اپەللياتسيالىق القا سوتىنا تورايىمدىق ەتكەن سۋديا سۆەتلانا ياكوۆلەۆا قاۋلى 24 ناۋرىزدا شىعارىلىپ، سول كۇنى كۇشىنە ەنەتىنىن جاريالادى.

ەسكە سالا كەتەيىك، رەسەيشىل كوزقاراسىمەن تانىمال 38 جاستاعى بلوگەر ەرمەك تايشىبەكوۆ 11 جەلتوقساندا قورداي اۋداندىق سوتىنىڭ شەشىمىمەن Facebook'تە جاريالاعان جازبالارى ءۇشىن ۇلت ارازدىعىن تۋعىزدى دەپ ءتورت جىلعا باس بوستاندىعىنان ايىرىلعان. ول قازىر تاراز قالاسىنىڭ تەرگەۋ يزولياتورىندا.

تايشىبەكوۆتىڭ ءوزى كوزقاراستارىنان قىلمىستىق بەلگىنى بايقامايتىنىن ايتىپ، وزىنە تاعىلعان ايىپتىڭ ساياسي استارى بار دەپ بىلەدى. ول اپەللياتسيالىق سوتتان وزىنە شىعارىلعان سوت شەشىمىن وزگەرتۋىن سۇراعان. ول سونىمەن بىرگە جوعارعى سوت توراعاسى قايرات ماميدەن ءوزىن بوساتۋىن سۇرايدى. بۇل جونىندە iarex.ru سايتىندا ونىڭ حاتى جاريالاندى. تايشىبەكوۆ جوعارعى سوتقا دەيىن جەتىپ، ءوزىنىڭ كىناسىزدىگىن دالەلدەيمىن دەيدى.