2009 جىلدىڭ كۇز ايىندا "جەتىنشى" ارناعا ارنايى دەرەكتى فيلم تۇسىرمەك بولدىم. سول ارنانىڭ جەتەكشىسى بيبىگۇل نۇرعاليقىزى:
- بيبىگۇل، وسى سارى اۋليە دەگەن بار ەدى عوي. سول تۋرالى جۋرناليستىك زەرتتەۋ جاساساڭىز جاقسى بولار ەدى. - دەدى. 
ويلانىپ قالدىم. ءيا، ء"بىر كەزدەرى ەلدى دۇرلىكتىرگەن سول اۋليەسىماق قايدا جوعالىپ كەتتى؟" دەگەن سۇراق ميىمدى جەپ قويدى. ەرتەسىنە تەلەفونىن تاۋىپ الىپ، كەلەسى اپتاعا ءتۇسىرىلىم توبى باراتىن بولىپ، كەلىستىك. جانىما وپەراتور ەرنار، رەجيسسەر بوتاگوز، رەداكتور ماقپالدى الىپ، مارات يسەنباەۆتىڭ الماتى قالاسىنداعى ەكى قاباتتى ءزاۋلىم ۇيىنە باردىق. 
ءۇيدىڭ ءىشى قاراڭعى. كىشكەنتاي تەرەزەلەردەن تۇسكەن كۇننىڭ ساۋلەسىنەن عانا ادامداردى بايقاۋعا بولادى. شۇيكىمدەي عانا قارا كەمپىر الدىمىزدان شىعىپ، قارسى الدى. مارات شىعامىن دەگەنشە، ول كىسىنى سوزگە تارتتىم. باقسام، 90 جىلداردان بەرى وسى كىسىنىڭ وتىنىمەن كىرىپ، كۇلىمەن شىعادى ەكەن. 
- قانشا تولەيدى؟ وسى ۇيدە تۇراسىز با؟
- جوق. ءۇيىم باسقا جاقتا. تاڭعى ساعات 5-تە وسى اۋليەمنىڭ ۇيىنە كەلەمىن. كەيدە قونىپ تا قالامىن. ويبۋي، و نە دەگەنىڭىز، اقشا المايمىن. ءومىرىمنىڭ سوڭىنا دەيىن وسى كىسىگە تابىنىپ وتەمىن. 
- نە ءۇشىن؟! - دەدىم باجىرايىپ قاراپ.
- ايتا المايمىن…
وسى كەزدە ەكىنشى قاباتتان باسپالداقپەن مارات يسەنباەۆ ءتۇسىپ كەلە جاتتى. ۇستىنە شەيحتار سەكىلدى اپپاق كويلەك، باسىنا ورامالىن تاعىپ العان.
ونى كورگەن جانىمداعى اجەي ۇشىپ تۇرەگەلىپ، ءيىلىپ سالەم بەردى. بىزدەرمەن جايدارلانىپ امانداستى. ءۇيى سالقىنداۋ ەكەن. كابينەتىنە ءوزى باستاپ اپاردى. ارعى بولمەدەن كىشكەنتاي بالانىڭ داۋسى ەستىلگەنى سول ەدى، ءبىر ايەلدىڭ اتىن شاقىرىپ، قاتتى بارىنشا ايقايلاپ تاستادى. 
- ەشكىمنىڭ دىبىسىن شىعارۋشى بولما! - دەدى وكتەم داۋىسپەن. ءسويتتى دە، بىزدەرگە جىميىپ كۇلە بەردى. بىلمەيمىن، نەگە ەكەنىن جاقتىرماي قالدىم ىشتەي. كۇلىمسى يىستەن باسىم اۋىرا باستادى. جامان ءيىس سەزسەم، جۇرەگىم اينيتىنى بار. قالتامدا ماقپالدىڭ مانا بەرگەن اۋىلدىڭ قۇرتى بولعان. سونى اۋزىما سالىپ جىبەردىم. ۇستەلدىڭ ار جاعىندا ول، بەرگى جاعىندا مەن وتىرمىن. "پەتليچكانى" تاقتىق. سۇحبات باستالىپ كەتتى. ءبىر كەزدە اياعىم جىبىر ەتە قالدى. ۇستەلدىڭ استىندا مىسىق جۇرگەن بولار دەپ، ورنىمنان ىرشىپ ءتۇستىم. مىسىقتى جەك كورەتىنىم تاعى بار. بىراق مىسىق بايقالمايدى. سۇراقتارىمدى جاۋدىرىپ وتىرمىن. ول جاۋاپ بەرۋدە. تاعى اياعىم جىبىر ەتە قالدى. باقسام، اناۋ اۋليە جالاڭ اياعىمەن ۇستەلدىڭ استىندا اياعىما تيگىزىپ قويادى. جىنىم ۇستاپ كەتتى. الايدا اشۋلانامىن دەپ، ۇرتىمداعى قۇرتىما شاشالىپ قالدىم. جوتەلىم ءبىر توقتامادى. ونى كورىپ، بوتا، ەرنارلاردىڭ كوزدەرى اتىزداي بولىپ كەتكەن. سارى اۋليە بولسا:
- كوردىڭىزدەر مە، مەنىڭ قاسيەتىم سىزگە بارىپ جاتىر. ەندى كەرەمەت بولاسىز، - دەپ ءبوسىپ قويادى. وعان ماقپالدىڭ كوزى باقىرايىپ، اۋىزى اشىلىپ، سەنىپ وتىر. سۋ سۇراپ، بولمەدەن شىقتىم. بوتاگوز بولسا بايەك بولىپ جانىمدا ءجۇر. "سەندەر وزدەرىڭ تۇسىرە بەرىڭدەر" دەپ ىمدادىم. راس ايتام، ماناعى ىسىنەن كەيىن كورگىم جوق. مەنىڭ ويىم باستىسى ءۇن-ءتۇنسىز سۇحباتتى الىپ، ودان كەيىن وزىنەن مۇراعاتتاعى كاسسەتالارىن الۋ بولدى. ەندى زەرتتەۋىم كەرەك قوي.
ءتۇسىرىلىم توبىمەن قايتىپ بارامىز. ولارعا بولعان جايتتى ايتتىم. 
- وي، بىزدەر قايدان بىلەيىك. شوشىپ كەتتىك، - دەپ كۇلىسىپ جاتىر. جۇمىسقا كەلە سالىسىمەن مۇراعاتىندا جاتقان بۇكىل كاسسەتالارىن كورە باستادىم. STOP! 
ءبىر كاسسەتانى اينالدىرىپ تاعى قارادىم. ستاديون تولى ىعى-جىعى حالىق. قانار-قانار قاپتاعى سول كەزدەگى "سابان رۋبل" اقشالاردى ەر ادامدار كولىككە تيەپ جاتىر. نە دەگەن سۇمدىق اقشا دەسەڭشى؟ بارلىعىنان كۇلكىم كەلگەنى 20 شاقتى ايەلدەر مەن ەركەكتەر حالىقتىڭ ورتاسىندا شاشىراپ وتىر. سول كىسىلەر ءار قالاعا بارعان سايىن سارى اۋليەسىنىڭ شاشباۋىن كوتەرىپ، بارلىق جەردە ءجۇر. تەك ولاردىڭ شاشتارى بىرەسى تۇيىلگەن، الدە، جاۋلىق تاققان. كەي جەرلەردە جالعانعان شاش، الدە، قيىلعان. ال ەركەكتەر بولسا، ولاردا سولاي تۇرلەنىپ ءجۇر. تاعى ءبىر بايقاعانىم ول شالاجانسار بالانى الادى دا ايقايلايدى، ال، اناۋ جيىرما شاقتى نوكەرلەرى ويبايلاپ، شاشتارىن جۇلىپ، جەردى تەپكىلەپ جىلايدى. سارى اۋليەسىنە تابىنادى، اياعىنا جىعىلادى. ونى كورگەن قارا حالىق، سول جايتتى قايتالاپ جاسايدى. مىنەكەي، شوۋ؟! پارادوكس! وي، راحاتتانىپ بوتاگوز، ەرنار، ماقپال بارلىعىمىز كۇلدىك. كوزىمىزدەن جاس اققانشا كۇلدىك… 
بىراق، سول كەزدەگى مۇڭايىپ وتىرعان قازاعىمدى ايادىم. سوڭعى اقشاسىمەن الماتىنىڭ ستاديونىنا بيلەت ساتىپ الىپ كىرگەن ولار، اڭقاۋ، اڭعال ەدى...
مىنە، سىزدەردىڭ ءبىر كەزدەرى اۋىزدارىڭىز اشىلىپ، تامسانعان، تابىنعان "سارى اۋليە" كىسىلەرىڭىز وسىنداي. داعدارىس كەزىندە ۇپايىن تۇگەندەپ العان بۇل ادام، قازىر اقشاسىز وتىر ەكەن. ەرتەڭگى كۇنى تاعى اربالىپ قالماڭىزدار! الدىن-الا ساقتاندىرايىن دەگەن عوي مەنىكى...

بيبيگۇل داۋلەتبەكقىزى

Facebook-تەگى پاراقشاسىنان