شوكين بۇل تۋرالى 7 اقپان كۇنى ۋكراينالىق "ينتەر" تەلەارناسىنا بەرگەن سۇحباتىندا ايتتى. ونىڭ سوزىنشە، يانۋكوۆيچكە قاتىستى قىلمىستىق ءىستى تەرگەۋ اياقتالدى. شوكين بۇعان قوسا، ۋكراينا شىعىسىنداعى قارۋلى قاقتىعىس اياقتالعان سوڭ، يانۋكوۆيچ جاۋاپقا تارتىلادى دەگەن ءۇمىتى بار ەكەنىن ءبىلدىردى.

كيەۆتەگى تاۋەلسىزدىك الاڭىنداعى (مايدان) نارازىلىق اكتسيالارى 2013 جىلى 21 قاراشا كۇنى، يانۋكوۆيچ ۇكىمەتى ەۋروپا وداعىمەن اسسوتسياتسيا تۋرالى كەلىسىمگە قول قويۋدى كەيىنگە قالدىرعان سوڭ باستالعان. 2014 جىلدىڭ قاڭتارى مەن اقپانىندا بەلسەندىلەر مەن ميليتسيا قاقتىعىستى. ۋكراينا دەنساۋلىق ساقتاۋ مينيسترلىگى مالىمەتى بويىنشا، قاقتىعىستاردان 105 ادام مەرت بولعان. ۋكراينانىڭ قازىرگى بيلىگى يانۋكوۆيچتى "دەمونسترانتتارعا وق اتۋعا بۇيرىق بەردى" دەپ ايىپتايدى. يانۋكوۆيچتىڭ ءوزى كىناسىن مويىندامايدى. بۇعان دەيىن BBC-گە بەرگەن سۇحباتىندا ول 2014 جىلى اقپاندا بولعان وقيعالارعا جاۋاپكەرشىلىكتى "بيلىكتى باسىپ الماق بولعان راديكالدارعا" ارتقان.

ۋكراينا باس پروكۋرورىنىڭ مايدانداعى كىسى ولىمىنە قاتىستى تەرگەۋ اياقتالدى دەگەن مالىمدەمەسىنە قاراماستان، قازىرگە دەيىن بۇل ءىس بويىنشا بىردە-ءبىر سوت ۇكىمى شىققان جوق.

اباي-اقپارات