يسلام ءدىنى مۇسىلمان ەر مەن ايەلدەرگە اۋرەتىن جاۋىپ، شاريعات ادەبى بويىنشا كيىنۋدى مىندەتتەگەن. ۇيدەن تىس، قوعامدىق ورىنداردا ۇزىن ەتەك-جەڭدى كيىم كيىپ، ورامال تارتۋ مۇسىلمان ايەلدىڭ ارى مەن ابىرويىن ساقتايدى.

قاسيەتتى قۇراندا اللا تاعالا: «ۋا، پايعامبار! جۇبايلارىڭا، قىزدارىڭا جانە يمان كەلتىرگەندەردىڭ ايەلدەرىنە ايت: ۇستەرىنە جاۋلىقتارىن جامىلسىن...» («احزاپ» سۇرەسى، 59-ايات) دەپ بۇيىرعان.

اياتتا كيىمنىڭ ءتۇسى نەمەسە ۇلگىسى انىق ايتىلماعان. سوندىقتان ءار ۇلت، ءار مادەنيەت وكىلدەرى اللانىڭ ءامىرىن ءوز ۇستانىمدارى، تاريحي تانىم-تۇسىنىكتەرى بويىنشا ورىندايدى.

قازاقستان مۇسىلماندارى ءدىني باسقارماسى ەلىمىزدەگى مۇسىلمان قىز-كەلىنشەكتەر مەن ايەلدەردى كيىم كيۋ ۇلگىسىندە قازاق حالقىنىڭ سالت-داستۇرلەرىن ساقتاي وتىرىپ، جيناقى كيىنۋگە كەڭەس بەرەدى. كوزگە ەرسى كورىنەتىن، دەنە ءبىتىمىن ايقىندايتىن، قارا ءتۇستى كيىم-كەشەكتەردى پايدالانباعان دۇرىس. ال پارانجا (نيقاب) كيۋ – سالتىمىزدا بولماعان. بۇل – اتا-بابالارىمىزدىڭ ۇستانعان جولى ەمەس.

ءبىز مۇسىلماندار مەن اتا-انالاردى وقۋ ورىندارىنىڭ مەكتەپ وقۋشىلارىنىڭ كيىم ۇلگىسىنە قاتىستى قويىلاتىن تالاپتارىنا تۇسىنىستىكپەن جانە سابىرلىقپەن قاراۋعا شاقىرامىز. بۇل ماسەلەنى ۋشىقتىرۋ دۇرىس ەمەس. ويتكەنى ەلىمىزدە ورامالعا تۇبەگەيلى تىيىم سالىنباعانىن ءتۇسىنۋىمىز كەرەك. تەك ورتا مەكتەپتەردە كيىم ۇلگىسىن بىرىزدىلىككە ءتۇسىرۋ ماقساتىندا شەشىم قابىلدانعان.

كونستيتۋتسياعا سايكەس ەلىمىز زايىرلى مەملەكەت بولىپ تابىلادى، وندا ازاماتتاردىڭ ار-وجدان بوستاندىعىنا ەركىندىك بەرىلگەن. سونىمەن قاتار، ء«دىني قىزمەت جانە ءدىني بىرلەستىكتەر تۋرالى» زاڭدا ءدىني بىرلەستىكتەردىڭ مەملەكەتتىڭ قىزمەتىنە ارالاسپايتىنى كورسەتىلگەن. اتالعان زاڭدا ەلىمىزدەگى ءبىلىم بەرۋ جانە تاربيەلەۋ جۇيەسى ءدىن مەن ءدىني بىرلەستىكتەردەن بولىنگەندىگى جانە زايىرلى سيپاتتا بولاتىندىعى ايتىلعان.

ءدىندار ازاماتتار قوعامنان بولەك ءومىر سۇرمەيدى. دىنىمىزدەگى بويۇسىنۋ – نەگىزگى مىندەتتەردىڭ ءبىرى. سوندىقتان مۇسىلماندار زاڭعا قۇرمەتپەن قارايدى.

ەلىمىزدىڭ زاڭنامالارى بىزگە بالالارىمىزدىڭ ورتا ءبىلىم الۋىن قامتاماسىز ەتۋىمىزدى مىندەتتەيدى. بىلىمسىزدىك بۇلىككە باستايتىنىن ۇمىتپايىق. سوندىقتان قىز بالانىڭ تولىققاندى زايىرلى ءبىلىم الۋىنا نازار اۋدارۋعا كەڭەس بەرەمىز.

ءدىني باسقارما قىزدارىمىزدىڭ داستۇرىمىزگە ساي، ۇزىن ەتەك، ۇزىن جەڭ كيىم كيىپ، ورامال تارتىپ، يناباتتى بولىپ ءجۇرۋىن تىلەيدى. وسى رەتتە مەكتەپ اكىمشىلىكتەرى مەن قوعامدىق كەڭەستەرىنەن جەرگىلىكتى مەكتەپتەردە كيىم ۇلگىسىن قابىلداۋدا مۇسىلمان جاماعاتىنىڭ تىلەگىن ەسكەرۋدى سۇرايدى.

اللا تاعالا ەلىمىزگە بەرەكە، حالقىمىزعا بىرلىك ءناسىپ ەتسىن! ءامين!

قازاقستان مۇسىلماندارى ءدىني باسقارماسى