پرەزيدەنت ن.نازارباەۆتىڭ الماتىداعى ءىسساپارى بارىسىندا قازاق ءتىلى تۋرالى ايتقان سوزدەرى قوعامدا قىزۋ تالقىلانىپ، الەۋمەتتىك جەلى قولدانۋشىلارى ءتۇرلى فورمادا وزدەرىنىڭ قارسىلىقتارىن كورسەتىپ جاتىر. وسىعان وراي، ءبىز باتىس قازاقستان وبلىسى ادۆوكاتتار القاسىنىڭ مۇشەسى، زاڭگەر ابزال قۇسپاننان ءتىل ماسەلەسىن زاڭ تۇرعىسىنان ءتۇسىندىرىپ بەرۋىن سۇراعان ەدىك.

ابزال قۇسپان، زاڭگەر:

««قازاقستان رەسپۋبليكاسىنداعى تىلدەر تۋرالى» قازاقستان رەسپۋبليكاسى زاڭىنىڭ 11 بابىنىڭ تالاپتارىنا سايكەس، ازاماتتاردىڭ ارىزدارى مەن باسقا دا قۇجاتتارعا جاۋاپتار مەملەكەتتىك جانە مەملەكەتتىك ەمەس ۇيىمدارمەن مەملەكەتتىك تىلدە نەمەسە ارىز بەرىلگەن تىلدە قايتارىلادى. ياعني سول ارىزدى (شاعىم، ءوتىنىش، حات ت.ب.) قاراۋشى سۋبەكت، جاۋاپتى قاي تىلدە دايىنداۋ كەرەك ەكەنىن ءوزى انىقتايدى. ويتكەنى ول ارىزدارعا جاۋاپ دايىنداۋ بارىسىندا ءتىلدى تاڭداۋعا قۇقىلى، الايدا مىندەتتى ەمەس! وسىعان سايكەس نورمالار «زاڭدى جانە جەكە تۇلعالاردىڭ ارىزدارىن قاراۋ ءتارتىبى تۋرالى» قازاقستان رەسپۋبليكاسى زاڭىنىڭ 10 بابىمەن دە بەكىتىلگەن. الايدا، «قازاقستان رەسپۋبليكاسىنداعى تىلدەر تۋرالى» قر زاڭىنىڭ 4 بابىنا سايكەس - قازاقستان رەسپۋبليكاسىندا مەملەكەتتىك ءتىل بولىپ – قازاق ءتىلى تانىلادى، ءوز كەزەگىندە بارلىق دەڭگەيدەگى مەملەكەتتىك ورگاندار مەملەكەتتىك ءتىلدى جان-جاقتى دامىتۋعا مىندەتتى. سونىمەن بىرگە، اتالعان زاڭنىڭ 6 بابىنا سايكەس، ءاربىر ازاماتتىڭ ءوز انا تىلىندە اقپارات الۋعا قۇقىعى بار. سونىمەن بىرگە، سول زاڭنىڭ 9 بابىنا سايكەس، مەملەكەتتىك ورگانداردىڭ اكتىلەرى مەملەكەتتىك ءتىل – قازاق تىلىندە دايىندالىپ، قولدانۋى ءتيىس، باسقا تىلدەردە (سونىڭ ىشىندە ورىس تىلىندە) تەك قانا قاجەتتىلىك بولعان جاعدايدا عانا قولدانىلادى دەپ كورسەتىلگەن. جوعارىداعىلاردىڭ نەگىزىندە ازاماتتار مەن زاڭدى تۇلعالار تاراپىنان تۇسكەن ارىز-شاعىمدارعا جاۋاپتى، ولاردىڭ قاي تىلدە بەرىلگەنىنە قاراماستان، مەملەكەتتىك ءتىل – قازاق تىلىندە قايتارۋعا قۇقىلى ەكەندىگىڭىزدى بىلگەنىڭىز ءجون.

Abai.kz