استاپىراللا، «ارتى» دەگەنگە باسقاشا ويلاپ قالماڭىز – ءسىز ويلاعانداي جەرى ەمەس، ءسوز 20 مىڭدىق تەڭگەمىزدىڭ تۋ سىرتى جونىندە بولىپ وتىر. قاي ەلدە بولماسىن، كۋپيۋردىڭ ارتىن كاسىبي تىلدە «رەۆەرس» دەپ اتايدى ەكەن. ياعني، بەرگى بەتىنىڭ سىرتى – ەكىنشى جاعى.

مىنە، سول «ارتىنا» ءبىرىنىڭ ۇستىنە ءبىرىن باتتاستىرىپ، قيقى-جيقى سالىنعان سۋرەتتەر كولدەنەڭىنەن ءتۇسىپتى (سۋرەتتى قاراڭىز). بەتى – دۇپ-دۇرىس: ءبىر ءوزىنىڭ قۇرىلىس قۇنى ارقالىقتىڭ جىلدىق بيۋدجەتىنە پارا-پار اقوردا، ەل ىشىندە «بوچكا» اتالىپ كەتكەن مۇنارا تەكتەس بەيماعلۇم عيمارات، ءوسىپ تۇرعان اعاشتار، جازۋ-سىزۋى – ءبارى تىگىنەن تۇسكەن. ال ارتىنداعى «ماڭگىلىك ەلدىڭ» دالاداي داربازاسى، مۇندا نەعىپ جۇرگەنى بەلگىسىز ءتورت كەپتەر، انەۋ ءبىر باسىنا بۇركىت قونعان، ىعى-جىعى تەمىر-تەرسەك جاپسىرىلعان ستەللا، ءتىپتى قازاقتىڭ كوك تۋى – ءبارى-ءبارى جانتايىپ جاتىر. قاناتتى ات ويعا ويىسقان – قيعاشتاي پەرىپ كەلەدى.
قىسقاسى، تەڭگەنىڭ تۋ سىرتى نەگە تەرىس سالىنعان؟ سۋرەتتىڭ مۇنداي گرافيكالىق ورىندالۋىندا قانداي ساياسي استار بار؟ دوللاردى الىڭىز، رۋبلگە قاراڭىز، قىتاي ءيۋاننىڭ استارىن اۋدارىڭىز – بارلىق سۋرەتتەر مەن كەسىندەر تىگىنەن تىك تۇر. ەۆرو مەن تۋگريكتە، ريال مەن دەرحامدا بارلىق كەسكىن-كەلبەت قازاقتىڭ 20 مىڭدىق تەڭگەسىندەي ەمەس، جانتايىپ قاراۋدى قاجەت ەتپەيدى.
بالكىم، بۇل ءبىزدىڭ ەشبىر ەلگە ۇقسامايتىن دامۋىمىزدىڭ، وزىمىزگە عانا ءتان دەموكراتيامىزدىڭ بەلگىسى مە ەكەن: قيسايىپ قاراماساڭ، قوياسى قوپارىلمايتىن؟ الدە وسىلايشا ءبىز «قىرىق قاتىن – ءبىر جاق، قىڭىرى – ءبىر جاق» سيپاتتاعى قازاقتىڭ قيسىق مىنەزىن كورسەتۋگە تىرىستىق پا؟ بالكىم، وسى ىعى-جىعى سۋرەتتەردى تىگىنەن سالساق، قازەكەڭ قىزىققان 30 ەلگە ويقاستاماي تىگىنەن، توتەسىنەن تارتار ما ەدىك؟ 
ەرمۇرات باپي

Facebook-تەگى پاراقشاسىنان