«نۇر وتان» پارتياسى وقو فيليالىنىڭ وكىلى نۇركەن الىمقۇلوۆ جانە وبلىستىق اۋىل شارۋاشىلىعى باسقارماسىنىڭ ءبولىم باسشىسى بازاربەك وماروۆ باستاعان ايماق اتقامىنەرلەرىنىڭ ەكسپەديتسيا ساپارىنىڭ ەكىنشى كۇنى ورداباسى اۋدانىن ارالاۋمەن جالعاستى. وبلىس ورتالىعىنا جاقىن ورنالاسقان بۇل اۋداندا ونەركاسىپ ورىندارى ءجيى شوعىرلانعان. شاعىن جانە ورتا كاسىپكەرلىك تە جاقسى دامىپ كەلەدى. اۋداندار اراسىندا ونەركاسىپ ورىندارىنىڭ وندىرگەن ءونىم كولەمى بويىنشا وبلىستا كوش باستاپ وتىرعانىن ايتقان اۋدان اكىمى اپپاراتىنىڭ باسشىسى ازات ورالباەۆ جەرگىلىكتى تۇرعىنداردى جۇمىسپەن قامتۋدا كوپتەگەن شارۋالار اتقارىپ جاتقانىن دا تىلگە تيەك ەتتى.  

ءوندىرىس ورىندارىن ارالاپ كورۋدى ۇيعارعان ەكسپەديتسيا مۇشەلەرى العاش شۇبار اۋىلدىق وكرۋگىندەگى ابدراحيم جۇمابەكوۆ باسشىلىق ەتەتىن «باستاۋ فارم» جاۋاپكەرشىلىگى شەكتەۋلى سەرىكتەستىگىنىڭ تىنىس-تىرشىلىگىمەن تانىستى. بۇل سەرىكتەستىك قىزىل ميا وسىمدىگىنىڭ تامىرىنان شيكىزات وندىرۋمەن اينالىسادى ەكەن.

— سەرىكتەستىكتىڭ اشىلىپ، جۇمىس ىستەي باستاعانىنا 10 جىلدان استى, — دەگەن سەرىكتەستىك مەنەدجەرى گۇلدانا كەرىمقۇلوۆا، — قىزىل ميانىڭ تامىرىن قىزىلوردا، شاردارا، تۇركىستان، جەتىساي، سارىاعاش وڭىرلەرىنەن قازىپ اكەلەمىز. تامىر سۋ كۇيىندە قازىلىپ الىنىپ، ونى شاۋىپ، تازالاپ، جۋىپ، كەپتىرىپ، «حيمفارم» زاۋىتىنا، «زەردە» ءدارىحانالار جۇيەسىنە ەكسترات، ياعني شيكىزات كۇيىندە جىبەرەمىز. بىزدە، سونداي-اق، قىزىل ميا تامىرىنان ۇنتاق، سۇيىقتىق تۇرىندەگى ونىمدەر دە جاسالادى. ولاردى بوشكەلەرگە قۇيىپ قويامىز. قىزىل ميادان نەگىزىنەن جوتەلگە قارسى دارىلەر جاسالادى. سوسىن كوكا-كولا سەكىلدى سۋسىندارعا، كۇلشەلەرگە پايدالاناتىن كرەمنىڭ قۇرامىنا قوسىلادى،-دەيدى سەرىكتەستىك مەنەدجەرى.

Abai.kz