اقمولا وبلىسىنىڭ باسشىسى سەرگەي كۋلاگين قازاقستاندا اكىمدەردىڭ رەيتينگىسىن جاسايتىن مەرزىمدى كەمىندە جارتى جىلعا سوزۋ كەرەك دەگەن ويىن ءمالىم ەتتى دەپ حابارلايدى قازاقپارات.

ء«بىزدىڭ، اكىمدەردىڭ جۇمىسىنداعى ءبىرىنشى ءارى باستى كريتەري - ستاتيستيكالىق مالىمەت، ياعني الەۋمەتتىك كورسەتكىش پەن ەكونوميكالىق كورسەتكىشتىڭ ءوزارا تەڭ قاتىناسى. ەكىنشى كريتەري - ءوز وڭىرىندەگى قوعامدىق-ساياسي جاعداي، وبلىس حالقىنىڭ ءال-اۋقاتى. مىنە، جۇمىسىمىز وسى كريتەريلەر بويىنشا باعالانسا، دۇرىس رەيتينگ بولادى دەپ ويلايمىن. ايتپەسە، كەيبىر اگەنتتىكتەر ء«وڭىر باسشىسى مىنانداي شارا وتكىزدى، مىنانداي كىسىلەرمەن كەزدەسەدى» دەپ اقپارات تاراتادى دا اكىم ءبىرىنشى نەمەسە ەكىنشى ورىنعا شىعادى»، - دەيدى سەرگەي كۋلاگين اقمولا وبلىسىندا وتكىزگەن ءباسپاسوز ءماسليحاتىندا.

سونداي-اق، كۋلاگيننىڭ ايتۋىنشا، اكىمدەردىڭ رەيتينگىسىن ءبىر ايدىڭ قورىتىندىسى بويىنشا جاساۋ - تەرىس. رەيتينگ جاسايتىن ەڭ از مەرزىم - جارتى نەمەسە تولىق ءبىر جىلدى قۇراۋى كەرەك.

ء«بىر ايدا رەيتينگ جاساۋ مۇمكىن ەمەس. كەمىندە، جارتى جىل مەرزىمدى قامتۋ كەرەك. مىنە، وسى ۋاقىتتا جاسالعان رەيتينگ دۇرىس دەپ سانايمىن»، - دەدى كۋلاگين.

ايماق باسشىسىنىڭ ايتۋىنشا، اكىمدەردىڭ رەيتينگىسىن جاساعان دۇرىس، ويتكەنى، رەيتينگ - اكىمدەر اراسىندا باسەكەلەستىك ورناتادى.

«ارىپتەستەرىمنىڭ اراسىندا ءتىپتى «كىم مىقتى» دەگەن جارىس باستالادى. مەن دە ءوڭىرىم ءۇشىن  نامىسقا تىرىسامىن. باسقا وبلىستى باسقارىپ وتىرعان اكىمدەردەن ارتتا قالعىم كەلمەيدى»، - دەيدى كۋلاگين.

Abai.kz