سايلاۋدان سوڭ، مۇعالىم نەگە جىلادى؟
كەشەگى ءماجىلىس پەن ءماسليحات سايلاۋىن بيلىك وكىلدەرى قانشا جەردەن ءادىل جانە زاڭبۇزۋشىلىقسىز ءوتتى دەگەنىمەن، ءبىر ادامنىڭ بىرنەشە رەت داۋىس بەرۋى، جاشىككە بيۋللەتەندەردى توپتاستىرىپ سالۋ سىندى زاڭسىزدىقتار از ورىن العان جوق. مۇنداي جايتتاردى قاراپايىم تۇرعىندار بەينەكامەراعا ءتۇسىرىپ، ينتەرنەتكە جۇكتەپ جاتتى، دەپ حابارلايدى SN.kz.
ال، شىمكەنتتە دە ءدال وسى سايلاۋ كۇنى №935 سايلاۋ ۋچاسكەسىندە قازاق ءتىلىن كەمسىتۋ سەكىلدى زاڭسىزدىق ورىن الدى دەيدى جەرگىلىكتى مۇعالىمدەردىڭ ءبىرى. ونىڭ ايتۋىنشا، داۋىس بەرۋگە كەلگەن ايەل قازاق مۇعالىمدەرىن ورىس ءتىلىن بىلمەگەنى ءۇشىن ابدەن بالاعاتتاپ، ن.نازارباەۆتىڭ «ورىسقا ورىسشا جاۋاپ بەر» دەگەن ءسوزىن ەستەرىنە ءتۇسىرىپتى.
«داۋىس بەرۋگە كەلىپ جاتقاندا كەلەڭسىز وقيعاعا تاپ بولدىم. انىعىن ايتقاندا، ورىس ۇلتىنىڭ ازاماتى ءبىزدىڭ مۇعالىمدەرگە «سەندەر ورىسشا بىلمەيسىڭدەر، ورىسشا سويلەي المايسىڭدار. جۇمىستارىڭدى بوساتىڭدار. نەگە وتىرسىڭدار، نازارباەۆ سەندەرگە نە ايتتى؟» دەگەن سياقتى وكتەم-وكتەم سوزدەر ايتىپ، ءبىزدىڭ نامىسىمىزدى جەرگە كىرگىزەردەي بولدى… «سەن كىمسىڭ، سەنى جۇمىستان شىعارۋ كەرەك. سەن ورىسشا سويلەي المايسىڭ دا، بىلمەيسىڭ دە» دەگەن سياقتى اڭگىمەلەر ايتتى. سايلاۋعا كەلىپ، وسىنداي نامىسىم تاپتالعانىنان مەن قورلانىپ بارا جاتىرمىن… بۇل قالاي ەندى؟ مەن وعان ەشقانداي ارتىق ءسوز ايتپاسام، بىلگەنىمىزشە ايتىپ جاتىرمىز. ەندى ءبىز قازاق مەكتەبىندە قازاق ۇلتىن تاربيەلەپ وتىرىپ، مەن نە ءۇشىن اناعان دا، مىناعان دا ورىسشا سويلەۋىم كەرەك؟» دەيدى اشىنعان مۇعالىم كوزىنە جاس الىپ.
«ەل ەل بولا الماي جاتقان كەزدە، قازاق قازاق بولا الميا جاتقان كەزدە مەن نە ءۇشىن ءتىلىمدى بۇرمالاپ ورىسشا ايتۋىم كەرەك؟! ونىڭ پىكىرىنشە، مىنا جەردە وتىرعان مۇعالىمدەردىڭ ءبارى مۇعالىمدىككە لايىق ەمەس ەكەنبىز، ويتكەنى ورىسشا بىلمەيمىز. سوندا ءبىزدىڭ ءوز ۇلتىمىزدىڭ بالالارىن قازاقشا تاربيەلەۋگە قۇقىمىز جوق پا؟ قاتتى نامىسىما ءتيدى. ءبىز ەندى بۇل ماسەلەنى ايتىپ كىمگە شاعىمدانا الامىز؟ ەل اعالارى بار، «نۇر وتان» بار، بۇل ماسەلەنى شەشۋى كەرەك. ەگەر وسىلاي اركىمنەن تەپەرىش كورە بەرسەك وندا قازاق ءتىلىنىڭ ولگەنى بۇل» دەيدى قازاق مۇعالىمى.
ەستەرىڭىزگە سالايىق، جىل باسىندا الماتىعا ءىس-ساپارمەن بارعان مەملەكەت باسشىسى نۇرسۇلتان نازارباەۆ باس پروكۋراتۋراعا ورىسشاعا قازاقشا جاۋاپ بەرگەن مەملەكەتتىك قىزمەتكەرلەردىڭ ءبارىن جۇمىستان قۋ كەرەك دەگەن تاپسىرما بەرگەن بولاتىن. ەلباسىنىڭ بۇل سوزىنە قازاقتىلدى قوعام الەۋمەتىك جەلىلەر ارقىلى جاپپاي نارازىلىق بىلدىرگەننەن كەيىن اقوردانىڭ ءباسپاسوز حاتشىسى داۋرەن اباەۆ نازارباەۆتىڭ ايتقانىن باسقاشا تاپسىرلەپ بەردى.
كەشەلى بەرى الەۋمەتتىك جەلىلەردە تومەندەگى وڭتۇستىك قازاقستان وبلىسىندا تۇسىرىلگەن ۆيدەو-جازبا تالقىعا ءتۇسىپ، ءتۇرلى پىكىرلەردىڭ ايتىلۋىنا سەبەپكەر بولىپ جاتىر. ۇستاز ادامنىڭ جانايقايى جوعارعى جاقتاعىلاردىڭ قۇلاعىنا جەتسىن دەگەن نيەتپەن اتالعان ۆيدەونى نازارلارىڭىزعا ۇسىنىپ وتىرمىز.
