قر-نىڭ پرەمەر-ءمينيسترى كارىم ءماسىموۆ 14 شىلدە كۇنى موڭعولياعا ىسساپارمەن بارادى، - دەپ حابارلايدى kaznews سايتى.

ۇكىمەت ۇيىنەن اتتاپ باسپايتىن "ماڭگىلىك" پرەمەرىمىز سوڭعى كەزدەرى بەلسەنە باستادى. ايماقتارعا شىعىپ، وتىرىكتى-شىندى حالىقپەن كەزدەسىپ، تىنىم تاپپايتىن ىسكەر شەنەۋنىكتىڭ وبرازىنا كىرە باستادى. 

وسى ورايدا كەشە عانا بايان-ولگەي ايماعىندا 700-دەي قازاق باسپاناسىز قالىپ، 100-دەن اسا ءۇيدىڭ قيراعانىن جازا كەلىپ:

"بايان-ولگي ايماعىنداعى قازاقتارعا كومەك بەرۋدە قازاقستان ۇكىمەتى دە قاراپ قالماۋى ءتيىس! جەر بەتىندەگى قازاقتاردىڭ جالعىز وتانى – قازاقستان! ال، شەتەلدەگى ءار قازاق بالاسى قيىن-قىستاۋ كەزدە قازاقستان بيلىگىنىڭ قامقورلىعىن سەزىنۋى ءتيىس! سوندىقتان، ءبىزدىڭ ۇكىمەت موڭعولياداعى قانداستارىمىزعا ارنايى كومەك ۇيىمداستىرۋى شارت! بۇل – ەلدىكتىڭ، اسىرەسە، ۇكىمەت ءوزى كوپ ايتاتىن بىرلىكتىڭ كورىنىس تاباتىن تۇسى! ال، ۇكىمەتتىك جانە قوعامدىق كومەكتى ۇيىمداستىرۋدا دۇنيەجۇزى قازاقتارى قاۋىمداستىعى ۇيىتقى بولسا، قۇبا-قۇپ. سەبەبى، بۇل ۇيىمنىڭ توراعاسى قر پرەزيدەنتى ن.نازارباەۆ ەكەنىن ەسكەرسەك، ەلباسىنىڭ اتىنان قانداستارعا جىلۋ جيناپ، سونى ۇيىمداستىرىپ، جەتكىزىپ بەرۋ، قاۋىمداستىقتىڭ مىندەتى" دەپ جازعان ەدىك.

سونى ءماسىموۆ قۇلاققا ءىلدى مە ەكەن، ايتەۋىر ءىسساپار اياسىندا ەرتەڭ بايان-ولگەي ايماعىنا ايالداپ، ورتالىق الاڭدا قالىڭ كوپشىلىكپەن كەزدەسۋ ۇيىمداستىرادى-مىس. بۇل تۋرالى ايماق اكىمىنىڭ ءباسپاسوز قىزمەتى حابارلاعان.

قوش! كارىم ءماسىموۆ ۇكىمەتى شەتتەگى قانداستارعا قول ۇشىن سوزىپ جاتسا، العىستان باسقا ايتارىمىز جوق. بىراق، قىزىلاعاشتى جارىلقاماعان ءماسىموۆ بايان-ولگەيلىك اعايىنداردى ۇشپاققا شىعارادى دەگەنگە سەنە المايمىز؟ 

ءبىزدى ۋايىمداتاتىنى تىم باسقا دۇنيە... قالىڭ موڭعولدىڭ ورتاسىندا وتىرىپ، ءوز انا ءتىلىن ۇمىتپاعان اعايىنمەن پرەمەر-مينيستر قاي تىلدە سويلەسەدى؟ ساناسى تاۋەلسىز قازاق اعايىن ءورىستىلدى ءماسىموۆتى قالاي قابىلدايدى؟ بەلگىسىز. ءبارىن ەرتەڭ كورە جاتارمىز. 

ا، ايتپاقشى قر-نىڭ پرەمەر-ءمينيسترى  ۋلاانبااتار قالاسىندا بولاتىن ازيا -  ەۋروپا فورۋمىنىڭ XI – سامميتىنە قاتىسۋعا بارا جاتقانىن ەسكەرتە كەتەيىك.

ءبىر وقپەن ەكى قويان اتۋدىڭ شەبەرى بولىپ بارا ما، ءماسىموۆ مىرزا!

ءشارىپحان قايسار

Abai.kz