قازىعۇرت اۋدانى اۋماعىنان وتەتىن رەسپۋبليكالىق ماڭىزى بار "الماتى-تەرمەز" اۆتوماگيسترال جولىندا ورنالاسقان 94 نىسانعا زەردەلەۋ جۇمىستارى جۇرگىزىلىپ، قر اۆتوموبيل جولدارى تۋرالى زاڭناماسىنا سايكەس تۇسىنىك جۇمىستارىن جۇرگىزۋ ناتيجەسىندە زاڭسىز سالىنعان 20 نىسان بۇزىلدى. بۇل تۋرالى «Abai.kz» پورتالى وڭتۇستىك قازاقستان وبلىسى اكىمى ءباسپاسوز قىزمەتىنىڭ «فەيسبۋك» جەلىسىندەگى رەسمي پاراقشاسىنا سىلتەمە جاساي وتىرىپ حابارلايدى.

سونىمەن قاتار، شاراپحانا اۋىلى وكرۋگىنەن وتكەن رەسپۋبليكالىق ماڭىزى بار اۆتوماگيسترال جولىنىڭ 741-785 شاقىرىمى بويىنداعى زاڭسىز سالىنعان نىساندارى مەملەكەتتىك قۇرىلىس نورمالارى مەن ەرەجەلەرىنىڭ تالاپتارىن ساقتاماي سالىنعان 14 قۇرىلىس نىساندارىن وقو ساۋلەت-قۇرىلىس باقىلاۋى باسقارماسىنا زاڭدىلىعىن تەكسەرىپ، ءتيىستى شارا قولدانۋ ءۇشىن حاتتار جولدانىپ، ەسكەرتۋ حاتتار بەرىلدى.

بۇگىنگى تاڭعا 8 نىسان يەلەرى سوتقا تاپسىرىلدى. ونىڭ 5-نە ايىپپۇل سالىنىپ، بۇزىلۋعا شەشىم شىعارىلدى. ال 3 نىسان سوتتا قارالىپ جاتسا، 1 نىسان يەسى ءوز ەركىمەن بۇزدى. قالعان نىساندار بويىنشا قايتا وقو ساۋلەت-قۇرىلىس باقىلاۋ باسقارماسىنا زاڭدىلىعىن تەكسەرۋگە جولدانىپ، وسى جىلدىڭ 22 تامىزى كۇنى سوتقا تاپسىرىلادى دەپ كۇتىلۋدە.

رەسپۋبليكالىق ماڭىزى بار «الماتى-تەرمەز» اۆتوماگيسترالى جولىنىڭ بويىنان زاماناۋي تالاپقا سايكەس ساۋدا ورتالىعىن سالۋعا جوبالىق سمەتالىق قۇجاتى ازىرلەنىپ، جالپى ەگجەي-تەگجەي جوسپارىن ازىرلەۋگە وبلىستىق بيۋدجەتتەن قارجى قارالىپ وتىر.

Abai.kz