وبلىسىمىزدا بيۋدجەت قارجىسى جۇمسالماي e.ontustik.kz  پورتالى قۇرىلىپ، جۇمىس ىستەۋدە. اتالعان پورتال وبلىس اكىمدىگىنىڭ جاس تالانتتاردى قولداۋعا باعىتتالعان ءىس-شارالارى اياسىندا جۇزەگە اسىرىلعان جوبا. بۇل تۋرالى ايماقتىق كوممۋنيكاتسيالار قىزمەتىندە وتكەن بريفينگتە وبلىس اكىمى اپپاراتى اقپاراتتاندىرۋ جانە مەملەكەتتىك قىزمەت كورسەتۋ مونيتورينگى  ءبولىمىنىڭ باسشىسى ە.وتەباەۆ ءمالىم ەتتى. 

ونىڭ ايتۋىنشا، اتالعان جوبا حالىقتىڭ بيلىككە سەنىمىن ارتتىرا وتىرىپ، اشىقتىقتى، ايقىندىقتى قامتاماسىز ەتەدى. سىبايلاس جەمقورلىق كورىنىستەرىنىڭ الدىن الۋعا مۇمكىندىك بەرەدى. 

بريفينگكە قاتىسقان وبلىس اكىمى اپپاراتى پەرسونالدى باسقارۋ قىزمەتىنىڭ باسشىسى ج.ناۋشاباي بۇل جوبانىڭ تيىمدىلىگىن ايتىپ، بارلىق ۇمىتكەرلەر مەكتەپ ديرەكتورلارىن تاعايىنداۋ بويىنشا جاريالانعان كونكۋرسقا قۇجات تاپسىرۋدى اۆتوماتتاندىرىلعان تۇردە جۇزەگە اسىرا الاتىنىن جەتكىزدى. ول ءۇشىن ۇمىتكەر ازامات، اۋداندىق، قالالىق ءبىلىم بولىمدەرىنە بارماي-اق، ادام فاكتورى ارالاسۋىنسىز حقكو-نا  بارىپ نەمەسە ۇيدە وتىرىپ–اق، ەلەكتروندى تۇردە قۇجات تاپسىرا الادى.

الداعى ۋاقىتتا دەنساۋلىق سالاسى جانە ءبىلىم بەرۋ سالاسى قىزمەتكەرلەرىن اتتەستاتسيادان وتكىزۋ اۆتوماتتاندىرىلىپ، وسى جۇيەدە ىسكە قوسىلادى.  

سونىمەن قاتار، الداعى ۋاقىتتا 1313 نومەرىمەن شۇعىل جەلى ىسكە قوسىلىپ، مەملەكەتتىك قىزمەت كورسەتۋگە، الەۋمەتتىك سالا جۇمىسىنا بايلانىستى  ارىز- شاعىمداردى قابىلداۋ بويىنشا سەنىم تەلەفونى جۇمىسىن باستايدى.  

Abai.kz