وپپوزيتسيالىق "رەسپۋبليكا" سايتى جابىلعانىن جاريالادى
وپپوزيتسيالىق "رەسپۋبليكا" سايتىنىڭ جابىلعانى تۋرالى رەداكتسيا مالىمدەمەسىن سايتتىڭ تەڭ قۇرىلتايشىسى ءارى جۋرناليست يرينا پەترۋشوۆا Facebook’تeگى پاراقشاسىندا بەيسەنبى كۇنى جاريالادى.
"رەسپۋبليكا" رەداكتسياسىنىڭ ينتەرنەت-پورتال جۇمىسى توقتاعانى تۋرالى جاريالايتىن ۋاقىت كەلدى. ءتيىستى مالىمدەمە "روسكومنادزورعا" جولداندى. ءبىز جابىلدىق", - دەپ جازدى يرينا پەترۋشوۆا.
پەترۋشوۆا مۇنداي شەشىمدى باسىلىمنىڭ جۋرناليستەر ۇجىمى قابىلداعانىن جازدى. پورتالدىڭ جابىلۋىنا بىرقاتار جاعداي سەبەپ بولعان: تەحنيكالىق جانە قارجى ماسەلەلەرى. بۇدان باسقا دا سەبەپتەرىن، پەترۋشوۆانىڭ پىكىرىنشە، "ەلدەگى ساياسي احۋالدى ءجىتى باقىلاپ وتىرعاندار" جاقسى ءتۇسىنۋى ءتيىس.
"رەسپۋبليكا" 2000 جىلدىڭ مامىر ايىندا اپتالىق گازەت بولىپ جارىققا شىقتى، سودان بەرى رەداكتسيا جانە ونىڭ جۋرناليستەرى قۋدالاۋعا ۇشىراپ كەلدى. 2012 جىلى بىرقاتار وپپوزيتسيالىق ماسسمەديانى، سونىڭ ىشىندە اقپاراتتىق-ساراپتامالىق "رەسپۋبليكا" گازەتىن دە سوت "بىردەي باق" دەپ تانىپ، ونى باسىپ شىعارۋعا تىيىم سالدى. قازاقستاندا "رەسپۋبليكا" سايتى دا اشىلمايدى.
اباي-اقپارات
