قازاقستاننىڭ بىرقاتار جوو-ى مەملەكەتتىك ءبىلىم گرانتتارىن الا الماي قالعان 45 «التىن بەلگى» يەگەرلەرىن ءوز قاراجاتى ەسەبىنەن وقىتۋعا دايىن ەكەندىكتەرىن مالىمدەدى.

قازاقستان رەسۋبليكاسى ءبىلىم جانە عىلىم مينيسترلىگى مەن جوعارى وقۋ ورىندارى مەملەكەتتىك ءبىلىم گرانتتارىن الا الماي قالعان 45 «التىن بەلگى» يەگەرلەرىن تەگىن وقىتۋ مۇمكىندىكتەرىن تالقىلادى. بۇل يگى باستامانى ونشاقتى قازاقستاندىق جوو رەكتورلارى قولداپ، بۇگىن ولاردىڭ بولگەلى وتىرعان گرانتتىق ورىندار سانى دا بەلگىلى بولدى: ءال-فارابي اتىنداعى قازاق ۇلتتىق ۋنيۆەرسيتەتى – 10,  تۇران ۋنيۆەرسيتەتى – 10, ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتى – 1, قازاق مەملەكەتتىك زاڭ ۋنيۆەرسيتەتى – 15, نارحوز ۋنيۆەرسيتەتى – 3, س. دەميرەل اتىنداعى ۋنيۆەرسيتەت – 2, ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى - 1, الماتى مەنەدجمەنت ۋنيۆەرسيتەتى – 1, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى – 2 ورىن بولەتىن بولدى.

قر ءبىلىم جانە عىلىم مينيسترلىگى جوو-نىڭ مۇنداي باستامانى قولداپ، قوعامعا، جۇمىس بەرۋشىلەر مەن تۇلەكتەرگە كورسەتكەن الەۋمەتتىك جاۋاپكەرشىلىك ۇلگىسى ءۇشىن العىسىن بىلدىرەدى. ويتكەنى، ۇزدىك وقىپ، ۇبت بارىسىندا «التىن بەلگىگە» لايىق جوعارى ءبىلىم دەڭگەيىن راستاعان مەكتەپ تۇلەكتەرى وقۋلارىن تەگىن جالعاستىرۋ مۇمكىندىگىنەن ايىرىلۋى مۇمكىن ەدى. مۇنداي جاعداي «التىن بەلگى» يەلەرىنىڭ باسەكەلەستىك دەڭگەيى جوعارى،  ءارى مەملەكەتتىك تاپسىرىسى از بولىنەتىن ماماندىقتاردى تاڭداۋلارىنان تۋىنداپ وتىر.

وسىلايشا، بيىل مەملەكەتتىك ءبىلىم گرانتتارىن الا الماي قالعان 45 «التىن بەلگى» يەگەرىنىڭ 19-ى ەكونوميكالىق، 8-ءى – حالىقارالىق قاتىناستار، 14-ءى – زاڭگەرلىك، 4-ءى – اۋدارماشىلىق ماماندىقتارىن تاڭداعان. ال ەلىمىزدە مەملەكەتتىك ءبىلىم گرانتتارىنىڭ نەگىزگى بولىگى ەڭبەك نارىعىندا سۇرانىسى جوعارى، ەل ەكونوميكاسىنا اسا قاجەتتى تەحنيكالىق جانە تەحنولوگيالىق ماماندىقتارعا، اتاپ ايتقاندا، كولىك تەحنيكاسى، قۇرىلىس، راديوتەحنيكا، ەلەكترونيكا، تەلەكوممۋنيكاتسيالار، نانوتەحنولوگيالار، ت.س.س. كوپتەگەن باسقا ماماندىقتارعا بولىنگەن.

نۇرگەلدى ابدىعانيۇلى

Abai.kz