مىنا ءبىر ماسەلەنى ارىپتەستەرىم مەن بەلگىلى ءبىر ادامداردىڭ سۇراۋى بويىنشا ورتالارىڭىزعا تاستاعالى وتىرمىن.

ايتپاعىم ءمايىتحانا ماسەلەسى ەدى. تورقالى توي، توپىراقتى ولىمسىز بولمايتىن مىنا ومىردە ءبارىمىزدىڭ باسىمىزعا كەلەتىن جاعداي عوي. پىكىر بولىسىڭىزدەرشى. قازىر ءدال وسى ماسەلە ەڭ ءبىر كۇيىپ تۇرعان ماسەلەنىڭ ءبىرى ەكەنى ەشكىمگە جاسىرىن ەمەس. راس قوي؟ كەشىرەرسىزدەر، ارينە. بىراق باسىنا تۇسكەندەرىڭىز جاقسى بىلەسىزدەر عوي. جاقىندا ءبىر جىگىتتىڭ اعاسى قايتىس بولىپ ەدى. ماسەلەنىڭ ءمان-جايىن ەستىپ توبە شاشىم تىك تۇردى. ءمايىتحانالاردىڭ توڭازىتقىشىندا ورىن جوق كورىنەدى. سول سەبەپتى ءمايىتتى مال قۇساتىپ ەدەنگە تاستاي سالادى ەكەن. ال اپتانىڭ سوڭىنا قاراي ولە كورمەڭىز! وندا ءبىتتى دەي بەرىڭىز. دۇيسەنبىگە دەيىن سول جەردە جاتقانىڭىز جاتقان! قۇدايىم ءوزى ساقتاسىن! وزەكتى جانعا ءبىر ءولىم. قانداي ولىممەن ولەرىمىز ءبىر اللاعا عانا ايان عوي. جاقىن تۋىسى جول اپاتىنان بولماسا قانداي دا ءبىر وقىس وقيعادان قازا تاپقان ادامداردىڭ ءمايىتتى الا الماي قان قاقساعانىن تالاي كوردىك. بۇل نە دەگەن سۇمدىق! ولىمگە ەرەكشە قۇرمەت كورسەتىپ، سوڭعى ساپارعا ارۋلاپ شىعارىپ سالاتىن، جانازاسىن شىعارماي جەرلەمەيتىن حالىقپىز عوي. قازاق ەجەلدەن ءولىمدى جونەلتۋگە ەرەكشە ءمان بەرەدى. ال وسىنى مايىتحاناداعىلار ابدەن پايدالاناتىن سياقتى. ونسىز دا قايعىدان قان جۇتىپ وتىرعان اعايىننىڭ قايتىس بولعان جاقىنىنىڭ دەنەسىن مايىتتەن ساتىپ الاتىنى بۇل كۇنى ەشكىمگە جاسىرىن ەمەس. (ونىڭ قۇنى 100 مىڭنان تومەن ەمەس كورىنەدى ەستىپ بىلۋىمشە) تەك سونى نەگە ەشكىم ايتپايدى؟ نەگە ەشكىم جۇمعان اۋزىن اشپايدى-ءا؟ ەڭ سوراقىسى دا سول، ءمايىتحانالار ادىلەت مينيسترلىگىنە قاراستى بولعاندىقتان بۇعان ىشكى ىستەر باسقارماسىنداعىلار دا ارالاسا المايدى ەكەن. ال ەندى ۇزاق ۋاقىت ءمايىتحانادا جاتىپ قالعان ادامنىڭ دەنەسى نە بولاتىنىن وزدەرىڭىز-اق ويلاي بەرىڭىزدەر. سوعان جەتكىزبەۋ ءۇشىن ادامدار مايىتحانالارداعىلاردىڭ سۇراعانىن بەرەتىنى دە تۇسىنىكتى. قازىر كەزدەيسوق كەلگەن اجالدان كوز جۇماتىندار ءوز الدىنا، ۇيىندە جاتىپ ءوز اجالىمەن ولگەندەردى دە مورگكە الىپ كەتەدى. مورگكە اكەتتى دەگەن ءسوز - ونى مىندەتتى تۇردە سويىپ تاستايدى دەگەن ءسوز. ال قايتىس بولعان تۋىسىمىزدى، ەت جاقىن ادامىمىزدى پىشاققا تۇسىرتكىزبەۋگە ءبىزدىڭ قاقىمىز بار ما؟ قانە، كىم جاۋاپ بەرەدى؟ جالپى وسى ءمايىتحانا ماسەلەسىن جولعا قوياتىن زاڭ بار ما بىزدە وسى؟ ونداعىلاردىڭ شەكتەن شىققان ارەكەتىنە توقتاۋ سالاتىن كىم بار؟ سوسىن تاعى ءبىر ماسەلە مەنىڭ ءھام سىزدەردىڭ دە ەرىكسىز كوڭىلدەرىڭىدى كۇپتى ەتەتىن شىعار. ءمايىتحانالاردا سويىلعان ادامنىڭ ىشكى اعزالارىن نە ىستەيدى ەكەن؟ قايدا جىبەرەدى ەكەن؟ الدە... قۇداي ساقتاسىن، مالدىڭ دا ىشەك-قارنىن تاستاي سالعاندى وبال كورەتىن قازاق ەمەس پە ەك؟ 

جانار ورازىمبەت

Facebook-تەگى پاراقشاسىنان