سارىارقانىڭ توسىندە سارى قىمىز ساپىرىپ، بابادان كەلە جاتقان اتا كاسىپتى جانداندىرعان «ساعىپ» شارۋا قوجالىعىن ءوڭىر تۇرعىندارى عانا ەمەس، كورشىلەس ەلدەردىڭ تۇتىنۋشىلارى دا جاقسى بىلەدى. دەرتكە - شيپا، جانعا - قۋات ۇلتتىق سۋسىن -  قىمىز ءوندىرىسىن وركەندەتۋ جولىندا تەر توگىپ جۇرگەن «ساعىپتىقتاردىڭ» تاسى بۇل كۇندە ورگە دومالاپ تۇر.

شارۋا قوجالىعىنىڭ باسشىسى تولەۋ قۇشمانوۆانىڭ ايتۋىنشا، اتا كاسىپتى جانداندىرۋ تۋرالى يدەيا توقسانىنشى جىلدارى ويعا كەلگەن. ويلاعان دۇنيەسىن سوڭىنا دەيىن تىندىرماي تىنشىمايتىن ول العاشىندا ءۇش بيە بايلايدى. قىمىزدى پاۆلودار قالاسىندا ساتادى.  بۇدان كەيىن بيە سانىن ارتتىرىپ، قىمىز ءوندىرىسىن مىقتاپ قولعا الدى. ادال ىستە بەرەكە بولاتىنىن ءتۇسىنىپ وسكەن تولەۋ كوكەشقىزى كاسىبىن زامان تالابىنا ساي دامىتۋدى كوزدەيدى. ءسويتىپ، پاۆلودار قالاسىنىڭ ماڭىنان جەر تەلىمىن ساتىپ الدى. ء شوپ باسقان الاڭدا كەشىكپەي قۇرىلىس جۇمىستارى باستالادى.  بۇگىندە بۇل جەردە بيە ساۋاتىن قورا-جاي، مال بورداقىلايتىن ورىن جانە قىمىزدى ساقتاپ، ونى شىنى شولمەكتەرگە قۇياتىن ارنايى قۇرال-جابدىقتار ورنالاسقان تسەح بار. مۇنداعى جۇمىسشىلار دا ءوز ءىسىن ىجداھاتتىلىقپەن اتقارادى.

شارۋاشىلىقتاعى قامبار اتا تۇقىمىنىڭ سانى 400-تەن اسقان.  بۇدان بولەك، جۇزدەن اسا ءىرى قارا بار.

- شارۋاشىلىقتى قۇرعاندا مەندە ءبىر عانا ارمان بولدى. ول – قازاقتىڭ قىمىزىن تورىمىزگە شىعارىپ، الەمگە تانىتۋ.  مەملەكەت قولداۋىمەن وسى ارمانىما بىرتىندەپ قول جەتكىزىپ كەلەمىن.  بۇگىندە قىمىزدى نەمىستەر دە وندىرۋدە. بىراق، ءبىز ولاردىڭ الدىنا ءتۇسۋىمىز كەرەك. قازاقتىڭ سارى قىمىزىن ەۋروپاعا ايگىلەۋ كەرەك، - دەيدى ت.قۇشمانوۆا.

وسىلايشا، وسىدان ون شاقتى جىل بۇرىن نەبارى ءۇش بيە ساۋعان تولەۋ كوكەشقىزى بۇگىندە ءىرى كاسىپورىننىڭ يەسى. تاۋلىگىنە 1 تونناعا جۋىق قىمىز وندىرەدى.

- وبلىستىق كاسىپكەرلەر پالاتاسى وكىلدەرىنىڭ كومەگىمەن «بيزنەستىڭ جول كارتاسى - 2020» مەملەكەتتىك باعدارلاماسى بويىنشا نەسيە الىپ، كاسىبىمىزدىڭ اياسىن كەڭەيتتىك. وتاندىق قانا ەمەس، كورشىلەس ەلدەردىڭ دە نارىعىنا جول اشىلدى. پالاتا قىزمەتكەرلەرى ءاردايىم قولداۋ مەن كومەك كورسەتىپ، ءىسىمىزدىڭ العا باسۋىنا قول ۇشىن سوزىپ كەلەدى،-دەيدى شارۋا قوجالىعىنىڭ باسشىسى.

شىنىمەن، بۇگىنگى كۇنى «ساعىپتىڭ» ونىمدەرى شەكارانىڭ ارعى جاعىنداعى تۇتىنۋشىلاردىڭ دا جوعارى باعاسىن الىپ ۇلگەردى.  پاۆلودارلىق كاسىپورىننىڭ قىمىزى مەن قۇرتى رەسەي جانە قىتاي مەملەكەتتەرىندەگى ساۋدا ورىندارىندا ساتىلىمعا شىعارىلدى. ءتىپتى، رەسەي استاناسى ماسكەۋ قالاسىندا «ساعىپ» شارۋا قوجالىعىنىڭ باستاماسىمەن «باۋىرساق» دۇكەنى اشىلعان بولاتىن.  مۇندا قىمىزدان بولەك، ۇلتتىق تاعامدارىمىز ساتىلادى.

سونىمەن قاتار، بىرىككەن اراب امىرلىكتەرىنەن ءبىر توننا قىمىز جەتكىزۋگە تاپسىرىس الدى.  وسىلايشا، قازاقتىڭ ۇلتتىق سۋسىنى الىس جانە جاقىن شەتەلدەردى باعىندىرۋدا. بىلتىر قوجالىق يتاليانىڭ ميلان قالاسىندا وتكەن ەحرو-2015 كورمەسىنە قاتىسىپ، ءونىمدى الەم جۇرتشىلىعىنىڭ نازارىنا ۇسىنىپ ەدى.

ون جىلدان استام ۋاقىتتا «ساعىپتىڭ» باعىندىرعان بەلەستەرى بۇل عانا ەمەس. وسى ۋاقىتقا دەيىن شارۋاشىلىق استانا قالاسىندا وتكەن «قاراوتكەل» كورمەسىنىڭ التىن مەدال يەگەرى،  ياكۋتياداعى «قىمىز  قۇدايلار سۋسىنى» حالىقارالىق بايقاۋىنىڭ جەڭىمپازى اتانىپ، 2013 جىلى «قازاقستاننىڭ ەڭ ۇزدىك تاۋارى» بايقاۋىندا ءۇشىنشى ورىندى ەنشىلەگەن. مارتەبەسى بيىك، باسەكەلەستەر سالماقتى «التىن ساپا» رەسپۋبليكالىق بايقاۋىندا دا جۇلدەگەر بولدى.

وسىلايشا، زاماناۋي قۇرالدار كومەگىمەن، الەمدىك تالاپتارعا ساي قىمىز وندىرەتىن «ساعىپ» شارۋا قوجالىعى بيىك شىڭداردى باعىندىرىپ كەلەدى.

الداعى ۋاقىتتا دا تىنىمسىز ءارى ادال ەڭبەك جەمىسىن بەرىپ، قازاقتىڭ قىمىزىنا الەمدىك سۇرانىس ارتادى دەگەن ءۇمىت زور.

قۇندىز قابىلدەنوۆا

Abai.kz