قورتىندىسى جاسالىپ، جىل ەسەبى جاسالىپ جاتقان شاقتا ەرەكشە اتاپ وتەتىن نارسە ول -  جەر يگەرۋشىلەر سانىنىڭ ارتىپ كەلە جاتقاندىعى. بيىلعى جىلى وڭتۇستىك قازاقستان وبلىسىنداعى بىرقاتار اۋدانداردا بوس جاتقان جەرلەردى ءوز قارجىسىنا الىپ، كاسىپ كوزىن اشىپ جاتقان بيزنەسمەندەردىڭ قاتارى ءوستى. ماسەلەن، ءبىر عانا شىمكەنتتىڭ وزىندە مۇنداي شارۋاشىلىق اشقان جاندار وتە كوپ. وڭتۇستىك وڭىرىندە شاعىن جانە ورتا بيزنەس قارقىندى دامىپ كەلەدى. بۇل شىمكەنتتە ۇيىمداستىرىلعان ينۆەستيتسيالىق جوبالار كورمەسى كەزىندە انىق بايقالدى. وندا جەرگىلىكتى جانە وزگە ايماق، مەملەكەتتەن ارنايى كەلگەن كاسىپكەرلەر كاسىبىن دوڭگەلەتۋگە مول مۇمكىندىك العان ەدى. ماسەلەن، ەكاتەرينبۋرگتەن كەلگەن كاسىپكەرلەردىڭ كومىر قالدىقتارى مەن مال كوڭىن وڭدەۋ ارقىلى جىلۋ قۋاتىن الۋ يدەياسى كوپشىلىكتى قىزىقتىرعانى ەسىمىزدە.

احان ورازاليەۆ، «بيوسترويسەرۆيس» ااق ديرەكتورى:ء «بىزدىڭ قۇرىلعىمىزعا «ورداباسى قۇس» سەرىكتەستىگى جانە قالا، اۋدان اكىمدىكتەرىنىڭ وكىلدەرى قىزىعۋشىلىق تانىتتى. جاسىل ەكونوميكانى جۇزەگە اسىرۋعا باعىتتالعان جوبامىز » ەكسپو-2017″ كورمەسىندە دە ءوز ورنىن تاباتىنىنا سەنىمدىمىز».

ول شارا بارىسىندا كورمەگە قاتىسۋشىلار كەلىسىم-شارتتار تۇزۋگە دە، قارجى ينستيتۋتتارىنىڭ كومەگىنە جۇگىنۋگە دە مۇمكىندىك العان ەدى.

ساپاربەك تۇياقباەۆ، وبلىس اكىمىنىڭ ورىنباسارى: «كورمەدە وڭتۇستىك قازاقستان وبلىسىنىڭ الەۋەتىن بارىنشا تولىق كورسەتۋگە تىرىستىق. كاسىپكەرلەرگە قولداۋ كورسەتۋ ماقساتىندا ەكىنشى دەڭگەيدەگى بانكتەر، قارجى ينستيتۋتتارى، جەرگىلىكتى اكىمدەر دە ارنايى شاقىرىلدى. ءتيىمدى جوبالاردى قولداۋعا وبلىس اكىمدىگى دە دايىن. ويتكەنى، شاعىن جانە ورتا بيزنەس دامىسا، ءوڭىردىڭ ەكونوميكالىق احۋالى دا ارتادى.سوندىقتان جۇمىس ىستەيمىن دەگەن ازاماتتارعا ۇكىمەت تاراپىنان دا، جەرگىلىكتى بيلىك تاراپىنان دا كومەك كورسەتىلەدى.»

وسىلايشا ءوز ءىسىن اشامىن دەگەن ازاماتتارعا وبلىس اكىمدىگى بيىل دا  بارلىق جاعدايدى جاسادى. جەر قويناۋىن، يندۋستريالدىق ايماقتاردا جەر تەلىمىن تەگىن پايدالانۋعا مۇمكىندىك بار. وعان قوسا قۇجاتتاردى راسىمدەۋ، مامانداردىڭ كەڭەسى ءبىر تەرەزە قاعيداسى اياسىندا جۇزەگە استى.

اباي-اقپارات