وڭتۇستىك قازاقستان وبلىسىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «25 جۇلدىزدى كۇن» ىس-شاراسى اياسىندا «بار مەيىرىمىمىز -  بالالارعا!»  اتتى قايىرىمدىلىق شاراسى ءوتتى.

جيىنعا قاتىسقان وبلىس اكىمى ۇزدىك  وقۋ  وزاتى  بولعان  10 دارىندى وقۋشىعا  جانە  ەرەكشە ءبىلىم بەرۋدى قاجەت ەتەتىن، جەتىم جانە اتا-اناسىنىڭ قامقورلىعىنسىز قالعان، از قامتاماسىز ەتىلگەن جانە كوپبالالى وتباسىدان شىققان 240 بالاعا مەملەكەت باسشىسىنىڭ اتىنان سىي-سياپات تارتۋ ەتتى.

بۇگىنگى بالا – ەلدىڭ ەرتەڭگى بولاشاعى دەگەن ايماق باسشىسى بارشا جاس ورەندەردى مەرەيلى مەرەكەمەن قۇتتىقتاپ، ەلىمىزدىڭ ناعىز پاتريوتى بولۋعا شاقىردى.

«كەلەشەگىن ويلاعان ەل ۇرپاعىنىڭ تاربيەسىنە ايرىقشا قاراۋى ءتيىس. ەلباسىمىز ءاربىر ءسابيدىڭ قۇقىعى قورعالۋىن تالاپ ەتەتىندىگىن جانە  مەملەكەت ونى قامقورلىعىنا الۋى تيىستىگىن اتاپ ايتقان بولاتىن. ياعني ءبىز بالالاردىڭ قۇقىقتارى سەنىمدى قورعالۋى ءۇشىن قاجەتتى جاعدايدىڭ بارلىعىن جاساۋعا مىندەتتىمىز. سونداي-اق، ەلىمىزدە بالالار ساپالى ءبىلىم مەن تاربيە الۋ ءۇشىن قازىرگى زامانعى قۇرال-جابدىقتارمەن جاراقتاندىرىلعان جاڭا مەكتەپتەر سالىنۋدا. بۇل مەملەكەت باسشىسىنىڭ كەلەشەك ۇرپاققا جاساعان قامقورلىعى دەپ بىلەمىن»،-دەدى اكىم.

مەرەكەلىك كوڭىل-كۇيدە بەزەندىرىلگەن سالتانات  سارايىندا وڭتۇستىك  قازاقستان  ساز  كوللەدجىنىڭ  ۇرمەلى  اسپاپتار  وركەسترى شىعارماشىلىق تۋىندى ويناسا، بالالار  شىعارماشىلىعىنان  شاعىن  كورمە  قويىلدى. سونىمەن قاتار، قازاقستان  رەسپۋبليكاسى  تاۋەلسىزدىنىڭ  25  جىلدىعىنا  ارنالعان   تاقىرىپتىق  تاقپاقتار مەن «جاسا  قازاقستان» انىنە  فلەشموب ۇيىمداستىرىلدى.

ءىس-شارانىڭ ماقساتى – قازاقستان رەسپۋبليكاسى تاۋەلسىزدىگىنىڭ  25 جىلدىق جولىندا ەلىمىزدىڭ جەتكەن جەتىستىكتەرىن بايانداپ، بالالاردى ەلجاندىلىققا باۋلۋ، قازاقتىڭ رۋحاني ۇلتتىق قۇندىلىقتارىن،  تاريحىن، مادەنيەتىن جاس ۇرپاق اراسىندا ناسيحاتتاۋ بولىپ تابىلادى.

قايىرىمدىلىق ءىس-شاراسى وبلىسىمىزدىڭ بارلىق اۋداندارى مەن قالالارىندا وتكىزىلىپ، وندا 6 مىڭ بالا كيىم-كەشەكپەن قامتىلدى.

Abai.kz