جۇما, 29 ناۋرىز 2024
46 - ءسوز 4968 0 پىكىر 6 ماۋسىم, 2016 ساعات 12:43

ءۇيتىپ كەتىپتى، ءبۇيتىپ كەتىپتى...

 

كۇن سايىن ەستيتىنىمىز: ءۇيتىپ كەتىپتى، ءبۇيتىپ كەتىپتى، ءسۇيتىپ كەتىپتى، اتىپ كەتىپتى، شاتىپ كەتىپتى، ساسىپ كەتىپتى، باتىپ كەتىپتى، جاتىپ كەتىپتى، قاتىپ كەتىپتى، شاشىپ كەتىپتى، زورلاپ كەتىپتى، قورلاپ كەتىپتى، سورلاپ كەتىپتى،  الداپ كەتىپتى، اتايىن دەپ جالداپ كەلىپتى، شاشىن تىقىرلاپ الىپ، جان-جاعىن بارلاپ كەتىپتى، شپيوندار ءورىپ كەتكەن، ەلىمىزدى شارلاپ كەتىپتى...

راديكالدار حالىققا وق اتتى، قازاق قازاققا بوق اتتى، كوزدەرىمەن شوق اتتى،  بۇزىپ كىرمەك بوعاتتى، بىرەۋ بىرەۋدى الداپ جاتىر، ەندى ءبىرى ارباپ جاتىر،  كۇلتەبەدە كۇندە جيىن، «نە بولىپ كەتتى؟» دەپ تالداپ جاتىر، بىرەۋ بىرەۋدىڭ قانىن شاشىپ كەتتى، ەندى ءبىرى بيلىك دالىزىندە بىرەۋدىڭ اياعىن باسىپ كەتتى، بايلىققا باتقان  ميللياردەر، شەتەلگە قاشىپ كەتتى، كەتەرىندە تالاي بىلىقتى اشىپ كەتتى...

كەشە بىلاي بولدى، اناۋدىڭ ءومىرى لاي بولدى، ءويتىپ كەتتى، ءسويتىپ كەتتى، ۇرىپ كەتتى، سۇمدىقتاردان ءشاشىمىز تۇرىپ كەتتى، ءدىني اعىمدار جاستار ءومىرىن بۇرىپ كەتتى، مۇسىلماندىق يمانىمىز قۇرىپ كەتتى، جۇلىپ كەتتى، ۇلىپ كەتتى، تەپكىلەپ تاستاپتى ۇلىقبەكتى، قاتىندار شىلىم شەكتى، ادامدار قالدى ما، سۇيەگى تەكتى؟

اناۋ مىجىپ كەتتى، قىزىپ كەتتى، سىزىپ كەتتى، اتتى، جاتتى، ارام قاتتى،  وتىرىك قۇشاقتادى، ارتىنان پىشاقتادى، كوزىمىز قاراڭ، كوڭىلىمىز الاڭ، مىنا ءومىر جامان...

ايتاتىنىمىز وسەك، ويلايتىنىمىز توسەك، كۇلىپ جاتىر شوپشەك،  قاريامىزدا توقال، قولىنا ۇستاعانى بوكال، بىرىنەن ءبىرى سۇراعانى «شوتال»، ايتاتىندارى: قۇرى، جوعال!

تۋىپ كەتىپتى، كىندىگىن ءوزى كەسىپ،  قانىن جۋىپ كەتىپتى، بالاسىن قوقىسقا لاقتىرىپ، كوڭىلى سۋىپ كەتىپتى، تۇرمەدەن تورتەۋ قاشىپ، ولاردى ءتورت ءجۇزى قۋىپ كەتىپتى، شاقالاعىن دارىگەرلەر ساتىپ كەتىپتى، بايلىققا باتىپ كەتىپتى، اناسىنىڭ ەمشەگى ءيىپ كەتىپتى، كورشىنىڭ قىزى ءبىر نەگرگە ءتيىپ كەتىپتى، ورازا ايىندا وڭباعان بىرەۋ قۇراننىڭ ۇستىنە ءسيىپ كەتىپتى...

تاعى  كۇندە ەستيتىنىمىز: اناۋ حالىق ناپاقاسىمەن بايىپ كەتكەن، پالەن اۋىلدى تاسقىن شايىپ كەتكەن، ءبىر ايەل دامبالىن باعدارشامعا جايىپ كەتكەن، اناۋ ورتەنىپ، جانىپ كەتكەن، «دجيپتەر» جارىسىپ، ءبىرى قالىپ كەتكەن،  بىرەۋدى بەس بالاسىمەن قاعىپ كەتكەن،  ءبىر ماس ارىقتا اعىپ كەتكەن، ءبىر باي كەدەيدىڭ باسىن شاعىپ كەتكەن، ونىمەن قويماي، مۇرنىنا سوليدور جاعىپ كەتكەن، كەمپىردى مازاقتاپ، شاشىنا بانتيك تاعىپ كەتكەن... پالەن بازار جانىپ جاتىر، ولاردى وشىرۋگە بارىن سالىپ جاتىر،  ەلدە جەمقورلىق، بىرىنەن ءبىرى الىپ جاتىر...

كۇندە ەستيتىنىمىز: ءويتىپ كەتىپتى، ءبۇيتىپ كەتىپتى... قۇدايىم-اي، ەلدە تىنىشتىق بولسا ەكەن، سول تىنىشتىقتى بۇزعاندار...  ارعى جاعىن وزدەرىڭىز جازىڭىزدار، بايلىققا، مانساپقا سەمىرە بەرمەي، ءسال-ءپال «ازىڭىزدار!»

مۇحتار شەرىم

Abai.kz

 

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2275
عيبىرات

قايسار رۋحتى عازيز جان

مۇحتار قۇل-مۇحاممەد 3591