نۇكتەسىن قويىپ تاستايىن، ال سودان كەيىن مەنى بۇل ماسەلە بويىنشا مازالاماڭىزدار. قىسقاسى، بانكير جومارت ەرتاەۆتى مەن تانيمىن، بىراق بىزدەر تۋىسقان ادامدار ەمەسپىز. مەن ءتىپتى ونىڭ اناسىن تانىمايمىن دا. ونىڭ اناسىمەن ەشقاشاندا پويىزدىڭ ءبىر كۋپەسىندە جول جۇرگەن ەمەسپىن دە.  ءبىتتى. بۇدان باسقا ايتارىم جوق...»

ءومىرىنىڭ كوپ بولىگى اسكەر قىزمەتىندە بولعاندىقتان ۇيرەنىپ كەتكەن ادەت بولسا كەرەك، گەنەرال-دەپۋتات ۇزاق سويلەپ، ەشكىمنىڭ باسىن قاتىرمادى – وسىلاي دا وسىلاي دەپ ۇلكەندى-كىشىلى ەرتاەۆقا قاتىستى بۇرق-بۇرق ەتە قالعان ۇزىنقۇلاقتىڭ نۇكتەسىن نىعىزداپ تۇرىپ وسىلايشا قويىپ تاستادى. قويىپ تاستادى دا، قولىن ءبىر سىلتەپ – كەتتى دە قالدى. اڭ-تاڭ بوپ ءبىز قالدىق. جانە ءجاي قالعان جوقپىز، بىردەڭە-شىردەڭەنى تۇسىنبەي، جىندى بوپ قالدىق. ول تۇسىنبەگەنىمىز – ۇلكەن ەرتاەۆتىڭ «كىشى ەرتاەۆتىڭ شەشەسىمەن ءبىر كۋپەدە بولعان جوقپىن» دەگەن ءبىر اۋىز ءسوزى. اڭىرىپ قالدىق – «كۋپەسى نەسى؟» دەپ. ويرانى شىققان ويىمىزدا «گەنەرال ەرتاەۆ كۋپەدە نە بۇلدىرگەن؟» دەگەن جاۋابى تابىلماعان سۇراق جانە قالدى. بىلمەيمىز عوي، اسكەريلەردى تۇسىنۋدەن ابدەن قالعان سياقتىمىز، ءتارىزى..!

مارات ماداليموۆ.

Abai.kz