رەسەيدە تەراكت ازىرلەگەن دەگەن كۇدىكپەن ورتالىق ازيا تۇرعىندارى ۇستالدى
رەسەيدىڭ فەدەرالدىق قاۋىپسىزدىك قىزمەتى ماسكەۋ جانە سانكت-پەتەربۋرگ قالالارىنىڭ ادام كوپ تۇراتىن اۋداندارىندا جارىلىس ۇيىمداستىرۋدى كوزدەگەن تەررورلىق توپتىڭ ون مۇشەسىن قاماۋعا الدى. بۇل تۋرالى فەدەرالدىق مەكەمەنىڭ ءباسپاسوز قىزمەتىنە سىلتەمە جاساپ ريا نوۆوستي حابارلادى.
فقق مالىمدەمەسى بويىنشا، سودىرلار "قولدان جاسالعان اسا قۋاتتى جارىلعىش زاتتارمەن بىرنەشە تەررورلىق شابۋىل جاساۋدى" جوسپارلاعان.
ريا نوۆوستي اگەنتتىگىنىڭ حابارلاۋىنشا، كۇدىكتىلەردى ۇستاۋ وپەراتسياسى كەزىندە قولدان جاسالعان ءتورت بومبا، قارۋ-جاراق جانە بايلانىس قۇرالدارى تابىلدى.
فەدەرالدىق قاۋىپسىزدىك قىزمەتى قىلمىستىق توپ قۇرامىندا ورتالىق ازيا ەلدەرىنىڭ تۇرعىندارى بار ەكەنىن راستادى. وپەراتسيانى تاجىكستان جانە قىرعىزستاننىڭ ارنايى قىزمەتتەرى مەن رەسەيدىڭ ءىىم بىرلەسىپ وتكىزدى.
قولعا تۇسكەن كۇدىكتىلەر تەرگەلىپ جاتىر. تەرگەۋ مالىمەتى بويىنشا، ولار تىيىم سالىنعان "يسلام مەملەكەتى" تەررورلىق ۇيىمىمەن بايلانىس ورناتقاندارىن مويىنداعان.
Abai.kz
