اقتوبە وبلىسى قايىڭدى اۋىلىندا جارىق ءجيى ءوشىپ قالا بەرەتىندىكتەن ءوزى دە جازالانعان مۇعالجار اۋدانىنىڭ اكىمى سەرىك شاڭعۇتوۆ پەن ونىڭ ورىنباسارىنىڭ ۇيىنە جارىق قايتا بەرىلىپتى، - دەپ حابارلادى 31 ارنا.

ەستەرىڭىزدە بولسا، وبلىس اكىمى بەردىبەك ساپارباەۆ سەگىز جۇزدەن استام تۇرعىنى بار اۋىلعا  10 جىلدان بەرى دۇرىس جارىق تاراتپاعان اۋدان اكىمى مەن ورىنباسارىنا جازا رەتىندە،  ولاردىڭ دا ۇيىندەگى جارىقتى ءوشىرتىپ  تاستاعان ەدى. 

مۇعالجار اۋدانى قايىڭدى اۋىلىندا ون جىلدان بەرى  ەلەكتر جەلىسى جەكەمەنشىكتىڭ قاراماعىندا بولىپ،  جارىقتىڭ ءوشىپ قالا بەرەتىندىگىن ەستىگەن وبلىس اكىمى بەردىبەك ساپارباەۆ دەرەۋ سول اۋداننىڭ اكىمى مەن ورىنباسارىنىڭ ۇيىندەگى جارىقتى وشىرۋگە بۇيرىق بەرگەن ەدى. ال سول كۇنى اۋدان اكىمى  جەكە مەكەمەمەن كەلىسسوزدەر جۇرگىزىلۋدە دەپ اقتالعان.

 سەرىك شاڭعۇتوۆ، مۇعالجار اۋدانىنىڭ اكىمى:

- جىلۋ ەنەرگيا دەگەن مەكەمە كەزىندە جەكەگە العان. سولارمەن كۇندە تاڭەرتەڭ مەنىڭ ورىنباسارىم ەكەۋمىز ايتىسىپ، مەنشىككە بەرمەي تۇر. ىلعي ساۋدالاسۋ، ارامىزدا سونداي قيىندىقتار بار.

بىراق، ەسەپتى جينالىستان سوڭ، اكىم مەن ورىنباسارى ۇيلەرىندەگى جارىقتىڭ ءسوندىرىلۋىن سۇراپ، ءتيىستى مەكەمەگە وزدەرى ارىز جازىپتى. سودان سوڭ، ولاردىڭ جارىقتارى قيىلعان. بىراق، قاراڭعىدا وتىرۋ اكىمدەرگە جاققان-جاقپاعانىن بىلە المادىق. ال، ساپارباەۆتىڭ ءوز قاراماعىنداعىلارعا وسىلايشا جازا قولدانۋ ءستيلىن حالىق  قولداپ  وتىر.

وسى كۇنگە دەيىن قايىڭدى اۋىلىنداعى ەلەكتر جەلىسىنە جاۋاپتى بولىپ كەلگەن مەكەمە باسشىسى وسى ماۋسىمدا جارىق تەك بەس رەت ءسوندى. ونىڭ ءوزى بوران كۇندەرى اۋا-رايىنىڭ قولايسىزدىعىنان عانا بولعان جاعدايلار. قازىر قايىڭدى اۋىلىندا جارىق بار دەيدى.

ارمان جىلكەلدى ،  «جەممۇنايەنەرگو» جشس ديرەكتورىنىڭ مىندەتىن اتقارۋشى:

- قاراستىرىلىپ جاتىر. اكىمشىلىك جاعىنان اۋدان اكىمشىلىگى جاعىنان سول سۇراقتارعا بايلانىستى شارا جاساپ جاتىر. ءبىزدىڭ وعان قارسىلىعىمىز جوق. وبلىس اكىمىنىڭ كوتەرگەن ساۋالى دۇرىس، ءبىز ەشقانداي قارسى ەمەسپىز. قايتا ريزامىز.

 بىراق بۇل جەكە مەكەمە وسى كۇنگە دەيىن بالانستا بولعان جەلىنى بەلگىلى ءبىر سوماعا بەرەتىندىگىن ايتتى. ەندى ەكى جاق كەلىسسوز جۇرگىزىپ، ورتاق كەلىسىمگە كەلۋى ءتيىس. ال، وبلىس اكىمىنىڭ ءباسپاسوز قىزمەتى شەنەۋنىكتەردىڭ 2-3 كۇن عانا جارىقسىز وتىرعانىن ايتتى.

اباي-اقپارات