كەشە، 10 قاراشا الاشتىڭ ءاليحانىنىڭ ارۋاعى ءبىر اۋناپ تۇسكەن كۇن بولدى. ءتور قالامىز - استانانىڭ تورىندەگى ۇلتتىق مۋزەيدە ءاليحان بوكەيحاننىڭ 150 جىلدىعى مەن ەل تاۋەلسىزدىگىنىڭ 25 جىلدىعىنا ارنالعان ء"اليحان بوكەيحان: الاش مۇراتى جانە تاۋەلسىزدىك قۇندىلىعى" اتتى عىلىمي-پراكتيكالىق كونفەرەنتسيا ءوتتى. القالى جيىندا الەكەڭنىڭ ءومىرى، قوعامداعى ءرولى، قىزمەتى، تاۋەلسىزدىك جولىنداعى كۇرەسى، عىلىمنىڭ سالالارىنا سىڭىرگەن ەڭبەگى جانە. ت.ب. اڭگىمە وزەگىنە اينالدى. ەڭ باستىسى، استانا قالالىق اكىمدىگى، قالالىق تىلدەردى دامىتۋ باسقارماسى ۇلتتىق مۋزەيمەن بىرلەسىپ ۇيىمداستىرعان باسقوسۋدا الەكەڭنىڭ ارۋاعىنا ارنالىپ اس بەرىلىپ، قۇران باعىشتالدى. بۇل -ەلىمىزدىڭ رۋحاني ومىرىندەگى ۇلكەن جاڭالىق.

بىراق... جايشىلىقتا "قاتتى جەلدەن اعاش قۇلادى" نەمەسە "استاناعا قالىڭ قار جاۋدى" دەگەندى دابىرايتىپ تالاسا-تارماسا جاڭالىق ەتىپ تاراتاتىن ءورىستىلدى جانە قازاقتىلدى باق-تاردىڭ ەشبىرەۋى ءلام-ميم دەپ "اۋزىن اشپادى". اقساقال باسىلىم - "ەگەمەن قازاقستان" گازەتىنىڭ سايتى عانا ۇلكەن فوتوسۋرەتتەرمەن شاعىن اقپارات بەردى. سوندا دەيمىز-اۋ، ۇلت كوسەمى - الەكەڭنىڭ 150 جىلدىق تويىنان اقپارات بەرمەگەن سايتتار "اتاسىنىڭ باسىنان اقپارات بەرە" مە؟؟؟ القالى جيىندا قانشاما رۋحتى بايانداما وقىلىپ، پاراساتتى پىكىرلەر ايتىلدى. الەكەڭنىڭ ءبىز بىلمەيتىن قانشاما قىرى اشىلدى. بىراق... مۇنداي وقيعا ءبىزدىڭ باس شۇلعىعىش باق-تاردى قىزىقتىرماعان ەكەن. ولاي دەيتىنىم، كەشكىلىك عالامتورداعى سايتتاردان الەكەڭنىڭ تويى جونىندە كىم، قانداي اقپارات بەردى ەكەن دەپ ىزدەپ ەدىم، "ەگەمەننەن" وزگە ەشكىمدى تاپپادىم. بۇل نە دەگەن ماسقارا؟

اقتوعاي مەن قارقارالىدا، سەمەيدە الەكەڭە قاتىستى دەرەك جوق!

ۇلتتىق مۋزەيدە وتكەن ء"اليحان بوكەيحان: الاش مۇراتى جانە تاۋەلسىزدىك قۇندىلىعى" اتتى حالىقارالىق عىلىمي-پراكتيكالىق كونفەرەنتسيادا بايانداما جاساعان ادەبيەتتانۋشى-عالىم ايگۇل ىسىماقوۆا الەكەڭە قاتىستى ادىلەتسىزدىكتىڭ وزىمىزدەن باستالاتىنىن سانالى جانداردىڭ جۇرەگىنە باتىرىپ ايتتى. ەل تاۋەلسىزدىگىنىڭ 25 جىلدىعى مەن الەكەڭنىڭ 150 جىلدىعىنا وراي قازگەو ۇيىمداستىرعان ء"اليحان بوكەيحان ىزىمەن" اتتى ەكسپەديتسيانىڭ قۇرامىندا بولعان ايگۇل حانىم جاعا ۇستاتارلىق جاعدايلارعا تاپ بولىپتى. "مەنىڭ قاتتى جانىما باتقانى - الەكەڭ تۋرالى اقتوعايدا، قارقارالىدا، سەمەيدە دەرەك جوق بولىپ شىقتى. مىسالى، قارقارالىدا الەكەڭ وقىعان مەكتەپتىڭ ەسكى عيماراتى بار. ول جەر قازىر دۇكەنگە اينالىپتى. ءبىز انىق-قانىعىن بىلمەك بولىپ، جەرگىلىكتى بيلىكتەن سۇراپ ەدىك، ولار ەشتەڭە ايتا المادى. سەمەيدە دە الاش تۋرالى اقپارات كوپ، بىراق الەكەڭ قاتىستى ەشقانداي جاڭا دەرەك كەزدەستىرمەدىك",- دەدى ا. ىسىماقوۆا. اتاپ ايتارلىعى، القالى جيىنداعى ەڭ مازمۇندى، قىزىقتى بايانداما وسى ايگۇل حانىمدىكى بولدى. وكىنىشتىسى، مودەراتور بولعان استانا قالالىق تىلدەردى دامىتۋ باسقارماسىنىڭ باستىعى تىلەۋعالي قىشقاشباەۆ باياندامانى ء"ۇزىپ" تاستادى.

الەكەڭنىڭ شىعارمالارىن باسىپ شىعارۋعا سوقىر تىيىن بولىنبەگەن!

ءسۇيىنشى، اعايىن! كەشە ەلوردامىزدىڭ تورىندەگى ۇلتتىق مۋزەيدە الاش كوسەمى ءاليحان بوكەيحاننىڭ ءومىرى مەن قىزمەتىنە ارنالعان قازاق جانە ورىس تىلدەرىندەگى قوس تومدىقتىڭ تۇساۋى كەسىلدى. قۇندى دۇنيەنىڭ اۆتورى - تانىمال الاشتانۋشى عالىم، "الاش" رۋحاني-مادەني دامۋ ينستيتۋتىنىڭ ديرەكتورى سۇلتانحان اققۇلۇلى. ەكى تومدىق شىعارمانىڭ العاشقىسى "قازاق جەرىنىڭ جوقشىسى", ەكىنشىسى - "امانات" دەپ اتالعان. ورىسشاسى "تۆورەتس يستوري" جانە "زاۆەششانيە" دەپ اتالادى. جاڭا كىتاپتاردىڭ تۇساۋىن فيلولوگ-عالىم، اكادەميك سەيىت قاسقاباسوۆ پەن جازۋشى-دراماتۋرگ، استانا قالاسى اكىمىنىڭ ورىنباسارى ەرمەك امانشاەۆ بىرگە كەستى. ەڭ وكىنىشتىسى، سۇلتانحان اققۇلۇلى 17 ملن. حالىققا بۇل كىتاپتار نەبارى 400 دانامەن عانا تارالاتىنىن ايتىپ، قاتتى قىنجىلدى. ايتپاقشى، سۇلتەكەڭ الەكەڭنىڭ 150 جىلدىق مەرەيتويى جىلىندا بيۋدجەتتەن كىتاپ شىعارۋعا سوقىر تىيىن دا بولىنبەگەنىن، قوس تومدىق جەكەلەگەن ازاماتتاردىڭ قاراجاتىنا شىققانىن اشىنىپ جەتكىزدى. ول كەلەر جىلى الاشتىڭ 100 جىلدىعىنا وراي، وسى كىتاپتاردى اعىلشىن، تۇرىك، ۋكراين تىلدەرىنە اۋدارۋ جوسپارلانعانىن حابارلادى.

تولەن تىلەۋباي، استانا

Abai.kz