وقو اۋداندارىنىڭ ەكونوميكالىق-شارۋاشىلىق باعىتى ءارتۇرلى بولىپ كەلەدى. كەيبىر اۋىلدىق وكرۋگتەردە بىرنەشە زاۋىتتار بار. ماسەلەن، وقو، ورداباسى اۋدانى، بادام اۋىلى  اۋدانداعى ەڭ ۇلكەن اۋىلدىق وكرۋگ ەسەپتەلەدى. حالقىنىڭ سانى — 15400. وزبەكستاننان 400-دەن استام وتباسى كوشىپ كەلىپ، قونىستانعان. اۋىل اكىمى ماحمۋد قونىسوۆتىڭ ايتۋىنشا، كەلەشەكتە بادام يندۋستريالدى ايماققا اينالماق. قازىردىڭ وزىندە اۋىلدا ۇلكەندى-كىشىلى 17 زاۋىت جۇمىس ىستەيدى. الداعى ۋاقىتتا تاعى 16 ءىرى زاۋىتتاردىڭ قۇرىلىسى جۇرگىزىلەدى دەگەن جوسپار بار. «بورتە ميلكا» جشس ىسكە قوسقالى وتىرعان سيىر فەرماسىنداعى جۇمىستاردىڭ بارلىعى كومپيۋتەر ارقىلى اتقارىلادى. سيىردىڭ جەلىنىن اۆتوماتتىڭ ءوزى تاۋىپ، ءوزى ساۋادى. ەگەر سيىر اۋىرىپ، تەمپەراتۋراسى كوتەرىلىپ تۇرعان بولسا، كومپيۋتەر ونى ساۋدان باس تارتادى. سونداي-اق، اۋىلدىق وكرۋگتە بىرنەشە قىش زاۋىتى بار، نان ونىمدەرىن وندىرۋمەن اينالىساتىن «ورداباسى نان» مەكەمەسى جۇمىس ىستەيدى. ونىڭ بەلگيالىق قۇرال-جابدىقتارىمەن جابدىقتالعان ديىرمەنىنەن شىققان ۇننىڭ ساپاسى وتە جوعارى باعالانادى. ول دا كومپيۋتەرمەن باسقارىلادى. ءبىر توننا بيدايدان قانشا كەبەك، قانشا جوعارى، ءبىرىنشى جانە ەكىنشى سۇرىپتى ۇن شىعاتىنىن دالمە-ءدال ەسەپتەپ بەرەدى. ال بيدايدى سولتۇستىك قازاقستاننان تاسىمالدايدى. اتى رەسپۋبليكاعا تانىمال «ورداباسى قۇس» شارۋاشىلىعىندا كۇركەتاۋىق ەتىنىڭ 16-18 ءتۇرلى ءونىمى شىعارادى. شۇجىقتىڭ دا قانشاما ءتۇرى وندىرىلەدى. وزدەرىنىڭ فيرمالىق دۇكەندەرى جۇمىس ىستەيدى. ءبىز وسىنىڭ بارلىعىن اڭگىمە ەتۋ بارىسىندا اۋىل اكىمىنە «وسىنشاما ءوندىرىس ورىندارى بار اۋىلدا جۇمىسپەن قامتۋ ماسەلەسى تولىعىمەن شەشىمىن تاپقان بولار» دەگەن ساۋال قويدىق.

— بىزدە جۇمىسسىزدىق دەگەن پروبلەما جوق، — دەدى اۋىلدىق وكرۋگ اكىمى ماحمۋد قونىسوۆ.  — ويتكەنى وسىنشا ءوندىرىس وشاقتارى بولا تۇرا تۇرعىنداردىڭ جۇمىسسىز وتىرۋى مۇمكىن ەمەس. ارينە، از قامتىلعان وتباسىلار بار، بىراق ەكى قولعا ءبىر كۇرەك تاپپاي ساندالىپ جۇرگەن ادامدى كەزدەستىرمەيسىز. سونىسىنا قاراي اۋىلدا قىلمىس تا از. ارا-تۇرا مال ۇرلىعى بولىپ تۇراتىنىن جاسىرا المايمىز، بىراق قاساقانا جاسالعان قىلمىستار ءجيى ورىن الا بەرمەيدى، - دەيدى اۋىل اكىمى.

Abai.kz