م.اۋەزوۆ تەاترىنىڭ اكتەرى، قازاقستاننىڭ ەڭبەك سىڭىرگەن ءارتيسى ايدوس بەكتەمىر "قۇنانباي" فيلمىندەگى باراق ءرولى ءۇشىن مەملەكەتتىك سىيلىقتىڭ يەگەرى اتاندى دەپ حابارلايدى م.اۋەزوۆ تەاترىنىڭ ءباسپاسوز قىزمەتى.

قازاقستان رەسپۋبليكاسى ادەبيەت پەن ونەر سالاسىنداعى ەلباسىنىڭ جارلىعىمەن ەكى جىلدا ءبىر بەرىلەتىن سىيلىققا يە بولعان اكتەر: "كينوماتوگرافيا سالاسىنداعى ەڭبەگىم ەلەنىپ مەملەكەتتىك سىيلىقتىڭ يەگەرى اتانىپ جاتسام، بۇل - ەلدىڭ، حالىقتىڭ ونەرگە دەگەن قۇرمەتى مەن سۇيىسپەنشىلىگى دەپ بىلەمىن. قازىرگى ساتتە وتە قۋانىشتىمىن جانە ارىپتەستەرىمە دە وسىنداي جەتىستىك تىلەيمىن", - دەدى.

فيلمدە ايدوس بەكتەمىر قۇنانبايمەن تەكەتىرەس، بىراق قيىن-قىستاۋ كەزەڭدە ونى يتجەككەننىڭ ايداۋىنان امان الىپ قالاتىن كەرەي سۇلتانى باراقتىڭ ءرولىن وينايدى. "قازاق "ەنەسى تەپكەن قۇلىننىڭ ەتى اۋىرمايدى", - دەيدى  - ەل ىشىندە ەكى الىپ ءبىر-بىرىمەن جاعا جىرتىسسا دا، جاتقا، جاماندىققا باۋىرىن قيمايتىن حالىقپىز. بۇل - تەكتىلىگىمىزدىڭ بەلگىسى، سوندىقتان كورەرمەن قاۋىمعا، اسىرەسە، جاستارعا بەرەرى مول، تاربيەلىك ءمانى زور كينو-كارتينانىڭ كوپشىلىكتىڭ كوڭىل تورىنەن ورىن الاتىنىنا سەنەمىن", - دەدى اكتەر.

ەستەرىڭىزگە سالا كەتەيىك، "قۇنانباي" ءفيلمىنىڭ جارىق كورۋىنە بايلانىستى اتالعان كينو-كارتيناعا قاتىسقان ۇجىمدىق توپ مەمسىيلىقپەن ماراپاتتالدى. سونىڭ ءبىرى اكتەر - ايدوس بەكتەمىروۆ. الايدا ۇجىمدىق سىيلىققا دراماتۋرگ، جازۋشى، مادەنيەتتانۋشى مارقۇم تالاسبەك اسەمقۇلوۆتىڭ ەسىمى ەنبەي قالدى.