ريو 2016 وليمپياداسى اياقتالىپ، تورتجىلدىقتىڭ بايراقتى باسەكەسىنە ەل نامىسىن قورعاۋعا بارعان سپورتشىلارىمىز جالپى كوماندالىق ەسەپتە 22-ورىنعا تۇراقتادى. 104 سپورتشىنىڭ 17-ءى وليمپيادا جۇلدەسىن قانجىعالاپ قايتتى. سونىڭ ىشىندە قازاقستاننىڭ ءانۇرانى ريو تورىندە ءۇش رەت شىرقالدى.

ءجا، دودا دوداسىمەن بولعاندا، سالپالاقتاپ جەتىپ بارعان كوپ سپورتشىمىز جارىستا جەتىستىرمەدى.

ەستەرىڭىزگە سالا كەتەيىك، ريو وليمپياداسى بولاردان ءسال ەرتەرەكتە «Abai.kz» پورتالى ريودا ەل نامىسىن قورعايتىن سپورتشىلاردىڭ ساپىندا ەسىم-سويى ەلگە بەيمالىم، شەتەلدىك سپورتشىلاردىڭ باسىم بولعانىن جازعان بولاتىن. ول كەزدە تولىق ەمەس تىزىمدە (86 سپورتشى) بار بولعانى 26 قازاق سپورتشىسىن كورگەن ەدىك.

حوش، وزگە ۇلت بولسا دا قازاقستان توپراعىندا تۋىلسا ءبىر ءسارى دەر ەدىك. ال شەتەلدەن شاقىرتىپ،  اتتاي قالاپ، اتانداي سۇراپ العان سپورتشىلار ماڭىراق قويداي ساسقالاقتاپ، سىبانىپ سايىسا الماعانى وكىندىرەدى.

جاقىندا «informburo.kz» پورتالى قازاقستان اتىنان جارىسقا قاتىسقان لەگيونەرلەردىڭ ريوداعى جەتىستىكتەرىن ەسەپتەپ شىعىپتى.

1.       نۇريسلام ساناەۆ، ەركىن كۇرەس – رەسەي فەدەراتسياسى.

تۋعان جىلى, ايى، كۇنى: 2 اقپان 1991 جىل. 

تۋعان جەرى: تۋۆا

ناتيجەسى:  12 ورىن. 0 – جەڭىس، 2 – جەڭىلىس.

2.      جۇلدىز ەشيموۆا، ايەلدەر كۇرەسى – قىرعىزستان.

تۋعان جىلى، ايى، كۇنى: 1 اقپان 1988 جىل. 

تۋعان جەرى: بىشكەك

ناتيجەسى:  5 ورىن. 1 – جەڭىس، 2 – جەڭىلىس

3.      ارلي چونتەي، اۋىراتلەت – قىتاي، قىرعىزستان.

 تۋعان جىلى، ايى، كۇنى: 1 شىلدە 1992 جىل. 

تۋعان جەرى: نارىن

ناتيجەسى: 4-ورىن. 6 مۇمكىندىكتىڭ 3-ءىن عانا كوتەردى.

4.      فارحاد حاركي، اۋىراتلەت – قىتاي، قىرعىزستان.

تۋعان جىلى، ايى، كۇنى: 20 ءساۋىر 1991 جىل. 

تۋعان جەرى: رف، سامارا وبلىسى

ناتيجەسى: 3-ورىن. 6 مۇمكىندىكتىڭ 4-ءىن عانا كوتەرە المادى.

5.      نيدجات راحيموۆ، اۋىراتلەت – ءازىربايجان.

تۋعان جىلى، ايى، كۇنى: 13 تامىز 1993 جىل. 

تۋعان جەرى: باكۋ

ناتيجەسى: 1-ورىن. 6 مۇمكىندىكتىڭ 4-ءىن عانا كوتەرە المادى.

6.      ەلەنا پوتاپەنكو، بەسسايىس – ۋكراينا.

تۋعان جىلى، ايى، كۇنى: 20 ءساۋىر 1993 جىل. 

تۋعان جەرى: لۋگانسك وبلىسى

ناتيجەسى: 10-ورىن.

7.      گۇزەل مانيۋروۆا، ايەلدەر كۇرەسى – رەسەي.

تۋعان جىلى، ايى، كۇنى: 24 قاڭتار 1978 جىل. 

تۋعان جەرى: سارانسك وبلىسى

ناتيجەسى: 2-ورىن. 3 جەڭىس، 1 جەڭىلىس.

8.      وتگونتسەتسەگ گالبادراح، دزيۋدو – موڭعوليا.

تۋعان جىلى، ايى، كۇنى: 25 قاڭتار 1992 جىل. 

تۋعان جەرى: ۇلان باتىر

ناتيجەسى: 3-ورىن.

9.   ياروسلاۆا شۆەدوۆا، تەننيس – رەسەي. 

تۋعان جىلى، ايى، كۇنى: 12 قىركۇيەك  1987 جىل. 

تۋعان جەرى: ماسكەۋ

ناتيجەسى: ءبىرىنشى اينالىمدا جەڭىلىپ قالدى.

10.  گالينا ۆوسكوبوەۆا، تەننيس – رەسەي.

تۋعان جىلى، ايى، كۇنى:  18 قىركۇيەك 1984 جىل.

تۋعان جەرى: ماسكەۋ

ناتيجەسى: ءبىرىنشى اينالىمدا جەڭىلىپ قالدى.

11.  يليا موكرەتسوۆ، سەمسەرلەسۋ – رەسەي.

تۋعان جىلى، ايى، كۇنى:  17 ءساۋىر 1984 جىل.

تۋعان جەرى: قازان قالاسى

ناتيجەسى: ءبىرىنشى اينالىمدا جەڭىلىپ قالدى.

12.  پاۆەل يلياشەنكو، بەسسايىس – رەسەي.

تۋعان جىلى، ايى، كۇنى:  23 ماۋسىم 1990 جىل.

تۋعان جەرى: ۋفا قالاسى

ناتيجەسى: 36 سپورتشىنىڭ ىشىندە 35-ورىن.

13.  يننا كلينوۆا، بايداركادا ەسۋ، - ۋكراينا.

تۋعان جىلى، ايى، كۇنى:  13 مامىر 1986 جىل.

تۋعان جەرى: چەركاسسى قالاسى

ناتيجەسى: 10- ورىن.

14.  ۆيتالي حۋدياكوۆ، سۋ مارافونى – قىرعىزستان.

تۋعان جىلى، ايى، كۇنى:  7 تامىز 1994 جىل.

تۋعان جەرى: بىشكەك

ناتيجەسى: ءجۇزۋ بارىسىندا 2 رەت ەرەجەنى ورەسكەل بۇزعاندىعى ءۇشىن جارىستان شەتتەتىلگەن.

سونداعى 14 لەگيونەردىڭ تورتەۋى ەل قانجىعاسىنا وليمپيادا مەدالىن سالعان. 1 – التىن، 1 – كۇمىس جانە 2 – قولا.

ال ەندى ريو وليمپياداسىندا وزگە ەل اتىنان جارىسقا قاتىسقان قازاقستاندى سپورتشىلاردىڭ جەتىستىكتەرى از ەمەس ەكەن.

سوفيا ۆەليكايا (الماتى قالاسىنىڭ تۋماسى) رەسەي اتىنان شىقتى. جەكەلەي سەمسەرلەسۋدەن كۇمىس مەدال (2-ورىن) كوماندالىق سايىستا 1-ورىن.

ەلمۇرات تاسمۇراتوۆ (شىمكەنت قالاسىنىڭ تۋماسى), گرەك-ريم كۇرەسىنەن وزبەكستان اتىنان جارىسقا قاتىسىپ، 3-ورىن الدى. ەلمۇرا ريو وليمپياداسىنىڭ قولا جۇلدەگەرى.

كامران شاحسۋۆارلى (اقتوبە قالاسىنىڭ تۋماسى) ءاىزىربايجان اتىنان قاتىسىپ، بوكستان وليمپيادانىڭ قولا جۇلدەگەرى اتاندى.

نۇرزات توعجان

Abai.kz