قىرعىزستان الكوگول ساۋداسىنا تءۇنگى ساعات 23-تەن تاڭەرتەڭگى 8-گە دەيىن تىيىم سالۋ تۋرالى ۇسىنىستى تالقىلايدى. بۇل تۋرالى بىشكەكتەگى باسپاسءوز مءاسليحاتىندا پارلامەنت دەپۋتاتى داستان بەكەشەۆ حابارلادى.

ونىڭ ايتۋىنشا، دۇكەندەردە، سۋپەرماركەتتەردە جانە دۇڭگىرشەكتەردە سپيرتتىك ىشىمدىكتەردىڭ بولشەك ساۋداسىنا تىيىم سالۋ تۋرالى ۇسىنىس ءتۇستى. بىراق ساۋىق ورتالىقتارىندا الكوگولدىك ىشىمدىكتەرگە شەكتەۋ قويىلمايدى.

بەكەشەۆتىڭ ايتۋىنشا، الكوگول ەسىرتكىنىڭ جەڭىل تۇرلەرىنەن الدەقايدا قاۋىپتىرەك. دەپۋتات مالىمەتى بويىنشا، تۇرعىندار ەسىرتكىگە قاراعاندا، ماساڭ كۇيدە جول كولىك اپاتىنا ءجيى ۇشىراپ جاتادى.

بۇل زاڭنىڭ ايماقتاردا ساقتالۋىنا توقتالعان دەپۋتات الكوگول ساۋداسىنا اۋىل تۇرعىندارىنىڭ وزدەرى تىيىم سالاتىنىن، بۇل ماسەلە قالادا كۇردەلى ەكەنىن ايتتى.

Abai.kz