رينات, بىرىنشىدەن بايگەڭ قۇتتى بولسىن! بۇگىنگى جەڭىسىڭە قۋانىشتىمىز.  بۇرىنعى ايتىستارىڭدا ارتىق-كەم ايتىلعان شۋماقتارىڭ عالامتورعا تاراپ كەتكەلى سەن تۋرالى اڭگىمە كوبەيدى. مەملەكەتكە, ەلباسىعا, «نۇروتانعا» دۇشپان قىلىپ كورسەتكىسى كەلگەندەر دە بولدى. بۇگىن, مىنە, «نۇروتان» پارتياسىنىڭ قولداۋىمەن وتكەن ايتىستىڭ باس جۇلدەسىن يەلەندىڭ. سوندا ارالارىڭدا تاتۋلىق ورنادى ما?

رينات:  ارازدىق  بولدى دەۋدىڭ ءوزى ارتىق شىعار. مەن ارتىق-كەم ايقانىممەن جوعارعى بيلىكتىڭ تاراپىنان جاۋاپ رەتىندە ەشتەڭە ايتىلعان دا، جاسالعان دا جوق. ەگەر ناعىز دۇشپان كورىپ، وكپەلى بولسا  «جاۋاپ» بەرگىسى كەلسە بيلىكتىڭ كۇشى دە، قاۋقارى دا بار عوي. جوعارى جاقتان  «ريناتتى ايتىسقا قاتىستىرماڭدار» دەگەن بۇيرىق  كەلدى دەپ ءبىراز ايتىستان شەتتەتكەنى راس. بىراق كىم ءبىلىپ جاتىر، ول بۇيرىقتى كىم بەردى، قايدان بەرىلدى؟  مەن جوعارعى جاقتاعى كىسىلەردىڭ تويلارىندا دا، باسقا جيىندارىندا دا بىرگە بولىپ ءجۇرمىن، بىراق سولاردىڭ بىرەۋى ايتپايدى «رينات، سەنى ءبىز بوگەپ جاتىرمىز» دەپ.  بولماسا، جاسىراتىنى جوق،  كۇندە بولماسا دا، پرەزيدەنتپەن ايىنا ءبىر رەت كەزدەسەتىن ادامدارمەن دە ارالاسامىن. «سەنى ەلباسى جەك كورەدى» دەپ سولاردىڭ بىرەۋى ايتپايدى. بىراق وسى اڭگىمە قايدان شىعادى؟ قازاق «كۇرىشتىڭ ارقاسىندا كۇرمەك سۋ ىشەدى» دەيدى. بىرەۋدىڭ اتىن، ءىس-ارەكەتىن  پايدالانىپ، ءوزىنىڭ زاڭىن ورناتقىسى كەلەتىن ادامدار بار. سونداي ادامدار «جوعارعى جاق ايتتى» دەپ  قاراماعىنداعىلارعا بۇيرىق بەرەدى. ول بايقۇستار سوسىن شاپقىلاي جونەلەدى. قىسقاسى، دانەكەر بولۋدىڭ ورنىنا بالەكەر بولىپ وتىر.
مەنىڭ وسى جاۋابىمنىڭ دالەلى بۇگىنگى ايتىستا كورىندى. «نۇروتان» پارتياسى  توراعاسىنىڭ ءبىرىنشى ورىنباسارى باۋىرجان بايبەك اعامىزدىڭ ءوزى ايتىپ وتىر عوي «مەن بۇرىن ريناتتى تانىمايدى ەكەنمىن» دەپ. دەمەك، مەنى تانىمايتىن كىسىلەر مەن جايلى بۇيرىق بەرمەيتىنى اقيقات قوي.  بۇرىن اتىمدى ەستىگەن شىعار مۇمكىن، بىراق بۇگىن ساحنادا تانىسىپ وتىرمىز. مەن دە اشىعىن ايتتىم، «مەن ەشكىمگە جاۋ ەمەسپىن، ەلگە دۇشپان ەمەسپىن» دەپ. مەنىڭ  قۇداي بەرگەن جالعىز مەملەكەتىم بار. ول-قازاقستان!

    جالپى، تۋ، ەلتاڭبا، ءانۇران، ەلباسى دەگەن نارسەلەر مەملەكەتتىك سيمۆولدار عوي. ەگەر ءبىز ءوزىمىز تۇرىپ جاتقان ءۇيىمىزدى جاقسى كورەتىن بولساق وسى مەملەكەتتىك سيمۆولداردى سۇيۋگە دە، قۇرمەتتەۋگە دە مىندەتتىمىز! باسقا بىرەۋ بىزگە ءوزىنىڭ جاقسىسىن اكەپ بەرمەيدى.

         ەندى بۇعان دەيىن ءبىر-ەكى رەت مەن جايلى  تەرىس اقپارات تاراتقانداردىڭ جولى بولعان شىعار، بىراق ارنارسەنىڭ اق-قاراسى اشىلاتىن كەزى بولادى عوي.
بۇگىنگى ايتىس ماعان جۇلدەسىمەن ماڭىزدى ەمەس. مەنىڭ ىشىمدە جاتقان ايتسام دەپ جۇرگەن سوزدەرىمدى ايتقانىممەن، جانە سونى ەستىسە ەكەن دەپ جۇرگەن كىسىلەردىڭ  ەستىگەنىمەن ماڭىزدى بولدى.

دەگەنمەن، وسى ايتىستا ءتاتتى ايتقاندارىڭ دا، قاتتى ايتقاندارىڭ دا بولدى. «نۇروتان» پارتياسىنىڭ وكىلدەرى، دەپۋتاتتار شىمبايىنا باتسا دا تۇسىنىستىكپەن قابىلدادى. سەن دە كوپ نارسەگە ءتۇسىنىپ، ىمىراعا كەلىپ، ىڭعايعا كونگەنىڭ عوي؟

مەن ايتىسقا كەشە شىعا سالىپ، بۇگىن «جالماۋىز» بوپ كەتكەن جوقپىن. جەمىستىڭ ءوزى كوگەرەتىن ۋاقىتى بولادى، پىسەتىن ۋاقىتى بولادى، سوسىن ءشىريتىن ۋاقىتى بولادى. اقىننىڭ ويى دا سولاي. ءبىر ايتقاندا جەتپەسە، ەكى ايتقاندا جەتپەسە، ىشتە قالاي بولعاندا دا جەتكىزەم دەگەن وي پايدا بولادى. كەلە-كەلە مەندە ءبىر عانا ماقسات پايدا بولدى.  ول — مەنىڭ ەشكىمگە جاۋ ەمەس، دۇشپان ەمەس ەكەنىمدى دالەلدەۋ. سول جولدا ايتقان نارسەنى ءبىر ەستىمەگەسىن، قاتتى ايتقىڭ كەلەدى، ەكى ەستىمەگەسىن ودان دا قاتتى ايتقىڭ كەلەدى. بىرەۋگە قاتتى، بىرەۋگە اقىرىن تيەتىنىن ويلامادىم ەمەس، ويلادىم.

       ال، قازىر ورتاق مامىلەگە، ورتاق شەشىمگە كەلەتىن ۋاقىتتا  مەن ءوز تاراپىمنان كەتكەن قاتەلىكتەر ءۇشىن  جانە مەنىڭ سوزدەرىم قاتتى تيگەن كىسىلەردەن قورىققانىمنان  ەمەس، جالتاقتاپ، جاعىمپازدانعىندىقتان  ەمەس،  شىنايى تۇردە پەندەلىگىم پارمەن الىپ كەتكەن ساتتەرىم ءۇشىن كەشىرىم سۇراۋدان قاشپايمىن. ء«سوزىمنىڭ قىل سىيمايدى اراسىنا» دەگەن قۇلمامبەت سياقتى اقىنمىن دەپ ايتا المايمىن. مەنىڭ دە كەم تۇسكەن، ارتىق كەتكەن جەرلەرىم بولعانىن مويىندايمىن.

سوڭعى سۇراق، بۇگىنگى ايتىستا ەلباسىنىڭ اتىنا، «نۇروتان» پارتياسىنىڭ اتىنا ءبىراز جاقسى شۋماقتارىڭدى ارنادىڭ. وسىنىڭ بارلىعى ءوزىڭنىڭ جۇرەك ءسوزىڭ بە، جوق الدە ايتۋ كەرەك بولدى ما؟

         مەن بىرەۋدىڭ بۇيرىعىمەن ولەڭ ايتپايمىن.  ءوزىمنىڭ تۇرىپ جاتقان ءۇيىمدى مەملەكەتىمنەن، پرەزيدەنتىمنەن ءبولىپ قاراي المايمىن. ولاردىڭ بارلىعى ءبىر-بىرىمەن بايلانىستى نارسە.

   ءار بالا ءوزىنىڭ اكەسىنە دە ارىزىن ايتا الادى عوي. جوعارعى بيلىك باسىندا وتىرعان كىسىلەرگە   حالىقتىڭ اتىنان وكپە-نازىمدى ايتاتىن بولسام، ول – ءدال سونداي قاراقۇرىم حالىقتىڭ جەتكىزگىسى كەلەتىن ارمانى، نازى. ودان ارتىق ەشتەڭە جوق.

اڭگىمەڭىزگە راحمەت!              

AITYSKER.COM