مينيستر باقىت سۇلتانوۆتىڭ ايتۋىنشا، 2015 جىلى بيۋدجەت قاراجاتىنىڭ 7,8 ملرد تەڭگەسى يگەرىلمەي قالعان. سونداي-اق، ەسەپ كوميتەتى 459 ملرد تەڭگەنىڭ ءتيىمسىز جۇمسالعانىن انىقتاپ وتىر. وسىلاردىڭ سالدارىنان 7 مەكتەپ پەن 7 اۋرۋحانا سالىنباعان. ال، اۋرۋحانالاردىڭ قويمالارىندا ارتىعىمەن الىنعان ءدارى-دارمەكتەن اياق الىپ جۇرە المايسىڭ.

"ماسەلەن، تۇرعىنۇي قۇرىلىسىنا بولىنگەن 39 ميلليارد تەڭگەنىڭ 1 ميللياردى يگەرىلمەگەن. شەنەۋنىكتەردىڭ كەسىرىنەن قانشاما ادام پاتەرسىز ءجۇر. بۇعان قوسا 7 مەكتەپ پەن 7 اۋرۋحانا سالىنباي قالعان", - دەيدى دەپۋتات گۇلميرا يسىمباەۆا.

بۇل ازداي، تەندەرگە قاتىساتىن كاسىپكەرلەر دە بيۋدجەتتىڭ قارجىسىن ماي شەلپەككە اينالدىرىپ الىپتى. بىلتىر بيزنەسمەندەر جالعان قۇجات تولتىرىپ، بيۋدجەتكە 1 ترلن تەڭگە سالىق تولەمەگەن.

نۇرتاي سابيليانوۆ، ءماجىلىس دەپۋتاتى:

-ياعني 484 مەردىگەر مەملەكەت قارجىسىن العانىمەن دۇرىس جۇمساماعان. سونىڭ ىشىندە «نۇرلى جول» باعدارلاماسى بويىنشا 409 ملرد قارجى جۇمسالعان. سودان الىنۋعا ءتيىس 130 ملرد سالىق الىنباعان. مەملەكەتتىك ساتىپ الۋدى قاراساق، 1,5 ترل قاراجات كەتكەن، سودان 430 ملرد تەڭگە سالىق الىنباعان. بۇلار نەمەنە، سوندا مەملەكەتتىڭ قارجىسىن الىپ، جالعان كاسىپكەرلەرگە بەرگەن بە؟

ەسەسىنە، پروكۋرورلار بيۋدجەتتىڭ قارجىسىن اياماپتى. باس پروكۋراتۋرا ءبىر-بىرىنە سىيلىق الۋ ءۇشىن مەملەكەتتىڭ ميلليوندارىن شاشقان.

ومارحان وكسىكباەۆ، ءماجىلىس دەپۋتاتى:

- بىلتىر باس پروكۋراتۋرا 108 ملن.قارجىنى سىي-سياپاتقا جۇمساعان. نە سوندا بۇل قۇقىقتىق مەكەمە ەمەس، سوندا سىيلىقتى كىمگە بەرىپ جاتىر؟ نەنى ۇلەستىرىپ جاتىر؟ بۇل نە دەگەن شىعىن؟ كونستيتۋتسيالىق كەڭەس ءوزى باس-اياعى 30 ادام جۇمىس ىستەيدى، 65 ملن اقشانى شىعىنداعان، سول بىرەۋگە سىي بەرۋگە.

ال، وڭىرلەردەگى اكىمدەر قازىنانىڭ قارجىسىن جۇمساعاندا ەشبىر تارتىپكە باعىنبايدى ەكەن. ماسەلەن، بىلتىر ايماقتار 352 ملرد تەڭگەنى زاڭسىز پايدالانعان. ول ءۇشىن اكىمدەر مەن ۆيتسە-مينيسترلەرگە سوگىس جاريالادىق دەپ قۇتىلدى قارجى ءمينيسترى. بۇنى مىسە تۇتپاعان دەپۋتاتتار، ەندى مەملەكەتكە كەلگەن شىعىندى، بار اقشانى ۇقساتا الماعان شەنەۋنىكتەردىڭ وزدەرى كوتەرسىن دەپ وتىر.

Abai.kz