بۇرىنعى اكىم، 22 ماۋسىمنان باستاپ VI سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى باقتىقوجا ىزمۇحامبەتوۆتىڭ باسى داۋعا قالدى. دالدەپ ايتساق، باقتىقوجانىڭ بالاسى بۇرىنعى ايەلى مەن ءۇش بالاسىنان جەرىپ، اليمەنت تولەۋدەن جالتارىپ ءجۇر ەكەن.

جاقىندا باقتىقوجا سالاحاتدينۇلىنىڭ بۇرىنعى كەلىنى ايگەرىم ىزمۇحامبەتوۆا «دەپۋتاتتىڭ نەمەرەلەرىن اسىراۋعا تيىن بەرىڭىزدەرشى» دەپ، جۇرتشىلىقتان ساداقا سۇراپ، كوشەگە شىقتى.

باق-قا بارىن جايىپ سالعان ايگەرىمنىڭ ايتۋىنشا دەپۋتاتتىڭ بالاسى قۇمار ويىندارعا اۋەس كورىنەدى. سول ءۇشىن بالا-شاعاسىن تاستاپ كەتكەن-مىس.

ال سوت باقتىقوجا ىزمۇحامبەتوۆتىڭ بالاسىنا قاتىستى  ايەلىنىڭ قاراۋىنا بەرىلگەن ءۇش بالاسىنا اليمەنت تولەۋ تۋرالى شەشىم شىعارعانىمەن، شەنەۋنىكتىڭ ۇلى ۇكىمدى ورىنداۋدان جالتارىپ ءجۇر ەكەن.

جاقىندا «Abai.kz» پورتالى قر پارلامەنتى ءماجىلىسىنىڭ 68 جاستاعى دەپۋتاتى باقتىقوجا ىزمۇحامبەتوۆتىڭ كەلىنى قايىر سۇراپ، كوشەگە شىققانى تۋرالى ماقالا جازدى («باقتىقوجانىڭ كەلىنى قايىر سۇراپ ءجۇر»). وندا قايىن اتاسىنان قايىر كۇتكەن ايگەرىمنىڭ باقتىقوجا سالاحاتدينۇلىمەن كورىسپەك تۇگىلى، تىلدەسە الماي جۇرگەندىگى ايتىلعان ەدى. «كوممۇشەمەن» بايلانىس ورناتۋ ايگەرىم ايتقانداي الەك دۇنيە مە؟ الدە حالىقتىڭ قالاۋلىسى بۇقارادان بۇعىپ ءجۇر مە؟

بىرجاقتى باعا بەرۋدەن اۋلاقپىز، ارينە. سول سەبەپتى، ءبىز ماسەلەنىڭ ءمان-جايىن دەپۋتاتتىڭ وزىنەن سۇراپ بىلمەك بولىپ، قر پارلامەنتى ءماجىلىسىنىڭ ءباسپاسوز قىزمەتىنە حابارلاستىق. باقتىقوجا سالاحاتدينۇلىنىڭ بايلانىس ءنومىرىن الىپ، دەرەۋ حابارلاستىق.

تەلەفون تۇتقاسىن دەپۋتاتتىڭ جەكە كومەكشىسى تالعات ءنابيدۇللاۇلى مۇحانوۆ كوتەردى. اماندىق-ساۋلىق سۇراسقاننان سوڭ ديولوگ بىلاي ءوربىدى:

-تالعات ءنابيدۇللاۇلى، ءبىز باقتىقوجا سالاحاتدينۇلىمەن تىلدەسسەك دەپ ەك...

-كەشىرىڭىز، ول كىسى قازىر كوميتەتتىڭ جينالىسىندا ەدى. تۇستەن كەيىن حابارلاسساڭىز بولادى.

-ءبىز باق-تا قىزۋ تالقىلانىپ جاتقان ءبىر ماسەلە بويىنشا حابارلاسىپ وتىرمىز. بىلەتىن بولارسىز؟

-ول نە ماسەلە ەكەنىن مەن بولجاپ تۇرمىن...

-دەمەك بۇل ەشقانداي دا قاۋەسەت ەمەس قوي؟

-ءيا، بۇل جونىندە باقتىقوجا سالاحاتدينۇلى دا حاباردار. ەستىدى. قازىر تۇستەن كەيىن ءوزى دە كەلەدى. سول كەزدە سويلەسسەك قالاي بولادى؟

-جاقسى...

ۋاعدالاسقان ۋاقىتتا تالعات مىرزاعا قايتا قوڭىراۋ شالدىق.

- تاكە، مەن جاڭاعى ماسەلە بويىنشا حابارلاسىپ وتىرمىن.

-ااا، نە عوي... ول كىسى جينالىستا وتىر ەدى.

-ءسىز تۇستەن كەيىن كەلەدى دەپ ەدىڭىز عوي...

-سولاي. بىراق، جينالىس سوزىلىپ جاتقان سەكىلدى. ءوزىم دە تابا الماي وتىرمىن.

-ونداي بولسا، ءبىز "دەپۋتاتپەن بايلانىس ورناتا المادىق" دەپ جازا بەرەمىن.

-قازىر ساعات تورتتەرگە تامان ءوزىم حابارلاسامىن. كۇتە تۇرىڭىزدار.

-ونداي بولسا، وزىڭىزدەن حابار كۇتەمىن.

دەپۋتاتتىڭ كومەكشىسى ۋادە ەتكەندەي، ساعات 16:00 بولدى. ەشقانداي حابار بولماعان سوڭ، كومەكشىگە ءوزىمىز قايتا تەلەفون شالدىق.

-اللو، تاكە، حابارلاسامىن دەپ ەدىڭىز...

-وي بۋ، ۇمىتىپ كەتىپپىن. كەشىرىڭىشى. سىزدەرگە جاۋاپ جازۋ كەرەك ەدى عوي...

-سوندا جاۋاپ تا جوق، دەپۋتات تا جوق پا؟

-نۇرەكە، ەرتەڭگە قالدىرساق قالاي بولادى؟ قازىر قاربالاسىپ جاتىر ەدىك.

-تىم سوزىلىپ كەتتى. بىزگە ءبىر اۋىز ءسوز جەتكىلىكتى. ايگەرىمنىڭ ايتقاندارى راس پا، جوق جالا ما؟ دەپۋتات ءوز نەمەرەلەرىنەن جەرىگەنى نەسى؟ ءوزىڭىز ايتقانداي، نەمەرەلەرىنىڭ جاعدايىنان حاباردار بولسا، ولاردى قايىر سۇراتىپ قويعانى قالاي؟ وسى جونىندە ەكى اۋىز ءسوز سۇراپ وتىرمىز عوي...

- ... ء(ۇنسىز قالدى)... جازىپ بەرەمىز، سولاي دۇرىس بولادى...

حوش، ءبىز بۇدان باقتىقوجا مىرزانىڭ تىم شارۋا باستى ادام ەكەنىن بىلدىك. قانشا جىل اكىم تاعىندا وتىرعاندا قازاق مادەنيەتى مەن رۋحانياتىنا قولداۋ كورسەتىپ جۇرگەن، ىسكەرلىگى مەن حالىقشىلدىعى ءۇشىن كوپشىلىكتىڭ ىقىلاسىنا يە بولعان باقتىقوجا سالاحاتدينۇلىنىڭ ساۋ باسىنا كۇيە جاعۋدان اۋلاقپىز. سوندىقتان، ەكى مينۋت تىلدەسۋگە ۋاقىت تاپپاعان دەپۋتاتتىڭ جاۋابىن بۇگىن تاعى كۇتتىك. ء«لام-ميم» دەگەن ءۇن ەستىلمەدى، ەلوردا جاقتان.

قايتادان الگى كومەكشىگە حابارلاسىپ ەك، تەلەفونى بايلانىس اياسىنان تىس جەردە بولىپ شىقتى.

ءتۇيىن: جوعارىداعى ازدى-كەم سۇحباتتان تۇيگەنىمىز مىناۋ: باقتىقوجا ىزمۇحامبەتوۆتىڭ كومەكشىسى اتالعان ماسەلەمەن ءجىتى تانىس بولىپ شىقتى. دەپۋتاتتىڭ دا بۇل جايلى بىلەتىنىن ايتتى. دەمەك، قايىن اتاسىنان قايىر بولماعان سوڭ، ساداقا سۇراپ، جانايقايىن جەتكىزگەن ايگەرىمنىڭ جالعىزىلىك پيكەتى جالا ەمەس ەكەن. ال دەپۋتات اتانىڭ قاۋىرت جۇمىسىنان ۋاقىت ارىلمايتىندىقتان، بالاسىنىڭ بىلىعىنا باس اۋىرتپاي جۇرسە كەرەك، ازىرگە. دەسە دە، باقتىقوجا  سالاحاتدينۇلىنىڭ ءوز نەمەرەلەرىن وزەككە تەپپەيتىنىنە ۇلكەن سەنىم ءبىلدىرىپ، الداعى ۋاقىتتا بۇل وقيعانىڭ نەمەن اياقتالعانىن  حابارلايتىن بولامىز.

نۇرگەلدى ابدىعانيۇلى

Abai.kz