ەلباسى تاپسىرماسىمەن بەكىتىلگەن ازىق-تۇلىك قاۋىپسىزدىگى باعدارلاماسىن جۇزەگە اسىرۋدىڭ ءبىر تەتىگى تۇتىنۋ رىنونگىنداعى كوكونىس باعاسىن رەتتەۋ بولىپ تابىلادى. جىل ون ەكى اي كوكونىسكە قولجەتىمدىلىكتى قالىپتاستىرۋ ءۇشىن جەرگىلىكتى جەردە جىلىجايلار جۇمىسى جاندانۋى ءتيىس. وسى ورايدا سوڭعى جىلدارى وڭتۇستىك قازاقستان وبلىسىندا جىلىجايلار سانى جىل ساناپ ارتىپ كەلە جاتقانى كوڭىلگە قۋانىش ۇيالاتادى.

وڭتۇستىك قازاقستان وبلىسىنىڭ ورداباسى اۋدانىنا قاراستى قاراسپان اۋىلدىق وكرۋگىنەن جەكە كاسىپكەر ايتباەۆا اسەم 0,14 گەكتار جەرگە جىلىجاي قۇرىلىسىن سالىپ، بيىلعى جىلى ءونىمنىڭ تۇسىمدىلىگى 0,06 تسەنتنەر قۇراعان. ال وسى اۋداننىڭ شۇبارسۋ اۋىلدىق وكرۋگى بويىنشا جەكە كاسىپكەر جاۋتىكوۆا مانشۇك جىلىجايدا كوكونىس وندىرۋدەن ۇزدىك كورسەتكىشكە جەتكەنى ءۇشىن جاقىندا اۋدان كولەمىندە ماراپاتتالدى. 

جوعارىدا اتالعان ەكى جىلىجايدا بۇگىندەرى وڭىرىمىزگە تومەندەتىلگەن باعامەن ءوز ونىمدەرىن ۇسىنىپ وتىر. مەملەكەت سوڭعى جىلدارى جىلىجاي ەگۋشىلەرگە، ونىڭ ىشىندە تامشىلاتىپ سۋارۋ تەحنولوگياسىن پايدالانعاندارعا سۋبسيديا بەرۋدى قولعا الىپ جاتىر. سوندىقتان جاڭا تەحنولوگيالاردى قولدانۋ جىلىجايدا كوكونىس وسىرۋشىلەردىڭ نەگىزگى ماقساتتارىنىڭ ءبىرى بولىپ وتىر. ايتا كەتەر جايت جىلىجايعا كوكونىس ءوسىرۋ تەحنولوگياسى دالاعا قارىقتاپ ەگۋ تەحنولوگياسىمەن مۇلدە قابىسپايدى. قازىرگى ۋاقىتتا جىلىجايعا ارنالعان زاماناۋي قۇرىلىس ماتەريالدارى دا كوبەيىپ كەلەدى. بۇرىندارى جىلىجاي اينەكپەن جابىلاتىن. قازىر وسى اينەكتى الماستىراتىن مىقتى پلەنكالار شىعۋدا. وڭىردەگى شارۋالار جىلىجايعا قاتىستى مۇنداي ارتىقشىلىقتاردى دا قالدىرماي، جاڭا تەحنولوگيالاردى قولدانۋعا كوڭىل ءبولىپ وتىر. بۇگىندە جەردى ءتيىمدى يگەرۋدىڭ ءبىر ماقساتى جىلىجايلار سانىن كوبەيتۋ بولىپ وتىرعانىن ەسكەرسەك، شارۋالاردىڭ بۇل ماقساتى ورىندى.

Abai.kz