سارسەنبى, 1 ءساۋىر 2020
قوعام 3624 0 پىكىر 5 قاڭتار, 2016 ساعات 15:26

ەاەو: قازاقستاندىقتاردىڭ 22%-دان استامى جۇمىسسىز

قازاقستانداعى جۇمىسسىزدار سانى 2015 جىلدىڭ قورىتىندىسى بويىنشا 58,2 مىڭ ادامنان اسىپ جىعىلعان. 2014 جىلى بۇل كورسەتكىش 47,8 مىڭ ادامدى قۇراعان. ەۋرازيالىق ەكونوميكالىق كوميسسيا قورىتىندىسى بويىنشا، 2015 جىلى قازاقستانداعى جۇمىسسىزدار سانى 21,7%-عا ارتقان. بۇل تۋرالى abai.kz پورتالى LS سايتىنا سىلتەمە جاساي وتىرىپ حابارلايدى.

ەۋرازيالىق ەونوميكالىق وداق كوميسسياسى جۇرگىزگەن زەرتتەۋدىڭ ناتيجەلەرى بويىنشا ەاەو-عا مۇشە ەلدەردە 2015 جىلى جۇمىسسىزدار سانى  15,5%-دان اسىپ،  1,17 ملن. ادامدى قۇراعان.

ەستەرىڭىزدە بولسا، 2015 جىلدىڭ قازان ايىنىڭ قورىتىندىسى بويىنشا، ەلىمىزدەگى جۇمىسسىزدار سانى 62,2 مىڭ ادامنان اسقان بولاتىن. وسىلايشا، اينالدىرعان ەكى ايدىڭ ىشىندە بۇل كورسەتكىش ايتارلىقتاي جاقسارىپ، جۇمىسسىزدار تۋرالى دەرەك 6,4%-عا قىسقارعان ەكەن.

2015 جىلدىڭ قورىتىندىسى بويىنشا، ەۋرازيالىق ەكونوميكالىق وداق اۋماعىندا تەك قىرعىزستان رەسپۋبليكاسىندا عانا وڭ كورسەتكىشتەر مەن تۇراقتى ديناميكا ورىن العان.قىرعىزستاندا وتكەن جىلى جۇمىسسىزدار سانى  3,6%-عا قىسقارىپ،  56,3 مىڭ ادامدى قۇراپتى.

ال بەلورۋسيادا جۇمىسسىزدار سانى كەرىسىنشە ارتقان. 2014 جىلمەن سالىستىرعاندا باتكا باسقاراتىن ەلدە جۇمىسسىزداردىڭ سەرمي كورسەتكىشى 23,6 مىڭنان 43,2 مىڭعا ارتقان.

سونداي-اق، ارمەنيا مەن رەسەيدە بۇل كورسەتكىش 15,7%-دى قۇراپ، 76,5 مىڭ ادام جانە 14,5% بەن 941 ادام جۇمىسسىزدار قاتارىن تولىقتىرعان.  

بۇل ەۋرازيالىق كونوميكالىق وداقتىڭ وتكەن جىلداعى تىنىمسىز ءارى قاجىرلى ەڭبەگىنىڭ ناتيجەسى بولسا كەرەك.

جالپى، قازىرگى تاڭدا ەۋرازيالىق ەكونوميكالىق وداققا قارسى قوعامدىق ورتادا پىكىرلەر كەرەعار دەسەك جالعان ايتپاعان بولار ەك. ەۋرازيالىق وداققا قوسىلعان قازاقستان ەكونوميكاسى نە ۇتتى، نە ۇتىلدى؟ بۇل دا ءبىر رەتى كەلىپ،  وداعايلانىپ تۇرعان جالقى سۇراق.

2015 جىلدىڭ جالپى قورىتىندىسى بويىنشا، شەكەمىزدىڭ شىلقىپ، جىرتىعىمىزدىڭ جامالعانى شامالى. بۇل تۋرالى ءبىز وسىعان دەيىن دە جازعان بولاتىنبىز.

وسىنىڭ الدىندا قر دەنساۋلىق ساقتاۋ جانە حالىقتى الەۋمەتتىك قورعاۋ ءمينيسترى تامارا دۇيسەنوۆا حانىم ەلىمىزدەگى الەۋمەتتىك وسال توپتاعىلاردىڭ سان.ى 1 ميلليون ادامعا دەيىن ارتۋى مۇمكىن دەگەن بولاتىن. ارادا كوپ ۋاقىت ۇزاعان جوق. «ەلدەگى  بۇرىنعى كەدەيلەردىڭ قاتارىنا تاعى دا 1 ملن كەدەي قوسىلاتىن بولدى» دەپ شۋلاستىق.

 «...نەگىزگى ازىق-تۇلىك تۇرلەرىنە باعانىڭ كوتەرىلۋىنەن كەلىپ، ءبىز وسال توپتاعى ادامدار سانى ارتادى دەپ كۇتەمىز. ولاردىڭ سانى 1 ملنعا جەتەر دەپ ويلايمىز»، – دەدى ت. دۇيسەنوۆا حانىم. وندا ايتىلعان «وسال توپ» دەگەنىمىز كىمدەر؟ ءمينيستردىڭ مايموڭكەلەپ، «وسال» دەگەنى – كادىمگى كەدەيلەر. ولار وزدىگىنەن «وسال» بولايىن دەگەن ادامدار ەمەس، ەل بيلىگى جۇرگىزگەن سىڭارجاق ساياساتتىڭ سالدارىنان كەدەيلىكتىڭ كەبىن كيگەن حالىق. بۇگىندە مۇنداي «وسال» حالىقتىڭ ناقتى ستاتيستيكاسى جوق. ولاردىڭ قاتارىنا ەندى، ەۋرازيالىق ەكونوميكالىق كوميسسيا قوسىپ بەرگەن تاعى 22 پايىزدى ۇستەمەلەڭىز.

ەگەر رەسمي دەرەكتەردىڭ دەگەنىن مولشەرگە الار بولساق، بۇل ساناتقا قازاقستانداعى الەۋمەتتىك قورعاۋسىز قالعان حالىقتى جاتقىزۋعا بولادى. ولاردىڭ رەسمي ستاتيستيكاسى 700 مىڭ ادامعا جۋىق. بۇل ساناتقا 500 مىڭعا جۋىق جۇمىسسىزداردى تولىعىمەن قوسساق، «وسالداردىڭ» ورتا سانى 1,2 ميلليونعا جەتىپ جىعىلادى. راس، مينيستر حانىم شىنىن ايتتى.

ەستەرىڭىزدە بولسا، مەملەكەت باسشىسىنىڭ ءوزى بۇگىنگى ەكونوميكالىق ءھام كۇنكورىس احۋالىنا قاتىستى،  «قازىرگى جاعدايدا قاراپايىم حالىقتىڭ ءال-اۋقاتىن ۇمىتپاۋ قاجەت. بۇگىن الەم بويىنشا 1,5 ميللياردقا جۋىق ادام كۇنىنە ءبىر-اق دوللارعا ءومىر سۇرەدى. ال شامامەن 2,5 ميلليارد ادام ءبىر كۇندە 2 دوللاردان دا از اقشا الادى. بۇل – جەر-جاھانداعى حالىقتاردىڭ 40 پايىزى. افريكا مەن ازيانىڭ كوپتەگەن ەلدەرى وسىنداي پروبلەماعا تاپ بولىپ وتىر»،-دەگەن ەدى.

ستاتيستيكا اگەنتتىگىنىڭ ەسەبىنە قاراعاندا، ەلىمىزدە الەۋمەتتىك جاردەم اقى   الاتىن ادامدار سانى 100 مىڭعا دا جەتپەيدى.
ءيا، ەگەر  مۇنداي كەرى كورسەتكىشكە جەتىپ وتىرعان قازاقستاندا جىلىنا 100 ميلليون تونناعا جۋىق مۇناي وندىرىلەتىنىن ەسكەرسەك، ەلدىڭ ەكونوميكالىق ساياساتى ەشقانداي سىن كوتەرمەيدى دەگەن ءسوز. ءدال وسى جاعدايدا كارىم ءماسىموۆتىڭ ۇكىمەتى داعدارىسقا قارسى جوسپار جاساۋعا ەندى عانا كىرىسكەنىن ەسكە الساق، «وسال» كۇنىمىزگە دە زار بوپ قالار كەزىمىز كەلىپ قالعانىن سەزەمىز.

نۇرگەلدى ابدىعانيۇلى

Abai.kz 

0 پىكىر