Vlast.kz سايتىندا «سامۇرىق-قازىنا» اق باسقارۋشى ديرەكتورى دارحان كالەتاەۆتىڭ «يا منوگو دوۆەريايۋ ليۋديام» دەگەن اتپەن سۇحباتى شىقتى. ادەتتەگىدەي بۇل سۇحبات تا جەلىدەگى ۇيقىلى-وياۋ اتموسفەراعا جان ءبىتىرىپ، قىزۋ تالقىعا ءتۇسىپ جاتىر. كوممەنتاري بەرۋشىلەردىڭ مىنا ماسەلەدە پىكىرلەرى ءبىر اۋىزدان شىققانداي: سۇحبات بەرۋشىنىڭ ءسوزى شىنايى، ويى وتكىر، پوزيتسياسى ايقىن. مۇنى كالەتاەۆتىڭ كوزگە كورىنەتىن، «كورىنبەيتىن» وپپونەنتەرىنىڭ ءوزى دە مويىنداپ وتىر.
دارحانعا ادۆوكاتتىڭ كەرەگى جوق. بىراق، الەۋمەتتىك جەلىگە شولۋ جاساپ وتىرىپ، ونىڭ تانىمالدىعى نەگىزىنەن ءورىستىلدى كونتەنت اراسىندا ەكەنىن بايقادىق. ءتىپتى، كەيبىرەۋلەردىڭ «اسفالتتا وسكەن، قازاق ءتىلىن بىلمەيتىن، قازاق جانىن تۇسىنبەيتىن دارحان كالەتاەۆ سياقتىلار» دەگەن تىركەس ەزۋىمىزگە كۇلكى ءۇيىردى. ونى ءبىراز جىلدان بەرى بىلەتىن ادام رەتىندە پىكىرىمدى بىلدىرگەندى ءجون كوردىم.

دارحان كالەتاەۆ قاراپايىم قازاق اۋىلىندا، قازاق وتباسىندا وسكەن. قازاق بولعاندا دا جان-دۇنيەسىمەن، بولمىسىمەن، ءتىلى-دىلىمەن كادىمگى ءداستۇرلى قازاق. سوندىقتان شىعار، ول قىزمەتىن سوناۋ 90-جىلدارى، الماتىدا، ءتىل كوميتەتىندە قاتارداعى مامان بولىپ باستاعان. سودان بەرى ونىڭ قىزمەتى مەملەكەتتەگى يدەولوگيامەن، ءتىل، ءدىن، مادەنيەت سالاسىمەن بايلانىستى. سودان بەرى ول ءوز ۇستانىمىنان تانعان جوق.
جانە ءبىر-ەكى مىسال. ەستەرىڭىزدە بولار ءبىراز جىل بۇرىن بيلىك ەلگە تانىمال، مەملەكەتشىل ازاماتتاردى قىزمەتكە تارتتى. سونىڭ ارقاسىندا مەملەكەتتىڭ دامۋىنا، ۇلتتىڭ ويانۋى مەن وركەندەۋىنە باعىتتالعان يگىلىكتى جۇمىستار اتقارىلدى. مەملەكەتتەگى ۇلت، كادر ساياساتىنا، مەملەكەتتىك يدەولوگياعا قاتىستى قاداۋ-قاداۋ جوبالار جاسالدى. وسىنىڭ باسى-قاسىندا دارحان امانۇلى جۇرگەنىن بىرەۋ بىلسە، بىرەۋ بىلمەيدى.
سول جىلدارى مەملەكەت تاراپىنان جۇرگىزىلگەن ساۋاتتى يدەولوگيالىق ساياساتتىڭ ارقاسىندا قازاق اقپارات كەڭىستىگىندە دە جاڭا ءۇمىت، تىڭ سەرپىلىستەر باستالعانداي بولاتىن. جاڭا يدەيالار، جاڭا ادامدار، جاڭا باسىلىمدار پايدا بولدى. وسى ۋاقىتتا ءبىز قىزمەت ىستەگەن «جاس قازاق» گازەتى دە ەلدىڭ شىنايى ىقىلاسىنا بولەندى. ال، وسى باسىلىمدى جاۋىپ تاستاعىسى كەلگەن، جۋرناليستەرىن اتىپ تاستاعىسى كەلگەن ادامداردىڭ بولعانىن، سونداي قيىن ساتتەردە دارحان امانۇلىنىڭ قولداۋى مەن قورعاۋىن بارىنشا سەزىنگەنىمىزدى بۇگىن عانا ايتىپ وتىرمىز. قازىرگى قازاق اقپارات قۇرالدارىنىڭ باسىندا وتىرعان ءبىراز رەداكتور مۇنداي مىسالداردىڭ سان الۋانىن ايتىپ بەرەرىنە مەن كەپىل. مۇنى دا بىرەۋ بىلسە، بىرەۋ بىلمەيدى.
د.كالەتاەۆ «نۇر-وتان» پارتياسى توراعاسىنىڭ ءبىرىنشى ورىنباسارى بولىپ تاعايىندالعان كۇنى-اق قازاقستاندىق اقپارات قۇرالدارى جەتەكشىلەرىمەن كەزدەسكەنى، سول قىزمەتىندە ءجۇرىپ ءبىراز ۋاقىت قازاقستانداعى ساياسي ساحنانىڭ باستى سپيكەرى بولعانى ۇمىتا قويعان جوقپىز. ول ساياسي ساحنانىڭ سپيكەرى بولىپ قانا قويعان جوق، پارتيانىڭ جۇمىسىنا جان ءبىتىردى، وپپوزيتسيانى كەلىسىمدەر ۇستەلىنە وتىرعىزدى، كونسترۋكتيۆتى ديالوگتارعا جول اشتى.
زيالى قاۋىممەن دە ەتەنە ءتىل تابىستى، ادەبيەت، ونەر، مادەنيەت قايراتكەرلەرىنىڭ بىردە دوس-باۋىرىنا، بىردە قامقورشىسىنا اينالدى. كەيدە ءبىر تانىمال ازاماتتاردىڭ، بيزنەسمەندەردىڭ كىمگە نە بەرىپ، نە قويىپ جاتقانىن سانامالاپ وتىراتىن ادەتىمىز بار عوي. داكەڭنىڭ قولداۋ-كومەگى وسىلاردان كوپ بولماسا از ەمەس. بىرەۋ ءبىلىپ، بىرەۋ بىلمەس، بىراق مۇنى جازۋشىلار وداعىنىڭ توراعاسى نۇرلان ورازالين اعامىزدان اردا دوسىمىز مارالتايعا دەيىن بىلەدى.
كۇنى كەشە دۇنيەدەن وتكەن، قازاقتىڭ ۇلى اقىنى فاريزا اپامىزدىڭ گەرمانياعا ەم الۋعا بارا جاتقانداعى «دارحانتايعا سالەم دە، جاقسىلىقتار ۇمىتىلمايدى" دەپ وزىنە ءتان كەسەكتىكپەن ايتىلعان كەسىمدى ءسوزى ءالى مەنىڭ قۇلاعىمدا.
داكەڭنىڭ سوڭعى ۋاقىتتاعى قىزمەتى دە ەلدىڭ كوز الدىندا. ۇلتتىق سپورت تۇرلەرىن دامىتۋعا قارجى تاۋىپ شاپقىلاعانى، پاراليمپيالىق قوزعالىستىڭ، قازاقستاندىق مۇمكىندىگى شەكتەۋلى سپورتشىلاردىڭ جاعدايىن وڭداعانى، «استانا» ۆەلوكومانداسى، «استانا» فۋتبول كومانداسى، «استانا ارلاندارى»، «بارىس» - مۇنىڭ ءبارى حالىقتىڭ يگىلىگى، قۋانىشى، بىراق وسىنىڭ ارتىندا باسقارۋشى رەتىندەگى دارحان امانۇلىنىڭ دا ماڭداي تەرى جاتقانىن ەشكىم بىلمەسە دە سپورت جۋرناليستەرى ايتار.
پاراليمپيالىق ويىنداردان كەيىن ءومىرى جارىتىپ سىياقى الىپ كورمەگەن سپورتشىلارىمىزدىڭ استىنا مۇگەدەكتىك كولياسكاسىن ەمەس، ءبىر-ءبىر كولىك مىنگىزگەندەگى چەمپيوندارىمىزدىڭ كوزىنەن تامشىلعان جاس تا ءالى مەنىڭ كوز الدىمدا.
مۇنىڭ ءبارى «كالەتاەۆ سياقتى اسفالتتا وسكەن قازاقتار» دەگەن سوزدەن شىعىپ وتىر عوي. داكەڭە قاتىستى بۇل سۇراق ەندى ماڭىزىن جويعان شىعار دەپ ويلايمىن. اڭگىمە وسىدان شىعىپ وتىرسا دا، نەگىزگى ايتپاعىمىز باسقا.
قۇدايعا شۇكىر، قازىر الەۋمەتتىك جەلىدەگى قازاق كونتەنتى، قازاق الەۋمەتى ۇلكەن قوعامدىق بەلسەندى كۇشكە اينالىپ كەلەدى. پاسسيونارلىق، پراگماتيكالىق تابيعاتى بار وسى كۇش مەملەكەتكە، ۇلتقا، قوعامعا ادال قىزمەت ەتەتىن كەز كەلگەن ازاماتتى قولداپ، قورعاپ، جىگەرلەندىرىپ وتىرادى.
قاراپايىم حالىقتىڭ اراسىنان، قاراپايىم قازاقتىڭ وتباسىنان شىققان، قىزمەت، ساياسات ساحناسىنداعى عۇمىرىن تاۋەلسىزدىك جىلدارى باستاعان سونداي جاس ساياساتكەرلەردىڭ ءبىرى – دارحان امانۇلى كالەتاەۆ. بىزدىكى تەك وسىنداي ازاماتتار بىلمەستىك پەن سامارقاۋلىقتىڭ، ادىلەتسىز ايىپتاۋدىڭ، تاپسىرىسپەن جاسالاتىن شابۋىلداردىڭ توپان سۋىنىڭ استىندا قالىپ قويماسا ەكەن دەگەن تىلەك.

تالعات ەشەنۇلى.

Abai.kz