وڭتۇستىكتەگى «گولدەن نوماد» تىگىن فابريكاسىنا گەرمانيادان ارنايى ماماندار كەلىپ، «اعا ساراپشىلار قىزمەتى» باعدارلاماسى اياسىندا تاجىريبەسىمەن ءبولىسىپ وتىر. وبلىستاعى ەرلەر مەن ايەلدەر كوستيۋمىن تىگەتىن جالعىز كاسىپورىندا ديزاينەرلەر تاپشى. شەتەلدىك اعا ساراپشىلار مۇنداعى مامانداردى وقىتىپ، الەمدىك ستاندارتقا ساي كيىم ۇلگىلەرىن ۇيرەتۋدە. ەكى اپتا ىشىندە ءوز تاجيربەسىمەن بولىسەتىن گەرماندىقتار جەرگىلىكتى جۇمىسشىلارعا زاماناۋي تەحنولوگيالاردى مەڭگەرۋىنە كومەكتەسەدى.

نەمىس ديزاينەرلەرى 2016-2017 جىلدارعا ۇسىنعان ايەلدەرگە ارنالعان سىرت كيىمدەر ۇلگىلەرىن كورسەتتى. وسىعان دەيىن قىز-كەلىنشەكتەر مەن ەرلەرگە، بالالارعا ارناپ كوستيۋمدەر تىگىپ كەلگەن جەرگىلىكتى فابريكا ماۋسىم قارساڭىندا جاڭاشا ديزايندا سىرت كيىمدەردىڭ ۇلگىلەرىن ۇسىنباق. بۇگىننىڭ وزىندە شەتەلدىك ساراپشىلاردىڭ كومەگىمەن تىگىلگەن مودەلدەردىڭ بىرقاتارى دايىن.

ايتا كەتەيىك، بۇگىندە وبلىستاعى ەرلەر مەن ايەلدەر كيىمىن تىگەتىن جالعىز فابريكادا ديزاينەرلەر جەتكىلىكسىز. كاسىپورىن باسشىلىعى وسىناۋ ولقىلىقتىڭ ورنىن تولتىرۋ ءۇشىن شەتەلدىك ساراپشىلاردىڭ كومەگىنە جۇگىنۋدە.

كاسىپكەرلەر ەكى جاقتى ارتىپتەستىك ءوز جەمىسىن بەرەتىنىنە سەنىمدى. بيىلعى ماۋسىمدا قىز-كەلىنشەكتەر جەرگىلىكتى مامانداردىڭ شەتەلدىك ساراپشىلارمەن بىرىگىپ دايىنداعان سىرت كيىم ۇلگىلەرىن كيىپ شىعۋىنا مۇمكىندىگى بار.

اباي اقپارات