“اقتوبە” فۋتبول كلۋبىنىڭ باس ديرەكتورى دميتري ۆاسيلەۆ قازاق ءتىلىن ۇيرەنە باستادى. بۇل جايىندا ءوزىنىڭ Facebook پاراقشاسىندا مەرەي قۇپجان مالىمدەدى دەپ جازادى كەرەك-ينفو.

ونىڭ ايتۋىنشا، ولاردىڭ ماقساتى – شىلدەگە دەيىن قازاق تىلىندە ەركىن سويلەۋ.

“رەسمي: «اقتوبە» فك باس ديرەكتورى دميتري ۆاسيلەۆ بۇگىننەن باستاپ قازاق تىلىنەن ساباق الا باستادى. ۇستازى - مىنا مەن! ۋاقىتىنىڭ تىعىزدىعىنا قاراماستان، مەملەكەتتىك ءتىلدى ۇيرەنۋگە بەل شەشە كىرىسكەن ول ەكى ساعاتتىق ءبىرىنشى دارىستەن تاماشا كورسەتكىش كورسەتۋدە. كوفەسىنەن ءدام تاتقىزعان باسشىعا ديماش دەگەن قازاقشا ات قويىپ تا ۇلگەردىم. ماقسات — شىلدەگە دەيىن ونى قازاقشا سايراتۋ. ساتتىلىك ساعان، ديماش!”، - دەپ جازادى مەرەي قۇپجان.

ەسكە سالا كەتەيىك، ۆاسيلەۆ “اقتوبەنىڭ” باس ديرەكتورى بولىپ وتكەن جىلدىڭ جەلتوقسان ايىندا تاعايىندالدى. ونىڭ الدىندا مىناداي ماقساتتار تۇر: ول فۋتبول ورتالىعىنىڭ جۇمىسىن ءتيىستى دارەجەدە ۇيىمداستىرۋ قاجەت، كلۋبقا اقشا تۇسىرەتىن قوسىمشا پايدا كوزدەرىن تابۋ كەرەك، سونىمەن قاتار جانكۇيەرلەرمەن جۇمىستى جانداندىرۋى ءتيىس.

مۇنىڭ الدىندا ول قازاقستان فۋتبول فەدەراتسياسىنىڭ باس مەنەدجەرى قىزمەتىندە ءجۇردى.

Abai.kz