وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ قاتىسۋىمەن شىمكەنت قالاسىندا «قوس انا» بالاباقشاسى پايدالانۋعا بەرىلدى. جاڭا بالاباقشادا 280 بالا 12 توپتا تاربيەلەنەدى.

– 280 ورىندى زامان تالاپتارىنا ساي جاڭادان پايدالانۋعا بەرىلگەن «قوس انا» بالاباقشاسىنىڭ بۇلدىرشىندەرگە ەسىگىن ايقارا اشۋى بارلىعىمىز ءۇشىن ۇلكەن قۋانىش. وسىنداي ءتالىم-تاربيە ءۇيىن سالىپ بەرگەن كاسىپكەر، مەتسەنات سەرىكجان سەيىتجانۇلىنا وبلىس باسشىلىعىنىڭ اتىنان العىسىمدى بىلدىرەمىن. بۇل ءسىزدىڭ تاۋەلسىزدىگىمىزدىڭ 25 جىلدىعىنا جاساعان تارتۋىڭىز دەپ ەسەپتەيمىز. ۇلكەن جۇرەگىڭىزبەن، اتا-بابالار ىزىمەن يگى ىستەرىڭىزدى جالعاستىرا بەرىڭىز، – دەگەن وبلىس اكىمى جانسەيىت قارسەيىتۇلى بالاباقشا مەڭگەرۋشىسى حانشايىم قۇدايبەرگەنقىزىنا عيمارات كىلتىن  سالتاناتتى تۇردە تابىس ەتتى.

ال، كاسىپكەر س.سەرىكجانۇلى ءوز كەزەگىندە جىل سايىن ءبىر-ءبىر نىساندى ىسكە قوسىپ كەلە جاتقانىن جەتكىزدى. ول سەگىز ايدا بالاباقشانى سالىپ، پايدالانۋعا بەرگەن قۇرىلىسشىلارعا العىسىن  ايتتى. 

مۇنان سوڭ زامان تالابىنا ساي جابدىقتالعان بالاباقشانىڭ ەڭسەلى عيماراتىن كوپپەن بىرگە ارالاپ كورگەن وبلىس باسشىسى بۇلدىرشىندەردىڭ ونەرىن  تاماشالادى. 

«قوس انا» بالاباقشاسىندا بالالارعا ارنالعان ويىن بولمەسى، بالالاردىڭ ءان شىرقاپ، بي بيلەۋىنە ارنالعان مۋزىكا زالى، سالاۋاتتى ءومىر سالتىن قالىپتاستىرۋعا ارنالعان سپورت زالى، ءار توپقا ارنالعان ويىن الاڭشالارى مەن  اسحاناسى بار.

بالالاردىڭ بولمەلەرى تازا، ءارى ىڭعايلى جانە كەڭ. ۇيىمداستىرىلعان وقۋ ءىس-ارەكەتتەرى ءۇش تىلدە ياعني  قازاق، ورىس جانە اعىلشىن تىلدەرىندە جۇرگىزىلەتىن بولادى. بالاباقشانىڭ قۇرىلىس جۇمىستارىن مەردىگەر «مۇناي قۇرىلىس سەرۆيس» جاۋاپكەرشىلىگى شەكتەۋلى سەرىكتەستىگى جۇرگىزگەن. ءاربىر بولمە سول توپ بالالارىنىڭ جاس ەرەكشەلىكتەرىنە  قاراي دايىندالعان.

سونىمەن قاتار بوبەكتەر ۇيىقتايتىن بولمەلەرى مەن ساپالى ءبىلىم مەن سانالى تاربيەلەنەتىن بولمەلەرى جەكە دارا. سونداي-اق بۇلدىرشىندەردىڭ جاس ەرەكشەلىگىنە ساي اقىل-ويىن دامىتاتىن سان الۋان ويىنشىقتار تۇرىمەن قامتاماسىز ەتىلگەن.

Abai.kz