قوستانايعا تىزەگە جەتەر قار جاۋدى. سايلاۋ بولعان كۇنى ەرتەمەن جاڭبىر بولىپ باستالعان كەيىس قاباق فايل-بۇلت اقىرى بۇلقان-تالقان بولىپ بۇزىلىپ، ناۋرىزدىڭ اقشاقارىنا ۇلاستى. مەزگىلسىز جاۋعان قار بولدى. ادامدار ارەكەتىندەگى «مەزگىلسىزدىككە»تابيعات انادان قاتقان جاۋاپ سىندى ما قالاي؟ بارىنەن ناۋرىز مەيرامىن كيگىز ءۇي تىگىپ قارسى الاتىن جۇرتقا قيىن بولدى.

مەرەكەلەۋ بار، مەرەكەنىڭ ۇستىندە اياعىنان تىك ءجۇرىپ قىزمەت ەتەتىندەر بار دەگەندەي. ناۋرىزدى ارقا وڭىرىندە دالادا ءۇسىپ-توڭىپ قارسى الۋدى دوعارايىق دەپ ايتىپ ءجۇرمىز. كيگىز ءۇي تىگىپ، جۇرتتى كوشەگە شاقىرىپ، قارسى الۋ مىندەتتى ەمەس. بۇل ءداستۇر كەڭەس ۇكىمەتى ىدىراي باستاعان ۋاقىتتا العاش وتكىزگەن ناۋرىزدان باستالىپ ەدى...

قىس مەزگىلى كەتكىسى كەلمەي، قارسىلىق جاساپ جاتقان سەكىلدى. بىراق ءبارىنىڭ دە ءوز ۋاقىتى بار. ۋاقىتى توقتاعاندار – بۇل دۇنيە تورىنەن دە، وزگە دە ساحنادان دا كەتەدى. كەتپەيمىن دەپ قاسارىسقان قاھارلى قىستى ەركە كوكتەم ىعىستىراتىنى ءسوزسىز. جادىراعان جاز دا كەلىپ، ارقانى كەڭگە سالارمىز...

قوستانايدا بيىل قار كوپ. «كوپ» دەپ ايتىپ كۇپىرلىك قىلمايىق. قازاق جەرى جاۋىن-شاشىنعا مالشىنعان ولكە ەمەس. كوپتىك ەتپەيدى. كوكتەن تۇسكەن جاۋىن-شاشىن – جەردىڭ ىرىزدىعى. كوپ قار بىرتىندەپ تالىپ ەرىپ، جەرگە سىڭەر. سودان، بالكىم، ەگىن بىتىك شىعار، ەلدىڭ ىرىزدىعى ارتار. بىراق تاسقىن بولىپ، توپانسۋ قاپتاۋى ابدەن مۇمكىن. جىلداعى قاراپايىم حالىق «جىلايتىن» ماسەلە. سودان قاۋىپتەنەمىز. حالىقتىڭ شۇيلىگەتىن ءبىر ادامى بار ەدى. تەگى دە «قۇدىرەتتىڭ» اتىمەن اتتاس نەمەسە ونىڭ و جاق، بۇ جاعىندا. سول بوجكو حالىقتىڭ اتىنان تۋرا سايلانۋ ارقىلى دەپۋتاتتىققا كەتىپ، بيىلعى تاسقىننىڭ «رەنىشىن» تۋرا قابىلدامايتىن بولدى. بوجكونى «بوگ» ساقتاپ قالدى...

كەشە جاۋعان ناۋرىزدىڭ اقشاقارىن جامىلعان قوستاناي ۇلىستىڭ ۇلى كۇنى مەرەكەسىن تويلاپ كەتتى. قالانىڭ ورتالىق الاڭىنا ءبىلىم وردالارى، ءوندىرىس پەن مەكەمەلەر، سان ءتۇرلى ۇلتتاردىڭ مادەنيەت وشاقتارى ناۋرىزدىڭ رامىزىندەي بولىپ قالىپتاسىپ قالعان كيگىز ۇيلەردى سامساتىپ تىككەن. قازاق كيگىز ۇيلەرىنىڭ جانىندا ۇلتتىق كيىم كيگەن جانداردىڭ قاراسى كوپ. ناۋرىز اق قار، كوك مۇزعا ورانىپ كەلگەنىمەن، «تابيعاتتا رەڭسىز راي جوق» دەپ قابىلدايتىن، كوكتەمنىڭ «ەسىك قاعىپ» تۇرعانىن تۇسىنەتىن جۇرتشىلىقتىڭ كوڭىلى كوتەرىڭكى. وبلىس باسشىلىعى دا ءوز تىلەكتەرىن جولداپ ۇلگىردى. ۇلىستىڭ ۇلى كۇنى مەرەكەسىن قالا تۇرعىندارىمەن بىرگە قارسى الۋ ءۇشىن ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى احاڭ اتىنداعى كيگىز ءۇي تىگىپ، ءان ايتىپ، جىر توگۋدە. ناۋرىز قۇتتى بولسىن، اعايىن!

 الماس ابسادىق. قوستاناي

Abai.kz