استانادا «SarapTime» ساراپشىلار پىكىرسايىس كلۋبىنىڭ كەزەكتى وتىرىسى «قوعامدىق كەڭەستەردىڭ مەملەكەتتىك بيلىك جۇيەسىندەگى ءرولى مەن ورنى» تاقىرىبىندا بولدى.

وتىرىسقا قاتىسقان بەلگىلى ساياساتتانۋشى ايدوس سارىم «ەگەر ناقتى ساياسي باسەكەلەستىك بولعاندا مۇنداي قوسىمشا قۇرالداردىڭ قاجەتى بولماس ەدى» دەگەن ويىن ايتا كەلىپ:

«مۇرات ابەنوۆ ازاماتتىق فورۋمدا ايتقانداي، ەگەر مينيسترلىكتەردىڭ جانىنان قۇرىلعان قوعامدىق كەڭەستەر جاقسى ۇيىمداستىرىلعان ءارى مينيسترگە، مينيسترلىككە ناقتى سىني ەسكەرتپەلەر بەرىپ وتىرعاندا قوسىمشا اقشا شىعىنداپ، ساراپشىلاردى شاقىرىپ، ءتۇرلى قوعامدىق كەڭەستەر قۇرۋدىڭ قاجەتى بولماس ەدى» دەدى.

ساراپشى ءوز سوزىندە الماتى قالاسىنداعى قوعامدىق كەڭەس تۋرالى دا ايتىپ ءوتتى.

«قالا اكىمشىلىگى قوعامدىق كەڭەستەگى ءوز جەڭىلدىگىنەن باس تارتتى. مۇنى اتاپ وتكەن دۇرىس. ونداعى قوعامدىق كەڭەستە ءۇش شەنەۋنىك، ءۇش ءماسليحات دەپۋتاتى بار. بارلىعى – 37 ادام. ءاربىر ۇيىمدا بولاتىن سىقىلدى كەڭەسكە كىرىپ، ءارى قاراي ونىمەن نە ىستەيتىنىن بىلمەي جۇرگەن ادامدار دا بار. سوندىقتان، ازاماتتاردىڭ كەڭەستەن شىعۋ، كىرۋ ماسەلەسىن ۇيىمداستىرۋ كەرەك. ال، كەڭەسكە كىرگىسى كەلەتىن ادامدار بار. بۇل پروتسەسس اشىق بولۋى ءتيىس. ءارى بۇل ماسەلە ءۇش ايدان بەرى تالقىلانىپ كەلەدى»، دەدى ايدوس سارىم.

سونداي-اق ساياساتتانۋشى قوعامدىق كەڭەستەرگە ءارتۇرلى ماسەلەلەر بويىنشا ساراپشىلاردى تارتۋ تۋرالى دا ءسوز ەتتى.

 «قالا ءۇشىن قانشا پايدالى جۇمىس ىستەۋگە تىرىسسا دا  قوعامدىق كەڭەس كەي جاعدايدا كەيبىر ماسەلەلەردى شەشۋگە قاۋقارسىز. سوندىقتان، كاسىبي ماماندارعا شتات اشۋ ما، الدە مەملەكەتتىك الەۋمەتتىك تاپسىرىس جاساپ، كەڭەسكە مامانداردى تارتۋعا مۇمكىندىك بەرۋ جاعىن قاراستىرۋ كەرەك».

ەستەرىڭىزگە سالاي كەتەيىك، «SarapTime» كلۋبىنىڭ بۇل وتىرىسى «مەديا تەحنولوگيالار ورتالىعى» مەن «نۇر وتان» پارتياسى ساياسي ساراپتاۋ جانە ستراتەگيالىق زەرتتەۋ ورتالىعى بىرلەسىپ وتكىزدى.

Abai.kz