پرەزيدەنت پارمەنىمەن قۇرىلعان جەر كوميسسياسىنىڭ مۇشەسى مۇرات ابەنوۆ جەر رەفورماسىنىڭ قازاقستاندىقتارعا تيگىزەتىن پايداسى تۋرالى جۋرناليستەرگە بايانداپ بەردى.

 «قازىر بىزدە قازاقستاننىڭ جەرلەرى كىمدەردىڭ مەنشىگىندە ەكەندىگى تۋرالى مالىمەتتەر از ءارى جاسىرىن.  جەردى زاڭسىز جولمەن كىمدەر يەلەندى؟ كىمدەر ءوز جەرلەرىن يگەرمەي وتىر؟ قانداي شەتەلدىك ازاماتتار مەن كومپانيالار قازاقستان جەرلەرىن الىپ ۇلگەردى؟ جانە قانداي جولمەن؟ اۋەلى وسى ماسەلەلەردى انىقتاپ الۋىمىز كەرەك»،-دەدى مۇرات ابەنوۆ.

ەكس-ۆيتسە-مينيستر مۇرات ابەنوۆ مىرزا جەر كوميسسياسى جەر كودەكسىنە وزگەرتۋلەر ەنگىزەر الدىندا اۋەلى ول تۋرالى تولىق زەرتتەۋ جۇرگىزۋ كەرەكتىگىن ايتتى.

«وكىنىشكە وراي قازىر بىزدە مۇنداي مالىمەتتەر مۇلدە جوق. رەفورمادان نە كۇتەمىز؟ قانشا جۇمىس ورىندارى اشىلادى؟ ەلىمىزدىڭ ەكونوميكاسى قالاي جانە قاي باعىتتا داميتىن بولادى؟ بۇل رەفورمانىڭ بىزگە، قازاقستاندىقتارعا، قانداي پايداسى بولماق؟ بىزدە ەشقانداي اقپارات جوق. سوندىقتان قانداي دا ءبىر شەشىم شىعارۋ، قابىلداۋ قيىن»،-دەيدى ابەنوۆ.

ء«بىز ەڭ اۋەلى ۇسىنىستاردىڭ بارلىعىن حالىققا جەتكىزۋىمىز كەرەك، ءاربىر قازاقستاندىقتىڭ پىكىرىمەن ساناسۋىمىز كەرەك. سەبەبى، قازىر بارلىق ايماقتاردا كوميسسيالار قۇرىلعان. ەندى سول ارقىلى حالىقپەن بايلانىس ورناتۋىمىز كەرەك، تىكەلەي تىلدەسۋىمىز كەرەك. بۇل - ەڭ ءبىرىنشى جانە ەڭ ماڭىزدى شارۋا بولۋى ءتيىس. قازاقستان ازاماتتارى جەر كوميسسياسى جۇمىسىنىڭ اشىق جۇرگىزىلىپ جاتقاندىعىن كورىپ، ءبىلىپ وتىرۋى قاجەت. ولاردىڭ كوميسسياعا ءوز ۇسىنىس، پىكىرلەرىن جازباشا نەمەسە ەلەكتروندى جۇيە ارقىلى ايتىپ، جۇگىنۋلەرىنە مۇمكىندىك بولۋى ءتيىس»،-دەدى ەكس-ۆيتسە-مينيستر.

«بۇگىن ءبىزدىڭ ازاماتتارىمىزدىڭ مۇنداي مۇمكىندىگى جوق. جەر كوميسسياسىنا مۇشە ازاماتتار قانداي ۇسىنىستار ايتتى جانە قازىر قانداي جوبا ازىرلەنۋدە - ونى ەشكىم بىلمەيدى. ءبىز، جەر رەفورماسى جونىندەگى كوميسسيا مۇشەلەرى، حالىقپەن اشىق بايلانىس ورناتۋىمىز كەرەك. بۇل كوپشىلىكتىڭ قالاۋى. سوندا عانا سوڭعى شەشىم ءادىل بولماق»،-دەيدى مۇرات ابەنوۆ.

ءبىلىم جانە عىلىم مينيسترلىگىنىڭ ەكس-ۆيتسە-ءمينيسترى، IV شاقىرىلىم دەپۋتاتى مۇرات مىرزا وسى ماقساتتا «فەيسبۋك» جەلىسىندە ارنايى پاراقشا اشىپ، وندا جەر ماسەلەسىنە قاتىستى ۇسىنىس، پىكىرلەر جيناستىرىپ جاتقان كورىنەدى.

ەستەرىڭىزدە بولسا، ءماسىموۆ تىزگىنىن ۇستاپ وتىرعان ۇكىمەت اۋىلشارۋاشىلىق ماقساتتارىنا تيەسىلى 2 ميلليونعا جۋىق گەكتار جەردى مەنشىك پەن شەتەلدىكتەرگە جالعا بەرىپ، كەن ورىندارىن اۋكتسيون ارقىلى ساتىلىمعا شىعارماق بولدى.  ەل ءىشىنىڭ نارازىلىعى ارتقان سوڭ، مەملەكەت باسشىسى بۇل باستاماعا موراتوري جاريالاپ، ارنايى جەر كوميسسياسىن قۇرعان ەدى.

جاڭا قۇرىلعان كوميسسيانىڭ ەكىنشى وتىرىسى وتكەن سەنبىدە ءوتتى. وندا اقىن، جازۋشى مۇحتار شاحانوۆ 21-مامىرداعى وقيعالارعا ساياسي سيپات بەرە وتىرىپ، كوميسيا جۇمىسىندا بۇل ماسەلەنى دە ەسكەرۋ كەرەكتىگىن ايتقان. ال جەر كوميسسياسىنىڭ العاشقى وتىرىسىندا پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ مىرزا كوميسسيا «حالىقتىڭ نارازىلىعىن تۋدىرمايتىن» شەشىم قابىلداۋى تيىستىگىن ايتقان ەدى.

نۇرزات توعجان

Abai.kz