قاھارماننىڭ وتباسى نەگە قاڭعىرىپ ءجۇر؟

1986 جىلعى جەلتوقسان كوتەرىلىسىنە قاتىسقانى ءۇشىن اتۋ جازاسىنا كەسىلگەن تورتەۋ (سولدان وڭعا): ەرتاي كوپەسباەۆ، تۇگەلباي تاشەنوۆ، قايرات رىسقۇلبەكوۆ، قايىرگەلدى كۇزەمباەۆ سوت ۇكىمىن كۇتىپ تۇر. الماتى، 16 ماۋسىم 1987 جىل. (يۋري بەككەر تۇسىرگەن سۋرەت)

جەلتوقسان كوتەرىلىسىنە قاتىسقانى ءۇشىن اتۋ جازاسىنا كەسىلگەن (كەيىن ول ۇكىم وزگەرتىلدى) ءتورت ازاماتتىڭ ءبىرى – ەرتاي كوپەسباەۆتىڭ وتباسى جوقشىلىقتىڭ ازابىن تارتۋدا. قارالى 86-نىڭ قىسىندا قايرات رىسقۇلبەكوۆپەن بىرگە قىزىل يمپەرياعا قارسى شىققان كوپەسباەۆتىڭ بالا-شاعاسى ءالى كۇنگە باسقانىڭ بوساعاسىن ساعالاپ، ءۇيسىز-كۇيسىز ءجۇر.

كەدەيلىك ابدەن تيتىقتاتقان ازامات وسى جىلعى اقپان ايىندا جۇرەك تالماسى ۇستاپ، كەنەتتەن كوز جۇمعان. ارتىندا قالعان وتباسى جالعىز اسىراۋشىسىنان دا ايىرىلىپ، بۇگىندە مۇشكىل تىرلىك كەشۋدە. ال وتاعاسىنان ايىرىلعان وتباسىنىڭ باسپانا نەمەسە جەر الام دەپ تۇرعان كەزەگىنىڭ جىلجيتىن ءتۇرى جوق. ارتىندا قالعان جارى ايبارشىن كوپەسباەۆا ەكى بالاسىمەن دالادا قالىپ، ەندى كىمنەن كومەك سۇرارىن بىلمەيدى.

ەسكە سالا كەتەيىك، ەرتاي كوپەسباەۆتى اتۋ جازاسىنا كەسۋ تۋرالى ۇكىم شىققان سوڭ، بەس جىلدان كەيىن اقتالدى. اقتالعانى بولماسا، ءوزىن سوتتاتقان كەڭەستىك-قازاقستاندىق وكىمەتتەن كورگەن كومەگى جوق. قاراپايىم اۆتوبۋس جۇرگىزۋشىسىنىڭ جەكە باسپانا الۋعا دا مۇمكىندىگى بولماعان. بالا-شاعاسىمەن جيىرما جىل بويى كىسى ەسىگىن ساعالاپ كەلىپتى. سويتە ءجۇرىپ، تالعار قالاسىندا ءۇي كەزەگىنە تۇرعان ەكەن. بىراق سول كەزەگى 14 جىلدا 27 ورىنعا عانا جىلجىپتى.

وسىدان ون بەس جىل بۇرىن، 2000 جىلدان باستاپ، تالعار قالاسىنىڭ اكىمدىگىنە كەزەككە تۇرعانىمەن، قۇجاتتارى جوعالىپ كەتىپ، 2006 جىلى ايعاي-شۋمەن قايتادان كەزەككە الىنادى. ال وتاعاسى ەرتاي كوپەسباەۆ قايتىس بولعانىنا بايلانىستى ونى ءۇي سالۋ ءۇشىن جەر الۋعا تىركەلگەن تىزىمىنەن دە الىپ تاستاعان. جەلتوقسانشى ەرىنىڭ كەزەگىن قۋدالاعان ەرتايدىڭ ايەلى ايبارشىننىڭ بارماعان جەرى، باسپاعان تاۋى جوق. بىراق وعان قايىرىلىپ قارار پەندە بولماي تۇر. جەسىر ايەلدىڭ ەندىگى جەردە ءۇي تۇگىلى، جەردىڭ ءوزىن تالاي جىل كۇتۋىنە تۋرا كەلەتىن سياقتى. تۇرمىسى كۇن ساناپ تۇرالاپ بارا جاتقان وتباسى ەندى داعدارىستىڭ تاۋقىمەتىنە تاپ بولدى.

قىزىل يمپەريانىڭ قىسپاعىنا قاسقايا قارسى تۇرعاندا، رۋحى سىنباعان ازاماتتىڭ ارتىندا قالعان بالا-شاعاسى. تاۋەلسىزدىك العان ەلدىڭ بيلىگىنەن گورى، حالىقتان كومەك سۇراۋعا ەرىكسىز ءماجبۇر بولۋدا. قولداۋ كورسەتىڭىزدەر، اعايىندار!

ءبىر توپ جەلتوقساندىقتار:

 م.حابيبۋللا، ز.تولەشوۆا،

ا.يحلاسوۆا، س.جاناباەۆا، ع.ابۋلحاتينا

رەداكتسيادان: مىناۋ قىمباتشىلىق قىسپاعىندا قالعان حالىق تاراپىنان جەلتوقسانشى قاھارماننىڭ وتباسىنا كومەك جاسار ادام تابىلار-تابىلماسى نەعايبىل. دەگەنمەن، بيىلعى جىلى تالدىقورعان مەن قاسكەلەڭ قالالارىندا تۇل جەتىمدەرگە پاتەر ءبولىپ، يماندى ءىس قىلعان الماتى وبلىسىنىڭ اكىمى اماندىق باتالوۆتىڭ قۇلاعىنا وسى حاتتا جازىلعان جانايقايى جەتەر دەگەن ويدامىز. ەگەر اتۋ جازاسىنا كەسىلگەن اردا ازاماتتىڭ ارتىندا قالعان وتباسىنا كومەك جاسايمىن دەۋشى اعايىن بولسا، مىنا قالتافوندار ارقىلى حابارلاسۋعا بولادى:

 8-771-409-56-26, 8-777-245-28-65. 

 «وبششەستۆەننايا پوزيتسيا» (پروەكت «DAT» №43 (314) وت 10 دەكابريا 2015 گ.