«نۇر وتان» پارتياسى كەنتاۋ قالالىق فيليالىندا  قالا اكىمىنىڭ مىندەتىن اتقارۋشى نۇرجان تاشيموۆ جەكە ماسەلەلەرمەن جازىلعان ازاماتتاردى قابىلدادى. بۇل تۋرالى كەنتاۋ قالاسى اكىمىنىڭ ءباسپاسوز قىزمەتى حابارلايدى.

قابىلداۋعا كىرگەن سايا بايسوۆا س.بايتەرەكوۆ كوشەسىن جارىقتاندىرۋ قاجەتتىگىن ايتتى. سونداي-اق، بايتەرەكوۆ كوشەسى №3 كوپقاباتتى تۇرعىن ءۇيدىڭ شاتىرىنان سۋ وتەتىندىگىن جانە اۋىز سۋ جوعارى قاباتقا كوتەرىلمەيتىندىگىن، اۋلاعا ويىن الاڭشاسى كەرەكتىگىن جەتكىزدى. ال، س.سەيفۋللين كوشەسىنىڭ تۇرعىنى كولىك جايعا جەر تەلىمىن ءبولۋدى سۇرادى. قارت كەنشى سەيدۋللا بورانباەۆ تۇرعىلىقتى ءۇيىنىڭ اپاتتى جاعدايدا تۇرعانىن ايتىپ، ماسەلەنى شەشىپ بەرۋىن ءوتىندى. ناحيموۆ ءمۇيىسىنىڭ تۇرعىنى تورەحان سەراليەۆ سۋ قۇبىرىنىڭ ماسەلەسىن جەتكىزسە، حانتاعى اۋىلى بىرلىك كوشەسىنىڭ تۇرعىندارىنىڭ اتىنان ءسوز العان بولاتقالي نۇرپەيىسوۆ جىلۋ، جارىقتاندىرۋ، اسفالت توسەۋ كەرەكتىگىن ءسوز ەتتى.

تۇرعىنداردىڭ ءوتىنىشىن مۇقيات تىڭداعان نۇرجان پولاتۇلى ماسەلەلەردىڭ زاڭعا سايكەس وڭتايلى شەشىلۋ بارىسىن ايتىپ، سالا ماماندارىنا ناقتى تاپسىرمالار بەردى. جۇمىس سۇراپ كەلگەن ازامات «كەنتاۋ تازالىق» مەكەمەسىنە جۇمىسقا ورنالاساتىن بولدى. ال، كەيبىر جايتتار بويىنشا تۇرعىندارعا زاڭ اياسىندا تۇسىنىكتەمەلەر بەرىلدى.

Abai.kz