2012 جىلعى لوندون وليمپياداسىنىڭ چەمپيوندارى يليا يلين، زۋلفيا چينشانلو، مايا مانەزا مەن سۆەتلانا پودوبەدوۆا سپورتتىق سايىستاردان دوپينگ داۋىنا بايلانىستى شەتتەتىلدى. وسى اقپارات تاراي سالا الەۋمەتتىك جەلىلەردە ءتۇرلى پىكىرلەر ايتىلىپ جاتىر.

راس. بۇكىل الەمنىڭ الدىندا قازاقستاننىڭ ابىرويىن اسقاقتاتقان ءتورت سپورتشىمىزدىڭ دا قانىنان تىيىم سالىنعان ءدارىنىڭ قۇرامى انىقتالىپ وتىر. بۇل دەگەنىڭىز وسى ءتورت سپورتشى دا العان مەدالدارىنان ايرىلىپ قالۋى مۇمكىن ەكەنىن كورسەتەدى. بۇل بىزگە سوققى بولاتىن ءبىرىنشى - قاۋىپ.

ەكىنشىدەن، قازاقستاننىڭ اتالعان اۋىر اتلەتتەرى ريو وليمپياداسىنا  قاتىسپاي قالۋى مۇمكىن. حالىقارالىق وليمپيادا كوميتەتىنىڭ تارتىپتىك كەڭەسى جاقىن كۇندەرى وتەدى. ءتورت اۋىراتلەتتىڭ تاعدىرى سول كەڭەستە شەشىلەدى.

بۇكىلالەمدىك دوپينگكە قارسى اگەنتتىك كودەكسىنە ساي، ءار سپورتشى ءوز اعزاسىنا تۇسكەن زاتتار ءۇشىن جەكە جاۋاپ بەرەدى. سونىمەن بىرگە، سپورتشى وزىنە قاتىستى كەز-كەلگەن شەشىمگە اپەللياتسيالىق شاعىم تۇسىرۋگە قۇقىلى.

قوش! ءبىزدى ساڭلاقتارىمىزدىڭ ابىرويىنىڭ توگىلگەنى، سول ابىرويدىڭ ارتىنداعى قازاق ۇلتىنىڭ، قازاق مەملەكەتىنىڭ جەرگە قارايتىنى قينايدى. سەبەبى، ءبىزدىڭ مەملەكەت سپورتتىق سايىستارداعى تابىستى مەملەكەتتىڭ تابىسى رەتىندە كورسەتەتىن يدەولوگيا قالىپتاستىرىپ جىبەرگەن ەدى. ءتىپتى، بارلىق جەڭىس ەلباسىمىزدىڭ جەڭىسى رەتىندە سيپاتتالاتىنى تاعى راس.  ەندى، سول جەڭىستىڭ ءبارى كوزدەن بۇل-بۇل ۇشايىن دەپ تۇر. بۇل ءوز كەزەگىندە ەلباسىعا دا ءسوز كەلتىرەتىنىن ۇمىتپاۋ كەرەك. بارلىق جىلت ەتكەن جاقسىلىقتى پرەزيدەنتكە تەلي بەرۋدىڭ دۇرىس ەمەستىگىن وسى جولعى وقيعالاردان انىق بايقاۋعا بولادى.

سونىمەن قاتار، ءبىز كوزى ءتىرى وليمپيادا چەمپيوندارىنىڭ اتىنا سپورت كەشەندەرىن سالىپ تاستادىق. ەندى ولاردىڭ چەمپيوندىق اتاعى الىنىپ تاستالسا، نە بولماق؟ ول كەشەندەردىڭ اتىن وزگەرتەمىز بە؟

ارينە، قازاق - ءمارت حالىق. ءبىر ساتتىك قۋانىشى ءۇشىن سپورتشىلارىمىزدى ۇلدە مەن بۇلدەگە ورادى. سولاردىڭ ءىسىن ناسيحاتتاپ، مەملەكەتتىك يدەولوگيا جاساماق بولدى. ەندى مىنە، كىنانى كىمگە اۋدارارىمىزدى بىلە الماي وتىرمىز. 

ءبىر كۇندىك قۋانىش ءۇشىن، مەملەكەتىمىزدىڭ ابىرويىن توگىپ الماۋدى ويلاناتىن كەز كەلگەن سياقتى.

ءشارىپحان قايسار

Abai.kz