• ءماجىلىستىڭ كوشپەلى وتىرىسى الماتىعا كەلدى.
• قالامگەرلەردى قولداۋ بانكتەر ەسەبىنەن جۇرگىزىلە مە؟
• 193 ميلليون قايدا كەتتى؟
• يمانعالي نۇرعاليۇلى تاسماعامبەتوۆ بىرقاتار مينيسترلىك وكىلدەرىن جيناپ ءدال وسى ماسەلەنى شەشۋدى تاپسىردى.

كەشە قر پارلامەنتى ءماجىلىسىنىڭ كوشپەلى وتىرىسى الماتىعا كەلدى. «مادەنيەت تۋرالى» زاڭنىڭ كەم-كەتىگىن تولىقتىرۋ ماسەلەلەرىن تالقىلاعان القا-قوتان جيىنىن  ۆيتسە-سپيكەر گۇلميرا يسينباەۆا اشىپ، قالاماقى مەن قوعامدىق ماڭىزدى كىتاپتار شىعارۋ ماسەلەلەرىنە كوبىرەك توقتالدى.

ءماجىلىس دەپۋتاتتارى بەكبولات تىلەۋحان مەن مايرا ايسينا مادەنيەت مينيسترلىگىنىڭ كىتاپتاردى باسىپ شىعارۋ مەن تاراتۋ قۇزىرەتىن كەڭەيتۋدى جانە جازۋشىلارعا قالاماقى تاعايىنداۋدى ۇسىندى.

الماتىداعى جيىنعا كەلگەن زيالى قاۋىم وكىلدەرىن دە كوپتەن مازالاپ جۇرگەن ماسەلە قالاماقىنىڭ جوقتىعى بولسا كەرەك، قر جازۋشىلار وداعىنىڭ توراعاسى نۇرلان ورازالين باستاعان، ولجاس سۇلەيمەنوۆ، الىبەك اسقارلار قوستاعان ءبىر توپ قالامگەر دەپۋتاتتاردىڭ دەگەندەرىن قۇپتاپ، ءوز پىكىرلەرىن ايتتى.

ولجاس سۇلەيمەنوۆ، اقىن:

- مەن 25 جىلدا مەملەكەتتەن ءبىر تيىن قالاماقى الماعان جازۋشىمىن. بۇرىن جازۋشىلىق كادىمگىدەي ماماندىق ەدى. ءبىز ماقتانۋشى ەدىك. مەن كاسىپقوي جازۋشىمىن. قازاق ادەبيەتىن، ونداعى قالامگەرلەردى ولتىرمەۋىمىز كەرەك. ول ءۇشىن مەملەكەت قالامگەرلەردى، ولاردىڭ جازاتىن كىتاپتارىن قامقورلىعىنا الۋى كەرەك. وسى رەتتە بىزگە يتاليانىڭ تاجىريبەسىن قولدانۋ كەرەك سەكىلدى. بۇل ەلدە جەكەمەنشىك بانكتەر تابىستىڭ ءبىر بولىگىن تاۋەلسىز قوعامدىق مادەنيەت قورلارىنا اۋدارىپ وتىرادى. بۇل قاراجات كلاسسيكالىق ادەبيەتتى قولداۋعا جۇمسالادى. بءىزدىڭ دە بانكتەر تابىسىنىڭ از بولىگىن وسىندا اۋدارىپ وتىرسا، تاقىرعا ۇشىراپ قالماس ەدى. مەن وسىدان بىرنەشە جىل بۇرىن نۇرسۇلتان ءابىشۇلىنىڭ قابىلداۋىندا بولعاندا وسى ماسەلەنى توتەسىنەن قويعان بولاتىنمىن. ول كەزدە ەلباسى قوس پالاتاعا تاپسىرما بەردى. بىراق، نەگە ەكەنى بەلگىسىز، ماسەلە شەشىلگەن جوق. قازىرگى زاڭدا «باسىپ شاعارۋ ءۇشىن» دەگەن عانا ءسوز بار. مەملەكەت كىتاپتى باسىپ شىعارۋ ءۇشىن اقشا بەرەدى. ال ونى كوز مايىن تاۋىسىپ جازاتىن قالامگەر تۋرالى ء«لام-ميم» دەمەيدى. جازۋشى بولماسا كىتاپ قايدان بولسىن؟.. ادەبيەتتى دامىتۋ، ونى قولداۋ – ۇلتتى ورىستەتۋدىڭ جولى.

الىبەك اسقار، قر «ۇلتتىق مەملەكەتتىك كىتاپ پالاتاسى» مم ديرەكتورى:

- جاس قالامگەر ولجاس قاسىم دەگەن ءىنىم كىتاپ شىعارىپ،  5 باسپا تاباعى ءۇشىن 25 مىڭ تەڭگە قالاماقى الىپتى. جارىقتىق، ول ولجاستىڭ بەس جىل جازعان ەڭبەگى شىعار. سونشاما ەڭبەگىنە بار بولعانى جيىرما بەس مىڭ تەڭگە الۋى كۇلكىلى عوي. قالاماقى ماسەلەسىن ايتا-ايتا جاۋىر بولدىق. جاقىن ارادا شەشىلىپ قالاتىن ءتۇرى بار سىڭايلى. قالاماقى بەرىلۋى كەرەك. ءبىر كەزدەرى مەملەكەتتەن قالامگەرلەرگە دەپ 193 ميلليون تەڭگە بولىنگەن ەدى. كەيىن سول بولىنگەن اقشانىڭ ءىزىن تاپپاي قالدىق. سويتسەك، مينيسترلىكتىڭ ىشىندە تالان-تاراجعا ءتۇسىپ كەتىپتى. ەندى وسى جولى دا سول قايتالانباس ءۇشىن، وسى زاڭ جوباسىن ءجىتى پىسىقتاپ الساق دۇرىس بولار ەدى. ەگەر بۇگىن ايتىلعانداي جازۋشىلارعا قالاماقى بەرىلەتىن بولسا – بۇل 25 جىلدا جەتكەن ەڭ ۇلكەن جاقسىلىق بولار ەدى.

گۇلميرا يسينباەۆا، قر پارلامەنتى ءماجىلىسىنىڭ ۆيتسە-سپيكەرى:

- بۇل زاڭ جوباسىن ءبىز ازىرلەپ، ۇكىمەتكە ۇسىندىق. قازىر بۇل دەپۋتاتتىق كورپۋستان كەتتى. وتكەندە ۇكىمەت باسشىسىنىڭ ورىنباسارى يمانعالي نۇرعاليۇلى تاسماعامبەتوۆ بىرقاتار مينيسترلىك وكىلدەرىن جيناپ (قر قارجى، قر ادىلەت، قر مادەنيەت جانە سپورت، قر ۇلتتىق ەكونوميكا مينيسترلىكتەرى) ءدال وسى ماسەلەنى شەشۋدى تاپسىردى.

ءبىز ۇسىنعان زاڭ جوباسى بويىنشا، مادەنيەت جانە سپورت مينيسترلىگى كىتاپتى ساتىپ الىپ، باسىپ شىعارۋمەن تىكەلەي اينالىساتىن بولادى. وسى ماقساتتا مينيسترلىك جانىنان ارنايى كوميسسيا قۇرىلىپ، ساتىپ الىناتىن كىتاپتاردى انىقتايتىن بولادى. سونداي-اق، اۆتورعا كىتاپتىڭ 1 باسپا تاباعى ءۇشىن 150 مىڭ تەڭگە كولەمىندە قالاماقى تاعايىندالاتىن بولادى. ءبىز اۋەلدە 3 جىلدىق جوسپار بويىنشا قالاماقى ءۇشىن بيۋدجەتتەن 4 ميلليارد 919 ميلليون تەڭگە قاجەت بولادى ەكەن. بۇل ۇسىنىسىمىزدى يمانعالي نۇرعاليۇلى قولدادى. قازىر جوعارىدا اتالعان مينيسترلىكتەر زاڭ جوباسىنىڭ رەداكتسياسىن ازىرلەپ جاتىر.

ءتۇيىن: ءماجىلىستىڭ ءبىر توپ دەپۋتاتى الماتىعا ات باسىن بۇرعاندا قوردالانىپ جاتقان كوپ ماسەلە تالقىعا سالىندى.

ءاسانالى ءاشىموۆ باستاعان ءبىر توپ ونەر مايتالماندارى مادەنيەتتەگى كەتەۋى كەتىپ تۇرعان ماسەلەلەرىن ورتاعا سالسا، ادەبيەتشىلەر قاۋىمىنىڭ كوڭىلىن كۇپتى ەتىپ جۇرگەن قالاماقى ماسەلەسى، تيراجدىڭ ازدىعى سەكىلدى تاقىرىپتار ءسوز ەتىلدى. ءماجىلىستىڭ ۆيتسە-سپيكەرى گۇلميرا يسينباەۆ قالاماقى ماسەلەسىنىڭ بيىل جەلتوقسان ايىنان قالماي شەشىلەتىنىن ايتىپ، بۇل ىسكە قولداۋ كورسەتكەن ەلباسى نۇرسۇلتان ءابىشۇلى مەن ۆيتسە-پرەمەر يمانعالي تاسماعامبەتوۆكە العىسىن جەتكىزدى.

سونىمەن، ورازالين مىرزا ءماجىلىس مىنبەرىندە ءجۇرىپ مىڭ مارتە ءسوز ەتكەن وسى ءىستىڭ كۇرمەۋى شەشىلەتىن، قالامگەرلەر قالاماقىعا قارىق بولاتىن كۇن الىس ەمەس سياقتى. كۇتەيىك.

كوشپەلى وتىرىس جيىنىنان نۇرگەلدى ابدىعانيۇلى

Abai.kz