قازىعۇرت اۋدانىندا جاڭا كوپىر پايدالانۋعا بەرىلدى، - دەپ حابارلايدى اباي-اقپارات پورتالى قازىعۇرت اۋدانى اكىمىنىڭ ءباسپاسوز قىزمەتىنە سىلتەمە جاساپ.

قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي، وڭتۇستىك قازاقستان وبلىسى، قازىعۇرت اۋدانىنىڭ تۇربات اۋىل وكرۋگىنە قاراستى تۇربات اۋىلى مەن قىزىلديحان ەلدى مەكەندەرىن ءبىر بىرىمەن جالعايتىن جاڭا كوپىر قۇرىلىسى ءبىتىپ، پايدالانۋعا بەرىلدى.

اۋىل تۇرعىندارىنىڭ تۇرمىس-تىرشىلىگىن جەڭىلدەتەتىن جاڭا كوپىردىڭ سالتاناتتى اشىلۋ راسىمىنە قازىعۇرت اۋدانى اكىمى ت.تەلعاراەۆ، مەكەمە، ءبولىم باسشىلارى مەن قىزمەتكەرلەرى، اۋىلدىق وكرۋگ اكىمى، زيالى قاۋىم جانە باق وكىلدەرى قاتىستى.

ءۇش مىڭنان استام حالقى بار ەلدى مەكەندەردە بۇرىن-سوڭدى كوپىر بولماعان. جەرگىلىكتى حالىق وتكەلدى قولدان ىستەپ، الايدا ول كوپىر تەز ارادا جارامسىز كۇيگە ءتۇسىپ وتىرعان ەدى.

ايتا كەتەيىك، تاستاقساي وزەنى ارقىلى وتەتىن وتكەلدى سالۋعا قارجى وبلىستىق بيۋدجەتتەن قارالىپتى. ۇزىندىعى 66 مەتر، ەنى 8 مەتر بولاتىن كوپىردە ءتۇرلى كولىكتەردىڭ جايلى وتۋىنە جاعداي جاسالعان.

قازاقستان پرەزيدەنتىنىڭ "ۇلت جوسپارى - 100 ناقتى قادام" باعدارلاماسى مەن "ماڭگىلىك ەل" يدەياسىنىڭ اياسىندا اۋىلداردى گۇلدەندىرۋ باستى مىندەتتەردىڭ ءبىرى ەكەندىگى اتالىپ كورسەتىلگەن بولاتىن.

قازىعۇرت اۋدانى اكىمىنىڭ ءباسپاسوز قىزمەتى

اباي-اقپارات