«ەگەمەن قازاقستان» لانكەستىڭ جاقتاۋشىسىن ۇلگى ەتىپ وتىر ما؟
ەءلىمىزدىڭ باس گازەتى «ەگەمەن قازاقستان» (18.06.16): «مۇحيتتىڭ ارعى جاعىنداعى سولتۇستىك امەريكادا ءجۇرىپ، لاڭكەستىك ارەكەتكە قاتىسى بار دەگەن ايىپپەن 3,5 جىلعا باس بوستاندىعىنان ايىرىلعان ازامات تاجاياقوۆ اقش اباقتىسىندا جازاسىن تولىق وتەپ، ەلگە ورالدى. كەشە ونى الماتى اۋەجايىنان كۇتىپ الۋعا اتا-اناسى، تۋعان-تۋىستارى مەن دوستارى كەلدى. ۇلىن كورىپ، باۋىرىنا باسقان اكەسى قۋانىشىنا ورتاقتاسقان ەل-جۇرتقا شەكسىز العىسىن جەتكىزدى» دەپ جازىپ، اۋەجايداعى مارە-سارە سۋرەتىن قوسا باسقان. اپىراي-ءا، تۇرمەدە شىققان بوزبالانى ەلدىڭ باس گازەتى ءسۇيىنشى سۇراعانداي قۋانا جاريالاعانى نەسى؟
شەتەلدە تىنىش جۇرمەي قازاق ەلىنىڭ، ۇلتتىڭ اتىنا كىر كەلتىرىپ، تەرىس قىلىعىمەن اباقتىعا قامالعان جان كىمگە ۇلگى، كىمگە ماقتانىش؟ مۇنداي جاعداي ءبىرىنشى ەمەس قوي، وسىدان ەكى جىل بۇرىن 20 جاستاعى اقجارقىن تۇرلىباي قىتايدىڭ گۋانچجوۋ قالاسىندا سومكە تولى ەسىرتكىمەن ۇستالعان بولاتىن. سول قىزدى ەل ديپلوماتتارى سۇراپ ءجۇرىپ، ەلگە اۋىستىرۋعا قول جەتكىزگەن. وسى وقيعانى دا باق اتاۋلى جارىسا جازىپ، قازاق قىزىنىڭ شات-شادىمان سۋرەتىن قايتا-قايتا باسىپ، «قاھارمان» جاساعانداي اسەر ەتتى.
ال ەندى، ءوز ەلىمىزدەگى ءىستى بولعانداردىڭ داڭقى ۇلتتىق باتىردان كەمدە كەم. ايتالىق، ءبارىڭىز كۋا، «استانا ەكسپو-2017» ۇلتتىق كومپانياسىنىڭ بۇرىنعى باسشىسى تالعات ەرمەگياەۆ مەملەكەت قارجىسىن ميللاردتاپ جەپ قويدى دەپ 14 جىلعا كەسىلگەنگە دەيىن گازەت، سايت، تەلەديدار بەتىنەن ءبىر ساتكە دە تۇسىرمەدى. تالعاتىمىز سوت ءجۇرىپ جاتقاندا ەلدىڭ كوزىنشە سىلق-سىلق كۇلىپ وتىردى، تەمىر تورعا ەڭسەسىن تىك ۇستاپ، قاسقايىپ كەتكەنىن كورگەن كىسىگە ول بەينەبىر جۇماققا بارا جاتقانداي اسەر ەتتى.
تاياۋدا ارنالاردىڭ بىرىنەن شەت ەلدەردىڭ تۇرمەلەرىندە 3500 قازاقستاندىق وتىرعانى تۋرالى ايتىلدى. ەندى «ەگەمەن» سولاردىڭ ارقايسىنىڭ تۇرمەدەن بوسانعانىن كورسەتىپ جازا بەرەتىن بولسا...
- «ەلدىڭ بەدەلدى باسىلىمدارى مەن تەلەديدارى، الەۋمەتتىك جەلىلەرى جاپا-تارماعاي شالقىپ تاسىعان بايلاردىڭ تۇرمىسىن، ۇرى-قارىلاردى سۋرەتتەرىن جىلتىڭداتىپ، قۇدايدىڭ قۇتتى كۇنى ايتا بەرگەن سوڭ با، مەكتەپتەگى بالالارىم سوعان قىزىعىپ، سۋرەتتەرىن قيىپ الىپ، ساقتاپ قويىپ جۇرگەنىن كورىپ قالدىم» دەدى ءبىر دارىگەر دوسىم كۇيىنىپ. ارينە، بۇگىنگى باق نە جازامىن دەسە دە، قالاي جازامىن دەسە دە – ەركى. اقپاراتقا توسقاۋىل جوق. بىراق تەرىس اسەردى قايتەمىز؟
تۇرسىن تاڭاتاروۆ، قوستاناي وبلىسى
Abai.kz
