28 قازاندا قاراعاندى وبلىستىق سوتىندا احمەتوۆ ءىسى بويىنشا كۋاگەرلەردەن سوتتا جاۋاپ الۋ جالعاسىپ، قىلمىستىق ءىستىڭ باستى كەيىپكەرلەرىنىڭ ءبىرى – كاسىپكەر، «Eco-treatment systems» كومپانياسىنىڭ ديرەكتورى دۋمان نۇرباەۆ سوتقا تۇسىنىك بەردى. ءوز سوزىندە ول بيۋدجەت اقشاسىن ۇرلاۋ سىزباسىنا قاراعاندى وبلىسىنىڭ اكىمىنىڭ ەكس-ورىنباسارى عابيت مۇحامبەتوۆتىڭ بەلسەنە قاتىسقانىن جەتكىزدى. ايتا كەتەلىك، ءارى سوتتالۋشى ءارى كۋاگەر رەتىندە سوتقا دەيىنگى تەرگەۋدەگى جاۋاپتارىندا ول بۇل جايدى ايتپاعان بولاتىن.

سوت زالىندا ول 2010 جىلى «Eco-treatment systems» كومپانياسىن قالاي قۇرعانىن، 2011 جىلى «تسەنتر-ستروي كومپلەكت نس» جشس-ءنىڭ جالدامالى ديرەكتورى ە. اسانوۆپەن جانە قازاقستاندىق ونەركاسىپتىك كورپوراتسيانىڭ ۆيتسە-پرەزيدەنتى ءا.اقمولداەۆپەن قالاي تانىسىپ، ىسكەرلىك قارىم-قاتىناس ورناتقانىن اڭگىمەلەدى. ايتۋىنشا، ونىڭ ءوزى مەن كومپانياسىن قاراعاندى قالاسىنىڭ يندۋستريالدىق پاركىندەگى شارۋاشالىق-تۇرمىستىق سۋاعارلاردى تازالايتىن ستانتسيا جوباسىنا ءا.اقمولداەۆ شاقىرعان. ول بىردەن كەلىسىمىن بەرەدى. كەيىنىرەك د.نۇرباەۆتى قاراعاندى وبلىسى اكىمدىگىنىڭ عيماراتىندا وتەتىن جينالىسقا شاقىرادى. وبلىس اكىمىنىڭ ورىنباسارى ع.مۇحامبەتوۆ وتكىزگەن جينالىسقا ءا.اقمولداەۆ، ە.اسانوۆ، ا.ەسسە، ۆ.لەۆەن قاتىسىپ، تۇرمىستىق اعىن سۋلاردى تازالاۋ جۇيەسىن سالۋ ماسەلەسى تالقىلانادى. وسى باسقوسۋدا ع. مۇحامبەتوۆ چەح تەحنولوگياسىنان باس تارتىپ، «Eco-treatment systems» كومپانياسىنىڭ جوباسىن جۇزەگە اسىرۋدى ۇسىنادى. 

كۋاگەردىڭ ايتۋىنشا، بۇل ماسەلە الدىن-الا شەشىلىپ قويىپتى. ول وسى ماسەلە جونىنەن ع.مۇحامبەتوۆپەن بىرنەشە رەت كەزدەسكەن. سونداي كەزدەسۋلەردىڭ بىرىندە وبلىس اكىمىنىڭ ورىنباسارى وعان اتالعان نىسان بويىنشا كەلىسىم-شارتتىڭ قۇنىنىڭ 15 پايىزىن پارا ەسەبىندە بەرۋدى ۇسىنادى. بۇل وقيعانىڭ قالاي بولعانىن كۋاگەر بىلاي اڭگىمەلەپ بەردى: ء«بىر جولى ع. مۇحامبەتوۆتىڭ كابينەتىنە كىرگەنىمدە ول «Eco-treatment systems» كومپانياسىنا اتالعان جوبانى ىسكە اسىرۋدا قولداۋ كورسەتەتىنىن ايتتى. ءسويتىپ، ارتىنشا ماعان بەلگىلى ءبىر تالاپتار قويىلاتىنىن ەسكەرتتى. كابينەتىندە وتىرعان كەزىمدە ع. مۇحامبەتوۆ كەڭسە جيىنتىعىنان ءبىر پاراق قاعاز الىپ، وعان ءوزىنىڭ قولىمەن «15 پايىز» دەگەن ساندى جازىپ، قاعازدى مەنىڭ قولىما بەردى. ەگەر قوسالقى مەردىگەرلىككە كەلىسىم-شارتتى ەشقانداي قيىندىقسىز الامىن دەسەڭ، كەلىسىم-شارتتا كورسەتىلگەن قارجىنىڭ 15 پايىزىن ماعان بەرەسىڭ دەدى. مەن ءىستىڭ ءمان-جايىن بىردەن ۇقپادىم. سودان سوڭ  ع.مۇحامبەتوۆ ەگەر دە قويىلعان تالاپتارمەن كەلىسەتىن بولساڭ، قوسالقى مەردىگەرلىك كەلىسىم-شارتىن الاسىڭ دەدى. ماعان ويلانۋعا ۋاقىت بەرىلەتىنىن، بىراق جاۋاپتى كەشىكتىرمەۋدى جەتكىزدى. سول كەزەڭدەگى كومپانيانىڭ قيىن قارجىلىق جاعدايىن ەسكەرە كەلە، مەن ع. مۇحامبەتوۆتىڭ ۇسىنىسىمەن كەلىستىم».

د.نۇرباەۆتىڭ ايتۋىنشا، ع. مۇحامبەتوۆپەن كوپ كەزدەسۋلەرىنىڭ بىرىندە جوعارى لاۋازىمدى شەنەۋنىك ودان: «سەنىڭ كومپانياڭا جوعارىداعى لاۋازىمدى تۇلعالاردان كىم قولداۋ كورسەتەدى؟» دەپ سۇرايدى. ول: ء«بىز جوعارىداعى لاۋازىمدى تۇلعالاردىڭ ەشقايسىمەن بايلانىسىمىز جوق. تەك نارىقتىق قاعيداتتارمەن جۇمىس ىستەيمىز» دەپ جاۋاپ بەرەدى. سول كەزدە وعان ع. مۇحامبەتوۆ: «ولارمەن جۇمىس ىستەپ قالعان جاعدايدا ءبىزدىڭ ارامىزدا (اسىرەسە، قاراعاندى وبلىسىنىڭ اكىمى س. احمەتوۆتىڭ مۇددەسى) مۇددەلەردىڭ قايشىلىعى تۋىنداماۋى كەرەك» دەپ ەسكەرتەدى.

ءامينا باكىر

Abai.kz