پانتەون. داقپىرتقا ىلەسپەيىكشى...
كەشەلى بەرى مەملەكەتتىك پانتەون جونىندە نە ءبىر قيسىنسىز وتىرىكتى ورىس ءتىلدى باق قولدارىنان كەلگەنشە تاراتىپ جاتىر. سوراقىسى - بۇعان اڭعال قازاق ىلەسە كەتتى. وسى ورىستار 2013 جىلى ماسكەۋ تۇبىندە رف باسشىسى ءپۋتيننىڭ جەكە نۇسقاۋىمەن 5 ميلليارد رۋبلگە (25 ميللرد تەڭگە) پانتەون سالىپ، وعان كالاشنيكوۆتى جەرلەگەندە جىرىسا ماقتاپ، ۇلارداي شۋلاپ ەدى.
ەندى قازاق سوناۋ ءۇى -ءۇىى عاسىردان باستاۋ الاتىن كۇلتەگىن، بىلگە قاعانداردىڭ،تونىكوك دانىشپاننىڭ پانتەوندارىن، سارايشىقتاعى حاندار پانتەوندارىن، تۇركىستانداعى يگى-جاقسىلار پانتەوندارىن، ءوز اتا ءداستۇرىمىزدى ەسكە ءتۇسىرىپ ەدى، ورىس ءتىلدى اقپارات قۇرالدارى بۇتتارىنا جىبەرگەنشە شىڭعىرىپ، وكىرىپ جاتىر.
79 ميلليارد ءبولىندى دەگەن تۇبىرىمەن جالعان. مەن، سوناۋ 2002 جىلى استانا قالاسىنىڭ اكىمىنىڭ ورىنباسارى تولەگەن مۇقامەتجانوۆ وتكىزگەن العاشقى باس قوسۋدان باستاپ، وسى ماسەلەنىڭ باسى-قاسىندامىن. تولەگەن قالا اقساقالدارىن، م.جولداسبەكوۆ، ا.سەيدىمبەكوۆ، ق.سالعارين، ت.جۇرتباي باستاعان ازاماتتاردى جيناپ مىناداي ماسەلە كوتەردى. پرەزيدەنت ءاز تاۋكە مەن ءاز جانىبەككە ەسكەرتكىش قويۋدى ۇسىنىپ جۇرتتىڭ پىكىرىن بىلىگىسى كەلگەن ەكەن. قىزىعى جۇرت بىردەن تۇزەتۋ ەنگىزدى. كەرەي مەن جانىبەكتى بولۋگە بولمايدى. الدىمەن ەكى حانعا قويۋ قاجەت. تاۋكەگە ءسوز جوق ەسكەرتكىش كەرەك.
تولەگەن ويلانىپ قالدى. پىكىرىمىزدى جەتكىزبەك بولدى. وسى تۇستا اقسەلەۋ اعا پانتەون ماسەلەسىن اۋىزعا الدى. سارايشىق، تۇركىستان، كۇلتەگىن، بىلگە پانتەوندارىن الدىعا تارتتى. ەل تۇگەل قولدادى. مۇنى دا تولەگەن جەتكىزۋگە ۋادە بەردى.
ەكى جەتىدەن سوڭ قايتا جينالدىق. ءبىزدىڭ پىكىرىمىزبەن پرەزيدەنت كەلىسىپتى.
اڭگىمە وسىمەن 2004 جىلدىڭ شىلدەسىنە دەيىن قوزعالمادى.وسى جىلى شىلدەدە پرەمەر احمەتوۆتىڭ ورىنباسارى ءايتىموۆا بىرعانىم قارىنداسىمىز ۇلكەن القالى توپ جيناپ، پانتەون ماسەلەسىن جەكە كوتەردى. استانالىق ءبىر عانا قارت قارسى بولىپ، جوعارىدا اتالعان اعالارىمىز، سوڭىرا قوسىلعان عالىمدار تۇگەل قولدادى. اسىرەسە ەستە قالعانى اقسەلەۋ مارقۇمنىڭ - پانتەون ەۆروپاعا ەدىل پاشامەن بارعان ءبىزدىڭ اتا سالتىمىز. وتە كەرەك. سالۋ قاجەت. بىراق، مەن ءوز اۋىلىما جەرلەنەمىن، - دەگەنى.
وسى جيىننىڭ پروتوكولى مەندە ءالى ساقتاۋلى.
اياق استى تۋعان دانەڭە جوق. اتىن اتاپ وتىرعان عالىمدار، رىمعالي نۇرعاليەۆ پەن اقاڭنان وزگەسى ءتىرى. سۇرارسىزدار.
مىنە، العاشقى ادام جەرلەنگەلى ءۇش جىلعا جۋىق ۋاقىت ءوتتى. 79 ميللياپد تۇرسىن، 79 مىڭ قارجى جۇمسالعان جوق. تۋ باستا وتكەن - 2015 جىلعا 1 ميلليارد قارجى ءبولىنىپ، بيىل 2 ميلليارد قارجى يگەرىلەدى دەپ جوسپارلانعان ەدى. بىراق ەكى جىلدا ءالى ەكى تيىن شىققان جوق. بۇل جەرگە 79 ميللياردىڭ ەش قاجەتى جوق. 79 ميلليونعا بار شارۋا بىتەدى. ماسقارا قىلعاندا 79 ميلليوندى ميللياردتاپ شۋلاپ جەۇمەسەك دە. ءار مارقۇمنىڭ باسىنا بيىكتىگى- 220 سم.، ەنى-70 سم.، قالىڭدىعى-30 سم قۇلپىتاس قانا، قۇلپىتاس قانا قويىلادى. ستاندارد. قاتاڭ باقىلاۋعا الىنادى.
ال انا ماكەتتەگىلەردى استانانىڭ اكىمى يمانعالي تاسماعامبەتوۆ ءبىر كورگەندە-اق جارتىسىنان شاۋىپ تاستاعان. پرەزيدەنت تە باس شۇلعىماعان. ەكەۋى وتكىزگەن جيىنعا قاتىستىم.
قازىر جەر كەسكىنى 40 گرادۋس وزگەرەدى. دەمەك جەر كولەمى جە 40 پايىز قىسقارادى
قارجىنى ۇلعايتپاۋ ءۇشىن قابانباي باتىر كەسەنەسىنىڭ جانىنداعى بەتكەيدى ەنى 30 مەتردەي ءۇش-ءتورت تەراسساعا تەگىستەۋ ۇيعارىلدى. بۇل ەكى تراكتورعا ەكى كۇننىڭ جۇمىسى. ارى قارا قۇداي بەرگەن جازىق دالا.
قايدا ەل شۋلاعان 79 ميلليارد؟ مۇنى سانداليزم دەمەسكە امال جوق.
بۇگىن فاريزا اپامىز بەن ءابىش كەكىلباي، ماقسۇت نارىكباي اعالارىمىزدىڭ باسىنان قىسى-جازى كىسى ارىلمايدى. جەكسەنبى كۇندەرى قۇران وقۋ ءۇشىن كادىمگىدەي كەزەككە تۇرادى.
جاڭا عانا ءابىش اعا مەن فاريزا اپامىزعا ابەكەڭنىڭ ۇستازىمىن دەگەن 98 جاستاعى قاريا باتا جاسادى. ءۇش-ءتورت كۇن بۇرىن يمەكەڭ دە بولىپتى. بۇ كىسىگە ىلە-شالا ەرەيمەنتاۋلىق ءبىر اۆتوبۋس وقۋشى كەلىپ، ۇستازدارى ەكى قالامگەر جايلى اڭگىمە وتكىزدى.
باۋىرلار" داقپىرتقا ىلەسپەيىكشى!
كامال ءابدىراحمان
Abai.kz
